Ram sersiam tthannak

Ram sersiam tthannak (1Samuel 7:2-17)

Caan saupi a ttumchuh cang mi Israel miphun cung ah Samuel nih Pathian Thlarau ah I hrimtthannak rian kha fakpi in a ttuan.

Pathian nih Israel mi kha I tharchuahnak le I hrimtthannak caanttha a pek hna. Filistin mi nih Israel kha an don I an hrawh lengmang hnanak nih Israel mi cu Pathian sinah I mer tthannak le lunghno ngaiin ttahnak ah a hruai hna (17:2). Ram a har tuk caah Pathian lawng kan himnak a si tiah an lung a hung pem. Cucu Samuel nih caanttha ah ai ser ve i Israel mi kha Pathian lei ah i mer tthan dingin fakpiin a forh hna I a cawnpiak hna.

Hrimtthannak ding caah ngaihchihnak a herh. Samuel nih “Bawipa ah I mer tthan nan duh ahcun ramdang pathian hna kha hlawnh dih hna u” tiah a ti hna (7:3). Lungthawhak men le lenglang ngaihchihnak men nih Bawipa lung a awih kho lo. Ramdang pathian kha hrawh dih I Pathian lawnglawng kha lungthin dih umnak in biak lawng ah ram cu a dam kho I thluachuahnak ruah a sur ding a si. Cu bantuk te cun an tuah ni ahhin ramkip phunkip nih kan nunpi awk a si ve. Kan ramdang pathian hi ai khat cio lailo. Duhfahnak thlarau thathutnak le pumsa diremhnak duhnak hna hi kan pathian an si ko lai. Cu kan pathian cio cu hlawt dih kan hau ve. Samuel nih Mizpah ah Israel mi kha a pumh hna I an caah thla a campiak hna. Ramdang pathian kha an den hna, rawl an ul I “Bawipa cungah ka sual cang, I thenh kan hau” an ti. Samuel cu Israel cungah, biaceihtu, uktu le Bawipa lam a cawnpiaktu Pathian salttha a si.

Hrimhtthannak cu hneksaknak nih a tlun hnawh colh tawn. Israel mi hna cu Mizpah I rawl an ulh lio le Bawipa ah I hrimtthannak an tuah lio ah khan, hriamnam loin an um lio caan a si, cu lio thenge ahcun khuachia nih Filistin mi hna cu a forh hna I Israel mi kha a tukter hna. Israel mi cu an ningtti tuk nain Pathian le Samuel cungah khan lungthin dihlak in an I hngat I Samuel nih tuufa a thah I Bawipa sinah raithawnak a pek (7:7b). raithawinak a pekchanh lio ahcun Filistin mi nih an vun nam hna. Tuchung zumtu hna cung zongah  Satan nih harnak a kan pek le a kan den cuahmah lio ah hin Jesuh nih a Pa sinah thla a kan campiak, a kan dirhkamh ve I amah thawng cun luatnak hnangamnak kan hmuh.

Adikmi nunremhnak nih Pathian khamhnak kha a caan hmante ah a tlam a tlinter. Israel mi Mizpah I an rak I pumh cu raltuk awk caah a si lo caah hriamnam zeihmanh an rak I ken lo. Thi dih ding a rak si ko. Asinain lungthin tak tein Bawipa ah an I mernak le Samuel raithawinak a pek mi cu Bawipa nih a cohlan caah, Bawipa aw nih Filistin mi cu thangpi in a rit hnawh hna caah an I tuai dih I a zam dih. Cun Israel mi nih an dawi hna I an tei cikcek hna (7:11).

Hrimhtthannak nih caan saupi a nguh. Samuel chan chung ah Israel mi nih teinak, daihnak le lawmhnak caan saupi an hmuh. Israel nih Filistin mi an tei cikcek hna hnu ah Samuel nih lung nganpi a phun I “ Evenezer” tiah min a sak I a sullam cu “Bawmhnak lungphun” tiah Bawipa nih a bomhnak hngalh camcinnak kha a tuah. Kannih zong harsatnak nganpi chung in Bawipa nih a kan luatternak kha kan thinlung in philh lo in I cinken zungzal ding a si. Israel nih Filistin mi cu an tei hna  kua hna kha an remh tthan hna. Samuel cu Israel cungah kum saupi biaceih bawi rian a ttuan. Ramah khua ah a um I Israel ram kha a dihlak in ttha tein a kilven, a zohkhenh I Israel ramchung dihlak ah daihnak lawmhnak le thluachuahnak a tlung I Pathian nih Israel cu a len tthan hna

.

Ref;Bible bia in phungchim