Mipi hmuhning bantuk in a dik mi
Thiatira Khrihfabu i sualnak nganbik cu an lak ah sual i theihter lonak hi a si. Sual kha sual a si ti loin a thei lo bantuk in um kha a si. An lak ah taksacakhiar nak ah i pe ding in le milem hmai i chanh mi ei forhfialnak Zezebel cawnpiaknak bantuk a si mi cawnpiak nak țha lo a cawn piak tu a um nain an dawn lo i Jesuh Khrih nih ralrinnak a pek. Sual i theihter lonak hi tuchan leicung zongah langhngan in hmuh khawh a si. Tuchan ahcun sual hi Pathian Biatak nih a chim ning bantuk in chim rel le ruah a si ti lo. Cu nakin mipi ruahnak biapi ah ruat in a sual le sual lo biaceih a si deuh. Mipakhat nih a tuah mi a thian le thian lo kongah, mitampi nih cohlan mi a si maw, si lo timi cungah ai țhum cang. Hihi Laimi Pathian theitu miphun ai timi zong nih kan hman ngai ve mi a si cang.
Mipi hmuhning bantukin a dik timi hi tuchan ah hman a si i, a chan minung nih an cohlan le cohlan lo hi a biapi mi a si cang. Pa le pa, nu le nu i țhitumh(homosexuality) hna hi tulio ah a taktakin kan hmuh mi tahchunhnak ah hman khawh mi a si. Hihi a hlan ahcun sualropui ah ruah le rak dohkalh a si nain a tu ahcun a dik ah ruah a si lawng hmanh si loin hi bantuk a tuah mi pawl kha lawmman pek le thapek an si cang. Ramkhel riantlai tu cheukhat nihcun hi hna pawl sinin vote la tahrat in, an mah thim tlin an si tik ah hi bantuk sual tuah pawl kha dirhmun sangah a chia tu an um.
A thiang in dirh mi chungkhar hi hlan ahcun rak uar le upatnak pek a rak si. A tu ahcun hi zonghi a herh lemlo ah ruah a si cang hawi i phun dangdang in thlen le mer a si cang. A theipar cu țihnung tuk mi a si. Dan ningin nupi, pasal nei loin nupa sualnak tuah hna hi thil umtuning pakhat men ah ruah a si cang. Kan miphun tampi cu ramțha kan ti mi ah kal in michiatnak bik kan vai cawn, Bible nih a huat mi pawl, tuah lo ding a ti mi pawl cu Bible zumtu ai ti mi pawl nih tuah khawh ve hi kan duhtuk i kan i zuam lehlam. Amak ko ka ti, Bible cu an thei lo tuk lawmman i zangfak tuk an si. Lot nih cun minung mit hmangin Sodom khua le ram ai thim bantuk in Laimi nih hin Somdom khua le ram kan i thim cu a si ve cang ko teh aw. Sodom khua cu hrem a si i a chung minung an luat lo bantuk in kan cungah a si kho lai lo ti chim ngam tu kan um bak ti lo. Kan khuasak ning hi țih a nung tuk cang hi aw, kan lungfim in kan i chir i kan rim lo ahcun kan tuh mi hi kan zun cawk te lai lo.
Pasal neilo nu nih naupawi in fathlak zonghi zei ah kan rel lo, a phung si ko tiin thazang kan la rih hawi. Hihi sualnak țihnung tuk mi a si zia hi zei ah kan rel lo, kan ning zong a zak fawn lo. Khualak i Bible ken hmanh kan ning a zak țung. Kan sining hi ai linglet. Innchungkhar ah nupi, pasal țuan vo zong hi ai linglet dih cang. Ruahnak zong kan i thleng dih cang. Nuva i țhen zong hi thil pawi ah ruah a si ti lo, hngakchia inn te tiam kan lo. Zuudin le sa ei zong hi sual ah kan ruat lo ngandamnak si kan ti cang. Paul nih Timimothy sin ah na pawfah damnak caah rak ding tiah a ti ko kan ti rih hawi, Paul cu sual kan puh rih hawi ai, țih kan nung ko. Kha lio chan ah sii hrang i tuah mi le zuu ritnak ca i tuah mi tiin phun hnih in a um. Cu ahcun Paul nih cun sii hrang i tuah mi kha a chim duh mi a si deuh. Khuatlang siningin hawih in kan neihmi ruahnak lawngte an si. Zumtu kan tahfung Bible Pathian Biatak hi tahfung țhabik umchun a si. Mipi vamtlang nun sawhsawh hi kan tahfung a si awk a si lo. Zum lo tu nih an tuah mi nih khan kan thinlung tei hlahseh. Bible hi Pathian Biatak a si ti a zumtu taktak nihcun Bible cawnpiak ning bantuk in a nung lai. Bible theilotu le ngaisang lo tu pawl nihcun minung thluak ruahnak cungah i țhum in a nung ve ko lai. Hi bantuk minung thluak ruahnak cungah ai țhum mi pawl hi tuchan ah cun an tam i an țhawngțha ko. Hi bantuk ruahnak kengtu pawl nihcun an hrangah a țha an timi pohpoh cu an tuah thluahmah ko, an peh rih ko lai.
Tuchan kan hruaitu tampi nihcun Bible hi zeiah an rel lo tikah nuncan țha lo tampi a karh chinlengmang. Sihmanhsehlaw Pathian mithmuh ahcun sual cu sual a si camcin ko lai. Sual hi zeibantuk muisam keng zong sihmanhsehlaw sual a si zungzal ko. Cucaah cun kan i ralrin taktak a hau. Mitampi nih sual an ti lo mi a si zongah Bible nih sual a ti mi a si ahcun sual a si zungzal ko. Cucaah tuah lo dingin i ralrin tak kan hau, mitampi nih an tuah ve ko țung tiin luat nak lam kan hawl kho hlei lai lo. Ka nolhțhan rih lai i ralring ko hna usih. Cu lo ahcun Pathian hmai ah thilsual tuah tu kan si. Kan miphun chungah, kan Khrihfabu chungah hi bantuk in a duhduh i a um mi kan um ahcun Thiatira Khrihfabu bantuk in a sual mi miphun, Khrihfabu le pumpak kan si ko lai. Pathian nih a fale pawl kan zulh hngading mi a kan pek dih ko. Cucu tangdor te le Amah țihzah bu tein zul in a nung ding mi kan si. Cu lawngah kan nungning in Pathian kan lawmhter khawh lai. Kiangkap mipi nih an cohlan le cohlan lo hi a biapi mi a si lo, Pathian Biatak nih a kan cawnpiak mi a si maw, si lo ti lawng hi a biapi mi a si.
