Kan ram zumtu nih kan theih herh tuk mi pahnih
Zumtu nih theih hrimhrim aherh mi tampi kan nei. Cu hna lak ah nifatin kan nunnak i kan thladah tukmi pakhat le kan uar tuk i sualnak lei ah kan mer mi pakhat a tawi khawhchungrawi le fiang in kan zoh lai. An pahnih in kan theih ți lo ahcun mi kan sualpi mi, kan theih ahcun kan țhatnak, dinfelnak hrampi asi. Kan ram zumtu tampi nih pakhat lawng kan theih i kan i nuam ngai, cucaah kan nunnak ah dinfelnak a um kho bal lo, kan nunnak ah Pathian ai phuan lonak le a min a sunglawibal fawn lo nak asi.
Pathian țhatnak
Zumtu nihcun Pathian țhatnak hi za ah za kan theih awk hrimhrim asi. Zeicahtiah Pathian cu kan cungah a țhattuk ruangah. A liamcia kan sining i ruat cio hna usihlaw Pathian țhatzia kan theih deuhdeuh lai. Salm 34:8; 100:5; 107:1; 116:5-16; 118:1; Nahum 1:7 hi Bible cang pawl ahhin Pathian țhatzia tampi an lang. Pathian cu mivialte cungah a țha. Kan cungi a țhattuk ruangah hi dir hmun hi kan phak khawhnak asi. Amh belte Pathian kan cungi a țhat zia lawnghi theih a za lo. A țhatzia lawng kan theih ahcun kalsual le thlahdah sual nak asi. Cucaahcun Pathian țhatzia kan theih bantukin, nahchuak Pathian a si ti hi philh hna hlah usih.
Nahchuak Pathian
Kan chimcia bantukin kan ram zumtu tampi nihcun Pathian țhatzia hi cu chim zong hau tinloin kan theih dih cang mi asi ko. Asinain, apoi mi pakhat cu a nahchuahnak hi kan theih lo nak caan a sau cang. Cucu kan nunnak in theih khawh asi. Pathian țhatnak kan theih tikah lunglawmhnak a chuahter i, A nahchuahnak kan theih tikah nunziaza dik ah, le Aduh ning zulhnak ah a kan hruai. Cucaah Pathian hi nahchuah nei tuk mi a si hi philh hna hlah usih. Bible cang tlawmpal kan tar rih lai.. Deut. 4:24; 5:9; 6:15; 32:16-21, Exodus 20:5; Josuah 24:19; Nahum 1:2, 2kor. 11:2. Pathian cu a țha tuk ti le nahchuak asi ti hi philh hna hlah usih. Pathian cu a ,ha tuk tiin duh paoh in nun ding asi lo, nahchuah nei asi ruangah duh duh in kan nun, kan holh, kan tuah ahcun kan caah țih nung tuk asi. Zeicahtiah a nahchuak tuk. Cu caah hi hna pahnih hi pakht lawng theih awk asi lo.A pahnih tein kan theih tikah theitling kan si cunihcun Pathian hmaiah nunzia dawh in a kan nun ter. Evan Lalenglian (falam) arem ningin leh mi asi.
