Tukforhnak na tei kho maw?
Tukforhnak hi a phunphun in a ra tawn. Cucu thil herh lo mi tuah ringring nak hin a si tawn. Cu sual chungin chuah awk ah na buaibal maw? Zeibantuk talbuainak na neih zangah nang mah lawng na si lo kha philh hrimhrim hlah.
Minung vualte nih hin kan nu pumchung in kan chuah in kan mah nawl in um le thil tuah hi kan duh cio. Ziecahtiah kan chuah hlan in misual kan si. Cucaahcun tukforhnak in kan chuah khawhnak lam um chun cu Pathian fapa Jesuh Khroh lawng hi a si. Kan mah tein kan tuah khawh mi a si lo. Khrih cu na sual man pe ding in Cross ah a thi. Amah chungah nunnak thar le Thlarau thar na nei(2korin5:17). Na chung i um Thlarau Thianghlim nih cun bia ngaih nun nei ding in an tuah khawh ko, asinain sual in chuah dingah cun biatak tein țan na lak a herh țhiamțhiam.
Tukfirh na si tik ah zeidah na tuah tawn? cu ral rak do ildingin nang mah lawng cun a si kho lo ti hi na theih awk biapi tuk mi a si. Kan ral Satan cu mi tlukter, tukforh lawng hi a rian a si ko. Pathian nih na zumhnak a caah, țhawn deuh nak hnga tukforh na si hi a sian ko, a sinain Amah nih cun mi a tukforh bal lo. Jeim 1:13-14 "Cu bantuk hneksaknak kha mi nih an in tikah, “Tukforhnak hi Pathian sinin a ra,” an ti awk a si lo; zeicahtiah Pathian cu ṭhat lonak nih a tukforh kho lo i amah zong nih ahohmanh a tukforh bal hna lo. " "Sihmanhsehlaw mi nih tukforhnak kan in cu, kan duhnak a ṭha lomi nih khan a kan pialpi i rap ah a kan foih caah a si tawn. ".
Sualchungin chuah ding hi nang mah țuanvo a si, cucu Pathian nih an ngaihsak lo tinak a si lo.Jesuh u sualsal in kan luat nak hnga a thi. Bawip Jisuh nih cun a hnu zul in luatnak le teinak nun nei ding an duh (Heb.4:15-16). Cu ruangah pei 1 Korin 10:13 ah "Tukforhnak nan cung i a tlungmi hi midang zong nih an in cio tawnmi an si ko. Pathian nih a biakamnak cu a zulh ko lai i nan in khawh leng tiangin tukforhnak cu nan cungah a tlunter lai lo. Tukforhnak nan in tikah in khawhnak thazang an pek hna lai i chuah khawhnak lam zong an serpiak hna lai" tiah a ti cu. Na tuar khawh lo tiangin Pathian nih na cungah tukforhnak a tlunter lai lo. Na tuar khawh lo i na chuah khawh lo ahcun nang mah cakhiar nak tampiin na um rih ti hi i theih peng. zumhnak ka dir sau kho lo na ti ahcun na piantharnak țha tein zoh țhan. Na thluak men in piangthar na si ahcun na dir sau kho lau lo. Pianthar ti mi cu nun thlen a si, na nunnak nai thlen taktak ahcun zumhnak ah na dir sau kho lai i, Bawipa duhnak tuah hi a nuam na ti cem mi a si lai, leicung thil nih na nunnak cungah nawl a nei kho ti lai lo.
Tukforhnak na ton tikah Bawipa cu na thinlung muril taktak in bawmh na hal maw? A siloah nang mah cahnak in dah tukforhnak cu na rak doh? Teinak nun nei loin, thinlung nuam loin na um peng awk a si lo. Tukforhnak na ton tik ah Pathian sinah Amah lam hal ko, nangmah lam kha va hal hrimhrim hlah, na lam cu dongh nei lo buaibai nak a si sual lai. Pathian Bia ngai bu tein na hal ahcun an pek ko lai,Anih nih cun zeitik hmanhah an tlukter lai lo. Amen. Sola scriptura
