Khawi ah dah Na lungthin a um?
Kan nun cio ah buainak le lungtlin khawh lo nak cu kan ngei cio hna lai tiah ka zumh. Mah cucu a hohmanh nih kan hrial khawh lo mi hna an si. Nifatin kan nun hi ruah ah cun khuruah har za a si.
Zeitindah kan cawlcangh i khua kan sak timi hi kan ruat tawn lo. Kan dam i rian kan ttuan i,,cu ticun nifatin kan caan kan hmang hna. Sihmanhsehlaw mah vialte hi ratnak hmun an ngei timi cu kan ruat bal lo, amah tein thil a rak cang mi ah kan ruat tawn. Kan ruahnak hrimhrim hi nifatin kan hmuh tawn mi nih a khuh dih tawn. Asinain kan nun le kan caan dihlak a ngeitu Pathian cu kan sut tung pakhatnak a si bal lo. Kan sut tung kan phak khawhnak hnga caah bawmtu men ah kan ruah i heh tiah bawmh kan hal. Zuamcawhtu nganbik cu phaisa kong he pehtlaiin a si. Zeitindah phaisa kan kawl timi ah hin kan lung hi a um bik.
Mathai chung ah Jesuh Khrih nih nan chaw umnak ah nan lungthin a um tiah a kan chimh. Khah kan mah cio i zoh tthan hna usih...tu ah khan khuazei ah dah na lungthin a um? Mipakhat nih a tuahttuan mi zohnak in alungthin umnak hmun cu ai fiang bik ko rua ka ti. Vancung ah ro ai khawntu missionary tampi cu an ro khawnnak vancung ah an lungthin zong a rak um taktak. mah nihhin a ka challenge taktak. Zumtu thlarau mi ai timi pawl nih kan chaw kan i khawnnak cu ai fiang tuk cang. Vancung cu chim hlah, van rim hmanh a nam lo. Kan tuah ttuan mi thil cu vawlei cung tthatnak ca men lawng a si lio ah zeitindah vancung ah ro kan khawn i kan lung zong a um kan ti ngam lai.
Nangmah te in rak i zoh ve, khawi ah dah na lungthin a um? Jesuh Khrih nih cun a rak theih cia tuk caah Vawlei cung ah si loin Vancung tu ah nan chaw va khawng u tiah a ti. Zumtu nih cun kan ro khawnnak ding hmun ttha bik cu vancung khua ah a si. Rungrul le cirik nih an ei khawh lonak le mifir nih an fir khawh lonak hmun ah nan chaw cu va khawng u timi bia hi kanmah caah a ttha mi a si ca ah Jesuh nih a rak chimnak a si.
0 comments:
Post a Comment