Sunghnak hi hlawhtlinnak caah a herh mi thilri pakhat a si ve.
Sunghnak hi sianginn ah maw, rian ttuannak ah maw, hawi le kom lak ah le chungkhar ah maw kan tong. Kan nun ahhin sunghnak hi hrial awk tthalo mi a si i, mi thin a tawiter hlei ah a chiatnak lei kap in thil a kan hmuhter.
Sunghnak le tisualnak hi tthen khawh lo mi an si. Asinain mitampi nih cun kan sunghnak le thil ti sualnak ruang ah mi zeirel lonak le mawhchiatnak kan tong lai tiah kan i ruah sual tawn. Asinain sunghnak kan ton mi kong ah thilsining kan i theihthiam piak ahcun i mawhchiatnak a lo lai i, kan sunghnak hmun khan hlawhtlinnak ah mi a hruai kho tu thil kan cawng kho deuh lai. Henry Ford nih cun “Sunghnak hi cu a thar in thok tthannak caah caan ttha a si” tiah a rak chim. “ Kan hlawhtlinnak kan lawmh hi a ttha ko, nain kan sunghnak in kan cawn khawh mi thil ttha tein cawn kha a biapi deuh tuk” tiah Bill Gates nih a rak chim.
Cucaah kan sunghnak nih sianginn ah kan cawn khawh lo mi fimnak, hlawhtlinnak ah mi a hruai khotu fimnak a kan cawn piak mi ttha tein cawn kha a biapi taktak. King of basketball tiah ti mi Michael Jordan nih cun “ ka nunnak ah hin sunghnak, sunghnak le sunghnak lawng te a si ko, cu ruang pei ka hlawhtlin nak hi a si cu” tiah a rak chim.
Voi zeizat dah na thil tuah mi ah na hlawhtlin lo, voi zeizat dah sunghnak na ton ti mi kha na sining taktak a si lo, hlawhtlinnak cu na banh khawh tawk ah a um zungzal ko. Asinain kan sunghnak ruangah zei hmanh tuah tthan huam lo in kan um ahcun kan sung cikcek tinak a si men hnga. “Sunghnak hi ka cohlan kawh ko, aho poh khi sunghnak an tong dih cio, asinain sungh ruang ah zei hmanh tuah huam ti loin um cu ka cohlan khawh bak lo mi thil a si” tiah Michael Jordan nih a rak chim.
Sunghnak hi ttih hlah ti cu a chim a fawi te, a taktak in kan ton tik ah zaraan cu ttihnak in kan khat. Asinain kha ruang ah khan kan tei kho lai lo i a kan nenh peng lai tinak a si lo. Kan tei khawh mi thil a si. Thomas Edison nih Electric mei a rak siam ah khan voi thawnghra tiang a rak hlawhtling kho lo, nain a chim mi cu “ ka sung bal lo, hman awk tthalo mi thil thawnghra tu ka hmuh chuah ” tiah a rak chim.
Na thil tuah ning kha hman awk a ttha taktak rih lo i si kho men ko dawk aw, kha kha na sung tinak a si rih lo.
Sunghzatlaknak hi sunghnak hmuh a si lo, tlaiternak, asiloah hnu deuh i thawn khi a si. Na sunghnak nih khan na lungthin phan hlah seh, nai tinh mi peh zulh kho lo in an tuah sual lai. Sunghnak hi hlawtlinnak caah a herh mi pakhat a si ve ti thei buin hmai nor tu si kho ding ah duhsak he thazang peknak video tawi zohtu dih lak cungah lawmhnak tampi ka ngei.
Voikhat cu vanlawng in Sibawipa, Sihni(lawyer)pa, Pathian rianțuantu pa le Hngakchia pa te khual an tlawng ți hna.
Ruahlopiin, Vanlawng mawngtu pa nih cun "nan paracut(Lețhi - kawl) i lak uhlaw a ran khawh chung in zuang uh" tiah a au cuahmah lio ah cun vanlawng cu ai hnin pah, a tla deuhdeuh cang. Paracut le pakhum lawng a um, ai cit tu le pali an si fawn.
A ho dah, a zuang hmasa lai timi ah an buai cang. Cutikah Sibawi pa nih cun " kha kei hi midang nunnak tampi khamh tu mi biapi ka si. Ka thih ahcuna si kho lai lo" a ti i paracut ai lak i a zuang colh.
A dihcun, Sihnipa nih ai thawh ve i " kei hi vawleicung ah mifim bik ka si, mitampi an bia ceih ding a herh rih, ka nun rih lo cun mitampi an buai dih lai" a ti ve i hngakchia pa ai bei mi cu la in a zuang colh ve. Paracut pakhat lawng a tang cang. Pathian rianțuantu pa le hngakchia pa an tang.
Cutikah, Pathian rianțuan pa nih cun " kha hngakchia pa kei cu ka upa cang, ka nun a cheu cu ka hman cang, ka thih zong ah a poi ti lo, nang na no tuk rih paracut hi la law a rannak in zuang colh" tiah mithmai panh tein a van ti. Asinain hngakchia pa te nih cun "ka pu..phang hlah kan thi lai lo, a tu te i vawleicung ah ka fimbik a titu pa nih khan paracut la loin kai bei mi ka puantom ai lak i a zuan pi diam, cu caah paracut pahnih a um rih. Heh i lak law zuang usih" tiah a ti.
Mah le mah fimbik, thiambik le biapi bik ah i ruah hi a caan ahcun kan mah hrang lila ahhin țih a nung tawn. Mah nak in midang biapi deuh ah chiah thiam hi zuam hna usih.
Chinchiah /// Uknak lak ka te i ka rak ttial mi a si
Kum 2020 November ah rampi huap thimnak tuah dih hnu ah kum 2021 February thla ah chiatser biakamnak tuah ding a si. Sihmansehlaw kum zei maw zat uknak an thlah cang mi cu mipi thim mi uktu hna sin in hramhram in an chuh tthan hna. Cucaah President U Win Myint le rampi ruahnak petu Daw Aung San Suu Kyi le NLD party hluattaw palai zei maw zat an tlaih hna. Cu hnu ah ralkap nih cun kum khat chung rampi Emergency an phuan i, ral bawi hlun U Myint Shwey cu lakhruak President ah thim in, rampi phunglam sertu, Uktu le Biaceihtu sinak pathum cu General Min Aung Hlaing sin ah a pek colh ve.
Kum 2015 thimnak ah NLD nih USDP cu fak nawn in a rak tei i, Democracy uknak lei lam ah rampi cu an kan kal pi, hi hlan kum tampi chung cu tlang cung hriamtlai hna he i kahdohnak le ralkap uknak in rampi cu a rak kal. Kum 15 leng inn thong ah thlak mi Aung San Suu Kyi cu Nobel Peace Prize rak co kho tu sihmanhsehlaw Rohingya miphun thahnawnnak ruang ah sual phawt mi ralkap a rak runven hna ruang ah kum 2019 lio ah vawleipi theih in a min a chiah tthan. Sihmanhsehlaw ramchung ahcun mipi thapek le cohlan ai hlawh deuhdeuh tthan. Cu tluk in Suu Kyi nih hin amah a bawh pengtu hna nih an seh sual nakhnga lo ai zuam len ko nain ral a duh pengtu ralkap nih cun Suu Kyi cung ah mipi nih zumhnak kan ngeih mi a hmuh tikah thinphannak le ttihnak in a khat. 2020 thimnak result zoh tikah buaktlak in 83% tluk NLD nih teinak a hmuh ti hi hmuh khawh mi a si. Cucaah phunghram remh ai tim mi NLD he uknak i cheuh cu ralkap caah zuamcawhnak nganpi a hung si i, kan i thim ding mi lam a si lo tihi ralkap nih a hmuhning a si.
Hi bantuk in ralkap nih hramhram in uknak a lak mi cung ah UN tel in vawlei cung ram pumpak tampi nih phihkharnak an tuah cio hna. Asinain hi phihkharnak nih hin ralkap nih uknak an lak mi thlah tthan ding tiang in tthathnemnak a chuahpi kho lai maw tihi ruah phu ngaingain a si cang. Kum 2019 lio ah Rohingya kong ah General Min Aung Hlaing cu US nih fak ngai in phihkharnak a rak tuah cang. Cu lawng hlah chawlehnak lei ah phihkharnak tampi tuah a si. Asinain an zei hmanh a poi lo i, mipi tu nih chawlehnak lei phih kharnak ruang ah kan tuar deuh. Cucaah kan hnung te zong ah ralkap lei nih cathanh an chuah mi zoh tikah phihkharnak te hna hi cu an caah zeihmanh a si lo zia le an tuar khawh zia hmuh khawh a si. Cu hlan Thilsining zoh tikah ralkap cung ah phihkharnak nih hin anmah ralkap cung ah fahnak tlunter loin mipi cung tu ah harnak a tlung deuh ti hi mit hmuh kuttongh a si. Cun Tuluk lei ah ai bek deuhdeuh sual lai tiah a thin a phang ziar mi nitlak ram hna nih hin Myanmar ram cung ah a fak bik mi phihkharnak an tuah zumh a um lo. Cucu anmah ralkap zong nih fiang tuk in an i theih mi a si tihi ramkhel cuantu thiamsang hna nih an hmuhning a si.
Tuchun ni tiang ah ralkap uknak laknak kong ah Tuluk biachim le tuahsernak zoh tikah a fiang taktak lo i, a cozah chung i thlennawnnak sawhsawh bantuk ah Tuluk nih cun a ruah i, ASEAN zong nih Tuluk bantuk cun an ruah ve.
Cucaah rak chim chung awk ah a tlak ngai mi cu ni tlak ram hna le ASEAN nih hin ralkap uknak chuh mi hi fianghlang tein an dohkalh lai i, action an lak lai tihi cu chim ngam ding hmanh a si lo.
Sihmanhsehlaw Myanmar rammi caah ruahchannak a um ti bak lo ti zong ah chim phung a si hnga lo. A tthawng tuk mi ramchung ramleng media hna nih an hna an tun nak siseh ram chung chawlet hna thinphannak hna hi ralkap lor kho lo ding in siiknak pakhat bantuk an si ve. Cun chan tiluan dawi in a kal cuahmah i, rul bang a fim i, tthuro bang a nun a nem mi rammi cungah a hlan bantuk in cepa na duh zong ah cepa, varit na duh zong ah cepa tibantuk phun ralkap uknak kalpi tthan ding kha cu anmah ralkap caah ttihnung ngaingai mi a si cang.
Ramchung ramleng in Myanmar mi a si mi poh nih ralkap duhlonak langhter a si cuahmah bantuk in, minung tampi nunnak zong aliam cang. Hi bantuk in mipi nih kan duhlonak hi hmual a ngei ngai ngai mi a si bantuk in tlang cung hriamtlai phu hna nih van nawr ve ding zong hi a biapi taktak tihi ramkhel cuantu hna hmuhning a hung si. Tlang cung hriamtlai phu hna caah cun ralkap uknak lak hi cu khuaruahhar awk a um lo i, asinain ramchung ral daihnak hrawktu a si ti tu hi an hmuhning a si ve.
Myanmar ramchung ah cozah theihpi mi miphun 135 tluk um in, cu hna lak ah mah te uknak duh in hriamnam a tlai mi tampi kong ruah tikah ramchung ral a tho kho men ti hi ruahnak ah a chuak duh ngai mi a hung si. Hi bantuk in ralkap nih uknak an lak ruang ah hin tlangcung hriamtlai hna nih kan khel mi Federal democracy siseh, ramkomh in chuahduhnak mei kau hram ai thok i, a dai ziar ko mi phun ttanhnak le biaknak kong ah i thleidannak hna cu nun hram an i thok tthan cang. Cucu hramhram uknak chuhnak nih hin a par pahlik te ah a chiah cang. Cucaah theitlai ttihnung tuk a tlai kho mi ram chung ral a chuak kho dirhmun ah kan dir ti hi thiamsang hna hmung ning a si. Cu bantuk in ram chung ral tho sual sehlaw mah le ram ai veng kho poh an him lai i, ai veng kho lo poh cu khangh dih an si te ko lai Cu caan ahcun cabuai cung biaruah le pakhat le pakhat i hrial ti a um ti lai lo. Tha rung hmang in mah le ram ven a si te lai ti hi vawlei cung tuanbia zoh in chim chung khawh mi a si.
Tulio ram sining zoh tik ah hmailei ah zeitindah kan cawlcangh lai timi cu ralkap nih zei tluk sau dah uknak hi ai i tlaih peng lai i, zei tikah dah a thlah te lai timi cung ah ai tthum mi a si. Tutiang thilsing ah cun mipi thim mi palai hna sin ah uknak pek a duh lo mi hmuh tikah rampi hmailei karhlannak caah thil ttha lo ngai a si ti hi hmuh khawh mi a si.
Pale sunlawihnak ni sunglawi ah na pa cung ah sunlawih awk zei hmanh thei loin na um sual maw? Zeicatiah na pa cu zuding le sa ei a si kho men, asiloah na hngakchiat tein na pa cu hmun dang ah um in hramh na herh caan zong ah na kam ah a um lo i Pa a thlum-al nak kha hawi tluk in na tep lo kho men.
Asinain theihter tthan kan duh mi cu..."na pa thawng in hi vawlei ah na rak chuak ee" tihi a si. Kan biak Pathian nih hi vawlei a ser dih ahhin A zoh i "a ttha" tiah a timi a si. Ai dawh tuk mi Pathian kut neh hmu kho ve ding in an hringtu na pa a si kha philh hlah. Sam cattial tu nih cun van le vawlei le sersiam mi thil hna nih hin Na sunlawinak an langhter ee tiah a ti. Pathian nih dawh tuk in a sersiam mi hna lak ah leng kho na si ve hi na pa thawng in dahkaw a si ve.
Tuchun ni ah ka pa nih a ka daw lo asiloah a um ve ti lo tiin ngaihchia in um hrim hlah cu nakin Pathian kut neh dawh na hmuh khawhnak hnga Pathian nih na nulepa a hman hna ruang tal ah hin an cung ah i lawm ko tihi ka chim duh mi a si.
Ziah kedil nan ngei lo maw, asiloah nan kedil maw a durh dih ttha tein kal lo in..innte tiam bang dingthlir rumro cun nan kal lulh ko hna...tiah ti phu bak nan si. Ke par te lawng in kal teh nan va celh ve...Nan ke cu tthum u law..nan ke zaphak in kal u law a nuam deuh ving i, sau pi tiang kal khawh a si.
Tulio zumtu ai ti mi tampi cu dingthlir bu in zumtu nun lamtluan ah kal a si. Cu ka chim ngam nak cu...Baibal ah fiang tein kan theih mi cawnpiaknak hna cu an rem tuk ti lo i...a cipciar in Baibal nih a langhter lo mi te cu i lak riang mang in a cung ah an dir. Minung hna nih hi ri tiang an theih ah cun an ca ah a za ko tiah Pathian nih a timi cu i za loin an duhning le an sining he ai rem zawng in an i merh i...an dir pi. Ziah cu ka theng ah nan va dir ee..hi cu si dawh a si lo tiah biahal khawh an si ko, nain a hohmanh nih a lehnak fiang tein theih a si lo tik ah, a hnu ah cun hi zong hi a dik ve mi a si ko timi ruahnak a chuak tawn, asiloah mah le zumhnak ti hrawng in a tlangkawm a si tawn. Cu hna pawl cu Ke dingthlir in a kal mi cu an si. Asinain Ke dingthlir bu cun sau pi kal khawh a si lo bantuk in..an nih zong hi saupi an kal kho lo...an palhnak fim tawl cawk lo in a tam colh zau tawn.
Ziah Baibal ah fiang tein kan theib khawh mi hna cung ah dir duh lo in..minung nih kan theih khawh tawk in Pathian nih ri a khiah mi,...a lehnak dik tak Pathian nih a langhter lo mi cung theng ah cun nan va dir.
Zeitluk in dah Smartphone nih mino a hrawh khawh hna
Chantiluan nih a kal pi mi cung ah a tlongleng mi mino hna kong ah mitampi an lung a rawk ko cang. Vawlei technology nih le a sang deuh deuh. Tu lio mino kutlaih cu Smart Phone a si ti ning law ka palh tuk lai lo dah. Hi kong he pethlaiin Thiamsang hna nih an chim mi rak rel ve. Cun mino tampi nih an rel khawh ve nakhnga Share rak tuah ve.
Chan hi ai let lengmang i, tu kan chan hi technology lei ah a san bik lio caan cu a si ve ko lai dah. Mino hna nih an duh bik mi le an hman bik mi an kuttlaih cu Smart Phone a si. Smart Phone hi thil cangkang taktak pakhat cu a si ko, sihmanhsehlaw hi nih zeitluk in dah mi a hrawk khawk timi hi kan i thei kho lo ti a si. Kan hman i a kan hrawh khi a rak si deuh. Ka hman ko cu teh, hman lo awk nih ttha hlah kaw kan ti, si a hman mi a si ko. Asinain Hi nih hin mino hna thinlung ruahnak ah a tthalo zawng in rian a ttuan e tiah Jean Twenge timi nu nih a chim.
Mino a homanh Smartphone or computer zoh nak in a caan a hmang tuk mi cung ah a tlung mi cu “ai lawm kho lo, a hirha zang kho lo, a umhar or a lungleng, lungrawk in a um tibantuk hna hi a tlangpi in an cung ah a tlung.
Tu lio mino tampi cu Smart Phone he an caan pumpi an hmang hna, an hrang ah a ttha maw tthalo timi ah a lehnak (result) a chuak mi ah cun mitampi cu an lungrawk, um awk an thei lo, mah le mah ai that mi zong an um hna, thinlung lei hrim ah harsatnak tampi an tuar hna tiah theih a si.
Cucaah nu le pa nih kan fale phone an hmang ning kong tampi kan ruah a herh hringhran. Zeicahtiah Smart Phone a zoh peng mi kan fale cu theih tuk lemlo in an rak tuar taktak khi a si, an ngandam nak tiang zong hnahnawh nak a pek khawh. Nikhat ah sumilam 1 chung a zohtawn mi kha, minutes 30 deuh in zoh cang seh ti duhnak he a si khawh chung in le a lam phunphun kawl in kan zuam pi hna an hau cang.
Christmas thla kan phak hlan deuh khin lunglen ai thok cang. Kan ngai tuk i Christmas caan khi hei hnuh ka duh. Zeicatiah nang he Christmas ah len tti lai ka ruah ah ka um kho lo. Kai ngaih tuk. Asinain Kum Thar kan phan tthan, kei ca lungkuainak caan nih a hung chuak tthan ko.
Ka duh lo ti zongah mah duh ning cu si kho fam lo. Caan nih a liam pi mi kai lawmhnak lak tthan ka duh. Kum thar kan phan i kum thar ni cu nuam in ka um ko rua ka ti lio ah ka chung lei nun nih a rak duh lo, a ruang cu dawtnak thaikip kal ding a si timi a rak i fiang tuk. Mitampi zong keimah bang hin an si cio ko...tiah pacan kai cuh..asinain kai nuam kho taktak lo. mah lawng lungleng i um tthan ding cu...ruah a har ko.
Mitampi cu an chungkhar, dawtmi hna he an i tthen tthan can a si, cucaah kei mah bang kum thar chuak i lunglen ai thok tthan mi an um cio hna. Christmas le kum thar lawmhnak nih ka lung a ciah tuk lio a si, a si ko nain mah cucu ka caah thil ttha lo taktak a rak si tthan. Christmas le kum thar dinh caan hi a va nuam ve ka ti. cu nih cun rian ttuan thathawhnak a lak dih. cu lio i dawtmi nih kaltak mi si cu a fawi lo. A chim zia zong ka thiam lo, a fawi lo ti hlei cun..
Kum Thar chungah ka philh khawh lo ding january 3..si ko cang lai..kum thar chuak cun lunglen ai thawk tthan hawi ....zeitik ah dawt he len tti tthan caan um hnga maw? Cu caan hngak in..ka nun ka rak hmang ve lai..Dawtmi te aw...
Lai tlang khuasa pawl a kan hliam dih tu Lai Hla pakhat
Mah hi Hla cu a ttha bak mi a si. Ka rak uar bak ko...asinain a donghnak fung hrawng tu cu ka lung a tling kho deuh lo, zeicahtiah ka sinak tuk in a ka phomh chih ca ah a si ko rua.
Mah hi Tlangpi ka tar tikah phun dang ah ruat hlah..Cabia pakhat ve bantuk men a si. A phuahtu hi Hrat Hmung a si. A satu cu Siang Men Sung a si. Laimi lak ah Hla Phuah thiam nih a phuah i hlasak thiam nih a sak, a thiam ve ve nih tuah tti mi a si tikah, milung a khen khawh ngaingai. Vawleicung ah hin hla phuah thiam, biazai ttial thiam hna nih mi an vei ah cun..loh bak a si ko..tutan zong ah mah hla nih cun....
Zeitin a ti "Mit caw le Kebei lawng nih ram an hruai kho ti lo" tiah a ti. Mi a hliam ning hi a fak ka ti. Cu ahcun ram dang um pawl tu cu "Hmaihngal pi tlak Lai pasal, Lairam nih an ngai tuk cang" tiah a ti. Mah cucu a ttha ko, a dik lo ka ti lo. Asinain ka lungfak ziar ko rua..hehe...a ruang cu mitcaw le keibei he Lai hngak pawl a kan tahchunh mi te hi a si.
Khat lei zong in ruah ahcun a dik pah taktak ko. Tuchun ni tiang a dik ko rua hlah maw tiawk in ka rak buai ve...Lai hngak mino tampi tinhmi ngei lo, ruah mi ngei lo (nuamhnak lawng ruah), chungkhar ca ah, khuatlang ca ah, ram ca ah ruahnak a ngei lo tu Lai hngak kan tam tiin ka hmuh, cu caah mitcaw le kebei kan si taktak ko...mah nih hin thazang a ka pek ngai...ca tampi a ka rel ter, zeicahtiah carel nak tel loin lungvar khawh a si lo ti kai fiang..ram dang um pawl kan zuam hna tinak si cu...Lai hngak mino zong nih i theih uh...mitcaw le kebei men nan si lo nak ding ah thazang chuah cio uh..kai lawm..
Kei ca a sunglawi tuk mi arfi cu a rak chuak. Ka nun hi ai lawm in a tling khun. Hnagamnak in ka khat i thil ka tuah mi kip cung ah ka thatho. Ka nu hawi nih an ngeih lo mi a ngei mi ko khi ka lo. Sihmanhsehlaw mah cun Arfi cu kei ca lungkuainak a si. Leng dang ttang pom in nai mer hnu zongah rak ka philh hlah mu. Harnak na ton caan le lungkuai in na um caan rak ka philh hlah, kan tuar pi ve lai.
Na ka kal tak hnu ka lileng in ka um har. Kan dawtnak nih cun tthen lai an siang hrim lo. Lunglilen a zual khun. A ngan in a thuk ve ko rua tiah ka ruah mi kan i dawtnak cu kei ca lungkuainak men a rak si. Kan lunglen ka celh lo ee dawt aw..na umhar caan ah, kal nak na theih lo caan, ka thinlung innka kan on piak peng ko mu..rak kir tthan ko kei sin ah.
Nang he um tti kei ca nuamhnak, ka ngaihchiat caan ah ka thin hnem kho tu nang lawng, ka lungthin nih an hlam mi nang lawng. Nang he lawm in len tti caan ruah zawn ka tha a nuam khun, sihmanhseh ruahnak men a rak si. Ka dawt a hlan bang khan kan lengtti i nuam le lawm in kan caan kan hmang tti asinain ka caah zaanmangchia a rak si. Kan ngai in kan hlam hringhran. Ka sin rak kir tthannak ding ah zeilam tal a um hrim lo maw. Na zuun tuar in a hram mi ka caah hmun na ngei ti lo taktak cang maw?
"Zeitik caan poh ah na herh caan ah rak ka philh hlah, ka lungthin innka na ca on cia in ka chiah peng lai" timi hi ka sin in nai hlat hnu ah kan kamh khawh mi a si.
Kan tuah hmasa mi ruangah hin kan lungfak tawn timi tlangpi tar in thazang la tthan hna u sih.
Nifatin kan nunnak ah tuahttuan dingmi tampi kan ngei cio hna. Mah cu kan tuahttuan mi hna nih cun kan nunnak le kan lungput tiang ah rian a ttuan. Kan tuahttuan mi a tthat ahcun a theipar ttha zun ding a um tawn. Sihmanhsehlaw a ttha lo ahcun theipar ttha zun ding kan ngei tawn lo.
Nifatin ka nunnak ah tuah hmasa ding thil hi ka theithiam tawn lo, cun ka theih zongah ka tuah huam tawn lo. Zeicahtiah minung sinak in duh mi le duhlo mi ka ngei tawn ve. Tuah ah a ttha ti theih mi hmanh ka tuah huam lo tikah a theipar zun ding cu kai manh awk te a si. Asinain thil ttha si ti ka theih ko mi ka tuah lo ruangah ka cungah thil tthalo a rak phan mi ruang ah ka lungfak tawn.
Vawlei cungah hin hnangam pe kho tu taktak cu Pathian lawng si ti hi ka theih ve ko. Asinain a nawlbia zulh cu ka huam hleng lo. Asinain hnangamdaihnak a ngeih mi cu rak ka pe seh ti hi ka duh tthiam rih fawn. Minung hi kan lungduh kan tuah hnu ah ai chir tawn mi kan si. Ka duhnak cu a ngan bikah ka chiah i tlinter khawh kai zuam, asinain ka caah theipar tthalo a tlai tertu men an rak si tawn. Zeinihdah ka lungfahnak a chuah ter timi ka ruah tikah a tu ka lungfahnak cu a liamcia caan ah ka rak um tuning nih a chuahpi mi theitlai a si.
Cu nih cun lungfahnak a chuahter tu thil hna cu kan kham khawh hna tinak si. Nifatin kan tuah hmasa ding hna cu Pathian thangtthat hi a si. Zeicahtiah cu lawng lawng nih cun hnangamnak thei a tlai kho. Kan mah duh mi thil kan tuah nak nih hnangamnak a kan pe kho lo. Nifatin thawngpang na theih mi le na hmuh mi nih hnangamnak an in pe kho lai lo. Cu hna lak in chunglei hnangamnak an pe kho tu cu Pathian thangthat lawng hi a si. Kai Lawm....
Mittha pa a thin hang i zeidah a chim rak bik ve, tawite lawng si
Laimi lak ah a nunzia a ttha ngaimi pakhat pa nih a chim mi si. Asinain a min cu ka langhter lai lo. Hi pa hi a thinhang tuk i ai sum kho ti lo cu a si bik ko rua. Lungtak bak in a chim mi si.
A mah siannak te he ka van share mi si. Asinain a sullam, a thinhannak a ruang bel ka langhter lai lo.
A chimi mi cu..Ralpi pakhat lio a Hitler kha a sual tuk nan ti maw? Cun Kawl bawi pawl kha an sualtuk nan ti maw, North Korea hruaitu pa khi a sual tuk nan ti maw, cu si ahcun nang teh na tha tuk maw? Kei cu Missile ngei ning law miram dang chim hlah, Chin ram ah ka puahnak sau tuk cang la, Laimi tham cu mittha si le zei rel lo ka hmang, mi sikhmang si le a tthalo tuk kan ti. Laitlang khuapi um nih khuate um nan kan nihsawh tuk. Laimi lak i mifim cathiam timi khi khuate in a tthang lian mi lawngte an si khi philh hlah uh tiah a lungfahnak bia a chim. Amah hi Hakha um mi a sinain, a tu cu a um ti lo.
A chim rih mi cu "Cozah hi an va ttha ve, bomb hna hi duh poh in hmang kho sihlaw, kan thi viar cang ko la hi teh" tiah a pek rih. Hakha a kal pah lampi ah nehsawh deuh in ti hn sehlaw a lo ko.
Laimi hi kan zia a ttha lo ngai ngai ko, Pathian thei tu nu le pa fa kan si dih ko nain fale nih cun midang va hnursuan cu zei ah rel a si lo tiah a chim rih. Mithin hannak ka van share caah rak ka ruat thiam dingah zangfah kan nawl hna..
Nifatin ka nun hi ai lawm in a rak nuam. A caan ah cun hawirual ngai in ka nun ka rak hmang tawn. Ka lung hi a leng tawn ve. asinain caan sau lo te ah a liam tthan tawn. Ka hawile lak ah hin ai nuam cem ka rak si. Keimah lawng hi inn chungah maw, asiloah lengzong ah ka um i nuam tak in ka nun ka rak hmang tawn. A chan cu ka nun hi dawtnak hi a rak lam ve lo.
Cu ti nifatin ka nun nuam tak in ka hman lio ah cun, ka nun ah mipakhat hi a rak i langh. Cu hnu cun ka nun hi keimah lawng ka hna ngam kho lo. Zeidek a bau mi ko khi a lo. Asinain hawi lak chuak tikah ai zia deuh mi a lo, asinain mah cucu a leh nak a rak si lo. Asinain a lehnak a ngeitu ka ton caan ah cun ka thawpi a chuak i ka paw a fak tuk mi khi dam colh sehlaw cu ko cu a lo. Nuam ka ti i amah he pe 100 tluk hrawng i ka um bu hmanh khin nuam ka rak ti.
Mah hi maw dawtnak cu a si hnga? A va nuam ve tiin dawtnak sullam cu ka rak chim ve. Si..dawtnak a sullam cu a nuam timi hi a si ve. Dawtnak nih mi a umpi ah cun harsat zongah a nuam ve taktak ko. Harsat ngaihchiat caan zongah pialnak lam dawtnak a rak um timi theih nak nih khin hna a ngam ter khun.
Ka nun hi ai lawm tthan hawi, mah cu dawtnak ruangah a si. Dawtnak hi ka sin in a hla ah a um kho tihi ka ruat bal lo i midang nih an chim zong ka thei theng bal lo. Asinain nithla cu a liam i caan nih mi a hngak lo an ti bang. Kai manh hlan dungdang ah caan nih a ka liam phuat. Cu tluk in kai nuamh lio ah cun mangchia manh ko khi ka lawh ter. Sianginn kan kai nak ah cun kan mit ai tawn zawn hi a tlawm lo, asinain ahnubik caan ttha hngak in nitin ka caan ttha ka rak liam ter. Zeisi hmanh ah tuni cu kan mih ai ton ah cun ka chawnh lai i ka lungduh bia ka ruah ngam nak hnga zeital ka tuah cang lai tiah biakam bu he sianginn ah cun ka kal tthan. Sihmanhsehlaw caan nih a liam pi cang rua..caan ttha ka ngei kho ti lo i tuchunni tiang caan ka ngei tthan kho ti lo.
Dawtnak sullam cu ka thlen tthan i lungkuainak tiin. Dawtnak ruangah maw ka lung a kuai rih ko lai. Dawtnak ruangah maw lungleng in ka um rih ko lai?
Hlan chan ahcun pasal ttha timi hi an rak sunlawih taktak hna. Mah cucu zeibantuk lei ah dah Pasal ttha an si timi bel ai bang cio lo. An mah le thil ti khawh ning cio in pasal ttha tiah rak ti an si.
Chan ai let lengmang i michuak sual hi um lengmang a si, vawleicung a sang cem mi pa cu, a tthang rih tisi, mipi nih zoh duh cem mi movie hna cu a si kho lo tuk mi computer in tuah chom mi pawl khi an si ti si, chim duhmi cu ningcang timi hi minung nih kan upat kho ti lo. A ningcang lo ning in a rak um mi, a rak cawlcang mi pawl kha uar le hlawrh an si cang.
Tuchan ah pasal ttha si khawhnak hi phun tampi a um cang. Laimi nih pasal ttha kan timi hna cu sakap tam, mi ukbawi le mifimthiam le thilttha tuah lei in mifel le thawng hna khi an si deuh tlangpi hna.
Sihmanhsehlaw tuchan ah cun pasal ttha na si khawhnak ding pakhat cu facebook in a si. Facebook pasal ttha si ve hi a nuam hnga maw, siloah a hlawk hnga maw, siloah lungchung ah teh i lunghmuih a si hnga maw timi bel cu facebook pasal ttha na si hnu lawng ah na theih ding mi an si.
Facebook Pasal ttha hna nih an tuah mi
Facebook pasal ttha si ai zuam mi tampi nih cun facebook ah cabia tampi an post, mi nih uarbik ding mi a si khawhnakhnga, cun a taktak in a lengah a cawlcang mi hna kha facebook ah a si khawh chung in an soi ve hna, facebook an tthu kho peng, cu bu cun Thlarau ah pacem bang in an um rih. Mi dang hmanthlak le cabia post i kha an like deuh peng fawn.
Facebook pasal ttha si khawhnak dingah an tuah rih mi hna cu friend tampi ngeih an i zuam, ca tthattha post khawh an i zuam, an lungthin dihlak an pek (an ruahnak an ttial mi cu midang nih el hna sehlaw biatak in an thinhung kho),an i manh caan poh ah Bible rel nakin facebook an bik tam deuh, cun a hleice in an ih lai hrimhrim ah cun pelh lo tein facebook an bik ta, cun a lengah an ton mi an chim ngam ttunglo mi cu facebook ah an chim (tch. a nupi a fel lo deuh a si ahcun "mi thathu caah damnak sii a um lo" ti phun khin an post lai), an i ruahchan mi cu Like a si caah, Like an hmuh tlawm zaan cu an ihhmu a tthaw lo. An huat deuh mi thil a um cun facebook ah mifimbia ttha ttha an ttial tawn. Mi theih deuh lo mi post khawhnak dingah an fimthiamnak dih lak an chuah. Cu lawnghlah innchungkhar zong nih ruahtthiam an si. Mi bia el deuh zawng in comment thiam a biapi taktak, cun share zong a herh ve tthiam.
Facebook pasal ttha si khawh nak dingah na tuah awk phun tampi lak ah facebook pasal ttha hna nih an tuah mi le an umtuning langhter mi hna kha rak tuah ve hna law hmaikum hrawng ah cun facebook ah cun pasal ttha na si ve ko lai.
Na lungtlin cun rak Share law a tlin lo zong le na ruahnak rak Comment ve
Ka Fale ruangah Pathian sin thlacam lo in ka um kho hrim lo
Nu le pa dirhmun hin zeitluk in dah fale cung ah dawtnak an ngeih timi cu chimhau lo a si. A sangbik tiang in fale cu nu le pa nih dawt a si. Asinain a cheukhat ve nih cun laikeng fahrin in an hrin ve hna i an kal tak men hna, an hlonh men hna.
Tutan ah pa le dirhmun in mipakhat nih a rak ka chim bal mi van in hrawmh ve hna ka duh, cun pa le a si mi van in zuamter hna ka duh. Aho dah pakhatnak timi bel cu nanmah tein nan rak i tuak nak lai kan nawl duh hna. Fa a ngei cang mi Pa nih an theih ve nakhnga Share in ka bawm ve ding ah kan nawl duh rih.
A chim mi cu "Pa ka si nakin ka fale cung ah dawtnak a sungtuk mi ka ngei ko, asinain cu ka dawtnak nih cun ka lung a ka fah ter tawn, a chan cu ka fale caah zeizong tikho Pa ka si lo ruang ah a si" tiah a biahmaitthi dih hnu ah a ka chimh. Nu le pa nih hin fale hi dawt zia kan thiamlo, kan dawttuk ko hna nain an hrang ah thilttha kan tuah khawh taktak lo zia hi kan i thei tawn lo. Cu nih cun kan fale caah lam tthalo kal tertu zong an si tawn ko rua tiah ka ruah caan a um.
Voitampi cu nu le pa dirhmun in fale nunchimh hi kan tuah tawn. Asinain an lungthin mer kho tu taktak kan si lo zia kan i theih tawn lo, ka bia na ngai lo ti le chimh mi na duh lo cu teh..kha ti na um hau ko tihrawng in miti kan hmang. Asinain kei cu khua ka ruat, cutikah hi hi a dik lo mi a si tiah kai fiang. Cutikah zeizong te ka ti kho lo va si kaw, an lungthin ka thleng kho lo va si kaw,
zeizong ti kho Pakhat ka ngei, Pathian a si. Pathian nih cun keimah nak ttha in a cawnpiak khawh hna, thluachuah a pek khawh hna, an caah an herh mi a tuah piak khawh dih hna ti mi ka theihfian tik ah, ka dawt tuk ka fale hna caah Pathian sin an hrang thlacam loin ka um kho hrimhrimlo
tiah a ka chimh. A bia cu dong hlah kaw..kan nu sizung ah um, kei le khua ah ka um lo, ka nu nih kan nu a um pi, cutikah ka fale an vakvai, a hniang u cu nu a si, a pi le pu ( a nu i a nu le pa) sin ah a va um, a u pa u hi pa a si, ka pi le pu sin ah an um ve. Cu thawng theih ni cu ka um khua a nuam kho hrim lo, Khua zaza ka ruat, aw a taktak a si rih lo, "Pathian kai lawm damnak na kan pek" tiah thla ka cam. Zaankhat mitchinh tong sihlaw kan fale cu a tu bantuk tein hi maw an rak i tthek hnga timi ka ruah tikah zeizong tikho kan nunnak a kan zuahtu Pathian sin ah lawmhnak bia chim lo le thlacam lo in ka um kho hrim lo tiah a ka chimh cu,,,ka lungthin mithli a tla. Aw...hawi hi an va puitling lawmmam ve. Nu le pa dirhmun ka dir tik cu amah bang um khawh kai zuam lai ti hi ka thlacam a si.
Tuchan ka pale tampi dirhmun zoh tik ah an tei deuh rua hna ka ti. Kan fale ngakttah an si kho timi khi kan ruat bal thenglo, cu tik ah kan daithlang tawn. A nih cu hi a ruahnak nih a thlarau nun a tthawnter phah dah kaw. Fale nunnuamh nakhnga chawva tampi kawl piak a ttha, asinain ngahttah an si lo nak ding ah nun i remh, zuuding mi nih din ti lo tibantuk le ngandamnak kong ruat buin le zeizong tikho Pathian kut ah a um mi kan si bang Amah ttihzah buin khuasak cu a biapi deuh hringhrang lo maw. Nu le pa hna hi pa nihhin an zuam (chanllenge) hna hi. Nang na fale caah na thazang maw nai rinh lai, Pathian tthawnnak dah nai bochan deuh lai?
Nang le kei kan i pehtlaihnak hi a thuk in a san chin lengmang nakhnga Dawtnak lawng hi a kan ttemtu siseh ti ka duh.
Mitampi nunnak kan zoh tikah an i dawtnak a ttemtu cu Dawtnak si loin, hi vawlei chawhlawn le dawhnak hna hi an si tawn. Cu hna pawl nih cun an i tthennak ni hngak in an nun an hmang ve. Cu caah Dawt nang le kei bel cu hna bantuk si cu ka duh lo. Cucaah kan i dawtnak hri fehtertu ding ah kai thim mi cu Dawtnak a si. Kan dawtnak bik cu na ka dawt ve caah a si.
Cucaah na ka dawtnak a ruang cu kan dawt caah hin si ve sehlaw...kan i dawtnak a thuk chinchin lai i, hohmanh nih phur khawh lo a si hnga.
Sihmanhsehlaw, chawva le dawhnak le sinak ruang men ah na ka dawt a si ah cun, ka mui a chiat ni le chawva ka ngeih lo ni cu ka lungkuai ni a si sual lai ti ka phang.
Mitampi cu chungkhat unau nih an kuat khawh hna hi phaisa tampi he an caan anhamng, sihmanhsehlaw kei cu mah tein ai zuam i nun a pai tu ka si, hnu lei in dirkamhtu ttha ka ngei ve lo. Cu te cu rak ka theihthiam piak law ti hi ka duh taktak....Mah hi ca hi messenger in kuat kan duh ko nain ka tlinh lo, caah hi blog ah ka rak ttial nak hi a si.
Christmas ah cun kai dawh nain kum thar ah a tlau dih
Ai daw tuk mi ngaknu le tlangval hna nih a tak in an ton mi tuanbia a tawinak in ttial khawh kai zuam lai, cucaah ttha tein rak rel ve.
A hleicein nungak pawl nih an rel khawh i an i ralrin thiam nakhnga Share in rak ka bawm ve.
Christmas khua caan cu milung a hlau ter i duhdawtnak mi a van ter ngaingai. Mino tampi nun ah a luang mi cu midang uar duhnak a si. Hi lio caan ahhin ai uar mi zong tam khun a si. Cu bangin thlaici tthalo tuh caan zong ah mitampi nih cun an hman ve.
Voikhat cu nungakno le duhnung te pakhat a um ve. A puitlin pah ve cang tikah Christmas khuacaan nih a tlak ve ai. Minung nih kan duh mi cu a ttha mi le aidawh mi hi an si. Tlangval no te pakhat nih cun mit sir in a rak ngiat peng ve tikah nungaknu te zong cu a um kho ve ti lo.
Christmas nikhua cang cu duh a nung, lung a hliphlau tikah an pahnih karlak ah a um mi dawtnak cu a tthang chim lengmang i a hram bel thuk ah thla loin a darh in ai darh. Sihmanhsehlaw a leng i a langh ning ah cun a kung a ttha i a bawrh taktak mi thinkung a si. Asinain ruah lo ah thlanglei Indian Ocean ah khuadawm um ning a hman lo in Laitlang zong ah thli le ruah biatak tein a sur tikah cu thinkung dawh taktak le bawrh ttha taktak pi nih cun a tuar kho ti lo. A ruang cu a hram thuk ah a thla lo in a darh in ai darh caah a si.
A no tuk mi le duh a nung tuk mi ngaknu te cu a tlangval zuun ah a uai sual ai, amawh ve bak lo, zeicahtiah duhnak cu a mit caw an ti bang a si taktak ko. January thla phanh cun lung len ning ai dang khun, zeicahtiah ai daw mi hna tampi cu dinh caan la in an caan a dih i, mah le rian cio dawmh ding in hmun dang ka dang ah an kal tawn hna. Sihmahsehlaw Christmas lio ah a rak i dawhtuk mi ngaknu te cu inn leng hmanh a chuak ngam huaha ti lo. A tlangval pa nih le a phone call zong a tlai duh ti lo i message a kuat mi zong a let ngam ti lo. Pathian nih fale cu ka laksawng sungbik an si tiah a ti. Sihmanhsehlaw mi nunnem ngaknu te nih cun Pathian laksawng sungbik a co mi cu hi vawlei hmanh chuak tak duhnak tiang lungthin a ngeih tertu ah cang ai. Cuti cun a nun cu ning a zak i, lungfahnak in akhat.
Mah hi ngaknu te nun ka zoh tikah zangfah za a si ko. Amah lawng a si lo, midang tampi an um. "Christmas ah cun ai dawh i kum thar ah cun a muichia or a ning zak" mi ngaknu te nih hin amah hlan ah hibantuk thilcang mi hi a theih bal ko. Asinain ai ral ring kho hrim lo maw, a ruah awk zong ah dah a theih ti hnga lo timi hi biahalnak hnubik cu a si. Ka nun a chiat le a tthat hi kan kut ah a um mi a si.
Bia ka khat a biapit zia cu chim tam hau lo in kan theih dikmi a si ko. Sihmanhsehlaw mitampi nih upa hna le bawi hna hmai ahcun biachim kan i ralring ngaingai.
Sii.. a tthalo ka tinak a si lo, a ttha tuk a sinain kan ngamh tlak mi hna, kan naihniam mi hna sin tu ah cun kan awka a hrang ngai tawn. Mah hi hi kan i ralrin taktak a hau tawn. Zeicahtiah kan i rauh lo in kan dawtmi hna, a kan dawtu lungthin kan rak khenh tawn.
A caan zohthiam a biapi ngaingai. Ka dawt tuk i pei mihmai zong ah ka chimh ngam cu tiin an chim tawn na theih ve men lai. Mah khakha a palh taktak mi hrokhrol a si. Kan dawtmi hna sin ah kan chim lo ding hi phun tampi a um ko. Cu hna lak ah cun a caan he pehtlaiin kan dawtmi hna sin ah kan chim lo ding mi phun 3 in a tanglei ah ka van langhter.
1. Biahrang in zeibia hmanh chim hlah
Na thinhun lio caan ah maw, asiloah a palh tuk lio caan ah maw, thinhan lung in biahrang hrimhrim in biachimh lo ding. A thinhan lio si le a ka ti le si timi kha a theih ko nain, a voitam cun nan i pehtlaihnak hrawktu ah a cang te lai. Na thinhan tuk a si ah cun biachim lo in a hrial in hrial khawh i zuam deuh.
2. Mihmai ah faknak bia chim hlah
Hi ti tikah a um lio ah faktuk in biachim piak hmang hlah. Na uartuk, a feltuk le a za tuk in na hmuh zong ah mihmaiah na bia nih faktuk hlahseh, zeicahtiah a hawile nih an theih lai i, cu an theih kha a theih ve te lai, minung cu palh kho tawn kan si bang, a hawile hmai ah ai palh sual ah cun a lung tein a ning zak tuk sual lai. Cucaah a fak zia kha thiam deuh ah a ttha.
3. Thazang pe
Ka nu le ka pa, ka u (a hopoh) nih hin a ka dawttuk ti mi ai theih lai. Asinain voikhat hnih cu na hmai bak ah a palh caan a um lai, cu tikah na lung a fah tuk ko zong ah thinhan in a mah sik nak in aw hi cu..tiin a biapit nak tu kha chim deuh law, a nih caah a za tuk. Mah kha na chimh rualrual in a mah tein ai chir tuk lai. Hmailei ah ai ralring lai. Mah cucu thazang pek dan phun khat cu a si. A palh zia ai theih tuk ko bu zong ah na sik le na hro ah cun caan rauh hlan ah mi ttha lo ah ai chuah kho.
Hi pathum hna hi sisehlaw, a dang tampi an um ko, cu hna lak ah cun a biapi deuh ah ruat in ka van i thim mi hna an si. Kan dawtmi hna nih hin midang ai kan i sik le biahrang in kan i chawnh hi hmu hna hlah sehlaw a ttha bik mi pakhat cu a si ve.
Phaizawng par hna nih na zuunngaih an zual ter khun
Dawt he kan rak len tawnnak lam tluan cung ah ai dawhtuk mi phaizawng par hna kha cu an rak i dawh khun hrim ko rua.
Phaizawng nih an par tthan cang, na zun a thar tthan hawi...Dawt na umnak hmun tal khin na rak ngai ve hnga maw? Phaizawng par tang ah nang he len lio te kha mitthlam lawngah cuang cang hna mu. Dawtnak bia phai in kan tthut tti tawn nak kha an hmun rih ko ee Dawt...Online lawng hi maw kan i tonnak hmun si ko lai. Dawt zumhtlak tein tiah kan biakam kha fek tein i tlaih peng ve ve sih mu. Kan ngai tuk ee....
Caan nih a sau lunglen a zual khun, lengdang he na merem sual lai ti ka phang. Lung hna a ngam kho lo. Kei cu kan biakam bang zumhtlak tein kan hngah peng ko lai. Na rak tlun tik ni cuan in nifatin ka caan ka hmang ee..Kai ruahchannak le ka thazang um ek cu nangmah na si. Ka lungthin nih an hlam zungzal ee...Pakhat le pakhat i hmuhthiamnak he tontthan nak caan Cung Zingnu nih kan ser piak hram sehlaw...tihi ka thlacamnak a si.
December thla cu ka caah a nuam kho ti lo ee..Dawt, na um lo hnu cun ka nun hi a hul taktak ko ee....
Kan ngaihnak hmual nih a fak chin rih lai mu...tonntthan caan hngak in....na dawt...
Christmas caan ah minung tampi hna nih an duh mi le an cawk cem mi thil tampi lak ah phun 4 tein langhter ka duh.
Hi phun 4 hna hi Laimi dirhmun in zoh tik zong ah Xmas caan ah mizapi nih an hman mi an si ve hna. Kan mah le sining cio i tuak hna u sih. Hi phun 4 langhter mi chung ah hin na hman ai tel ve maw? Mah hi a mancem mi phun 4 hna hi research tuahnak in theih mi a si lo, mipi umtuning zoh tikah a lang ngai mi hna an si.
Negative lei in langhter a si lai. X'mas lio caan mipi ziaza ah a lang mi cu nun duhnung lo taktak cu vawlei sining in i lawmhnak kan kawl mi hi a si. Kan i lawmhnak hi a nikhua caan le laksawng tbk..ruang men ah a rak si. Cu tikah zeidah kan tuah tawn. Kan lung nih a duh mi thil tampi kan tuah hna. Micheu nih X'mas biakinn ttemhmawihnak ding ah tiin phaisa tampi an thawh, a ttha lo ka ti lo, asinain khrihfabu nih zeitluk in dah thlarau tlau lei ah a lung a mer timi zoh tikah biakinn ttemhnak ah a lu a mer deuh mi a lo. Mah thil hi vawlei cung hmun kip ah a cang mi thil a si. Zuar khawh cem mi hna cu
1. Zuu (alcohol ai tel mi)
2. Thilpuan
3. Wine
4. Beer
Phaisa kan i khon i X'mas caan hmanawk ah kan ti. India ram ah Hindu buai Diwali lio nakin Khrihfa buai X'mas caan ah wine a man deuh ti si. Cu bantuk in kan Laitlang sining zoh ve tikah X'mas caan ah zuu a man cem ti khawh a si, zeicahtiah zuuri mi pei an karh deuh cu. A pahnihnak ah thilthuam a si. Kan thilthuam zoh ah cun minung ngai kan lo cio hna. A pathumnak ah wine, a pali nak ah beer hna an si.
Zuu ding pa nih zuu ai cawk ve, a ding lo mifel pa nih wine le beer i cawk cio a si. Hi kong hi ttha tein dothlatnak tuah sihlaw a dik bak mi a si ko lai, cucaah dothlat lo ah a ttha, thang a chia, hi ti vialtu hin dih ko seh.
Zumtu aitimi tampi nih X'mas caan kan hman ning cu hi hi a si ko. Nangmah pumpak ah hi bantuk na si lo ding a biapi taktak cang. X'mas caah cun kan phaisa thawh a fawituk, asinain thlarau tlau kawlnak ding caah cun kan i harh tuk mi zong hi i ruah taktak awk kan si cang.
India ram ttheu hi la rih sih, India ram Khrihfabu pakhat nih X'mas thla biakinn ttemhmawihnak ding ah Rs. 1,500,000 leng an hman ti si, asinain cu hna Khrihfabu ah cun inn ngei lo mi chungkhar le nuhmui/pahmui an um ngai ti a si.
Nu le pa nih fale chimhhrin hlan ah tuah hmasa ding a um, cu hna lak ahcun tlawmpal in langhter kai zuam lai.
Nu le pa nihhin fale hi chimhhrinnak nawl kan ngei ko, asinain kan chinhhrinnak bia an ngaih duh nak hnga an lungthin ruahnak lak hmasa, ngeih hmasa a hau ve. Na tuah awk si ti hrawng in ti phung a si lo. Fale nih ka nu cu, ka pa cu tiin an upatmi kan si hmasa a hau. An kan upat lo tik ah an duh poh in an um tinak cu a si thlu lo, asinain an lung ah kan chimhhrinnak bia nih caan sau hmun a luah kho tawn lo, an hawile nih cucu ti hna sih an ti cun...an va tuah colh taktak ko, a chan cu tuah hlah aw, a tthalo kan timi nih khan an lungthin a la kho lo. Cucaah an lungthin taktak in kan bia an ngaih nakhnga tuah hmasa ding tampi a um. Tch.,An sin ah caan hman tam, an duh mi tuah piak hmasa, an caah thil tthalo a simi ttha tein lunglut tiang in chim fian piak..tbk...
An sin i caan kan hman tam tikah thiltampi kan sin in cawnmi an ngei, cun thilttha tampi kan cawnpiak khawh hna. Cu lawng hlah an kan tlaihchan deuh. An sin um tam rualrual in hna an hnawhnak le thildang tampi tuar hau mi a um ve. An duh ning poh in rian fial hna an hmang tawn, asinain tuah awk ttha mi cu tuah piak ding an si. Cucaah nangmah nih khan kha..cu ka cun kan leng hna lai, cucu kan tuah hna lai, cucu kan caw cang hna lai tbk...in an lunglawmhnak ding kha tuah piak khawh chung in tuah piak ding(tuah piak tikah an ca hrangah a ttha mi lawng), cu tuah piak pah cun...nun chimhhrin pah, an thiam lo mi cawn piak pah an hau. Bia an ngaih lo tuk tikah khakha kan tuah piak ti lai lo tibantuk in thintawi in um lo ding, lungsau tein hngak ko ding. Tuah ter na duh lo mi maw, a ca hrangah a ttha lo mi na fa nih a tuah ahcun, ttihnung deuh a si cun va zuan hnawh i cawi colh ding, asinain a ca hrang ah a ttha lo a sinain ttihnung(a hliam kho tu, fahnak a pe colh khotu) asilo ah cun a lemtu in lem i, a dang a duh ding mi in lemsawi ve ah a ttha, tuah hlah kan ti vu....tiin a hro in na hro ahcun, a ttap lai i...an ngamh set ti lai lo, a hnu cun na fa lungthin na hran ter sawhsawh men khi a si.
An cahrang ah a ttha mi in an lung na lawmhter hna hnu ah cun ka pa, nu nihhin a ka dawt tuk timi ai fiang lai, cu tikah midang chimh mi hmanh a ngai tuk theng lai lo...khat lei ah cun a buainak um tawn,asinain hngakchia cu an i khat cio lo, micheu fa cu bia an ngai i an i lawm kho peng. Micheu fa cu a nu le pa chimh mi lawng biapi ah a ruat mi an um ve hawi...asinain an ttha in mi lak zong ah chimh ngai mi an si deuh ko. An lung na lawmhter tam tik ah an feeling a sang, cu tikah an thin han caan ah a hang taktak, an i lawmh caan ah an i lawm kho ve taktak.. Cu tikah bia chimh tik zong ah thin i hanter ta i chimh len hau ti lo in, mithmai pek bu tein na chim mi kha na fa nih nai biatak zia a rak hmuh i a lungthin ah fei chunh bang in a chunh.
Cucaah kan bia an ngaih duhnak lai, an lunglawmh ter hmasa i kan dawt hna zia biatak tein an i fian hmasa a hau. Upa zong nih kan dawt mi.hna cu an bia el kan siang hna lo, cubantuk in hngakchia zong an si ve...
