Khrihfabu chung hruaitu hna

Khrihfabu chung hruaitu
Khrihfabu chung hruaitu kong kan chim hlan ah zeibantuk hruaitu poahpoah an biapit ning kan zoh hmasa ka duh.

Hruaitu țha lo nih cun ram le miphun a hrawh dih hlei ah a thang a chiat ter, miphun dirhmun a hrawh nak cu kum tampi hnu lawngah remh khawh țhan a si nain miphun thang a chiat nak cu vulei a hmun chung cu a cam peng remh țhan khawh a si lo. A theitlai țha lo mi cu tefa hrang a khaat in a kha. Cu bantuk in hruiatu țha nih cun ram le miphun a cawisan, miphun thang a țhat ter i Pathian cung zongah thil țha a tuah dongh ti nei loin thangțhat upat nak pek an si. Hi bantuk in miphun hruai tu lawng siloin kan innchungkhar, Khrihfabu le i hawi komhnak (fellowship) cio ah a si ve.

Hruaitu hi a biapi tuk mi an si caah, mipi zong nih duhduh in hruaitu hi thim ding a si lo, țih a nung tuk. Țha tein ruaah hnu laawngah hruaitu ah thim ding a si. Cun mipi a nawl kan zulh lo dingah cun hruaitu thim lo ding a si, Moses kha a hruaimi Israel pawl nih a bia an ngai lo i a thinhung in lungpi nawlpek i ti chuah ter ding kha a tuk in a tuk caah Pathian a thing hung i Canan ram luh a sianh lo kha. Mipi nih a kan hruaitu kan țih lo i an bia kaan ngaih duh lo ahcun hruaitu hrang zongah thil țha lo a chuak kho, cu lawng hlah e mipi cung zongaah Pathian thinhun nak a tlung kho ve. A tu i a kan hruaitu hi țih zah hna uh, zei cahtiah Pathian theihpinak tel loin a ho hmanh hruaitu aan si. Cucaah kaan țih zaah hna aah cun Pthiaan kan țih zah a si. Hruaitu nih hin kan cungah Pathiaan thinhun nak an tlun ter khawh ti hi mipi nih theih u sih. Mipi nih hruaitu țih zah ding tihi kan țiaal duh mi a si lo ruangah kan țial duh mi lei ah kal rih u sih law..

Khrihfabu hruaitu nih a theih awk cu a țuan rian hi a sawh sawh a si lo, hi vuleicung cozah rian bantuk a si lo ti hi a si. Hi ka zawn ah Khrihfabu hruaitu ti naak in rianțuan tu ti sihlaw a țha deuh lai. Zeicahtiah hruaitu kan ti tik ah mitampi nih hri in hruai ding ah kan rel rua kan nunnak in, tuahsernak in an hmai ah kal in laam hmuh sak ding kan si, mi cheu cu a țuan lei kam cu kan huam lo i bawi bantuk in nawl ngeih lawng kan duh. Cu caah Khrihfabu hruaitu ti lo in Khrihfabu rian țuan tu ti usih law a țuan in kan țuan deuh sual mal hmanh maw. Paul nih Timote sin a ca kuat ah a țial mi Khrihfabu rian țuan tu nih a si awk le a ziaza neih awk a ti mi van zoh ta rih u sih...
Mi pakhatkhat cu Khrihfabu hruaitu si a duh ah cun rian țha ngai a duh a si, timi bia hi ahmaanmi a si. Khrihfabu hruaitu cu soisel awk um lo mi, nupi pakhat lawng a ngeimi, zurit hmang lo mi, mah le mah ai uk kho mi, ning cang tein khua a sa mi, khual tlung a da2 mi, cawnpiak a thiam mi a si lai. Zurit hmangmi a si lai lo, mi tlokciar a si lai lo, milungnem le daihnak duh mi a si, tangka mitthi mi a si lai lo. A innchungkhar țha tein a zoh khenh khomi a si lai i a fale nih a nawl an ngaihmi le an upat mi a si lai. Mah innchungkhar hmanh țha tein a zoh khenh khawh lo ah cun zeitindah Pathian Khrihfabu cu a zohkhenh khawh lai? Khrihfa a cannak a naimi a si lai lo, zei cahtiah a hnar a puar sual lai i Khuachia sualphawt a si bantuk khaan sual phawt a si ve sual lai. Khrihfabu lengah a um mi nih an țih zah mi a si lai, cu bantuk mi a si lo ah cun aa thang a chia lai i Satan rap ah aa foih sual lai (1Timote 3:1-7). Fian ter deuh zong hau lo a fiangtuk cia mi a si ko. An nupi le tiangin micongawih hmang lo mi an si a hau mi țha an si a hau. Khrihfabu hruaitu cu a menmen a si lo ruang ah Pathian sin ah thlacam nak he mah le mah i aap peng ding a si.