Sualforhnak chungin țhanlianhnak
"Sualforhnak ka tonmi hna cu ka thian khawhnak hnga ka saya an si" tiah Martin Luther nih a ti.
Sualforhnak tuar hi thilțha tuahnak caan țha asi. Thlarau nun puitlinnak lamtluan ahcun sualforhnak zonghi tlukrilhnak siloin, chinchiahnak ah a cang tawn, sualforhnak hi thilchia tuahnak ah hmang loin thilțha tuahnak tu ah hmanding a si ti na theih caan ahcun! Sualforhnak ah duhthimnak a um. Sualforhnak cu Sata nih mi a hrawhkhawhnak hriamnam țhacem mi tiin a hman lio ah, Pathian nih cun Thlarau nun i kan țhancho khawnak dingah hman a duh. Sualnak si loin țhatnak ah na thin lungnih ai thim ahcun Khrih lawhnak ah na țhang cuahmah tinak a si.
Kan i fian deuhchin khawh nak hnga Jesuh Khrih tlinnak pawl kan thei a hau. Cucu Thlarau theitlai (Spiritual fruit) asi. Thlarau thritlai hna cu Dawtnak, Lunglawmhnak, Daihnak, Lungsaunak, Zangfahnak, Țhatnak, Zumhawktlak sinak, Toidornak le Mah le mah i tei khawhnak tehna hi an si. Cu bantuk thil hna caahcun nawl zeihmanh a herh ti lo (Gala.5:22-25). Hi hna pakua hi Jesuh Khrih nunzia dawh langhtertu an si. Thlarau theitlai tlai cu Khrih lawhnak asi. Zumlotu cu a chungah Pathian Thlarau aum lo caah Thkarau thei a tlai kho lo. Khrih zumtu pawl lawng nih tlai khawh mi a si. Cu siahcun zeitin na nunnak ah Thkarau thei cu a tlai khawh lai. Hmakhat te ah maw? Ni khat chungah maw? Si hlah. Theitlai cu nikhat hnu nikhat a țhang i a hmin bantuk in a si deuh. Pathian nih na nunnak ah Thlarau theitlai cu a țhan ter, cucu sualforhnak in a khat mi pawngkam chungah nung dingin an chimhnak hi asi. Pathian nih dawtnak a kan cawnpiak tikah kan pawngkamah duhnung lo, huattlai tuk mi a um ter tawn hna. Nangmah an dawtu le duhnung a simi va dawtnak nihcun nunnak ah țhathnemnak a nei lo. Pathian nih lawmhnak taktak cu ngaihchiatnak a phunphun hmangin a kan cawnpiak. Nuamhnak cu a lenglei, pawngkam nungning in kan hmuh khawh, a sinain lawmhnak taktak cu Pathian he kan i pehtlaihnak thawnglawngin kan hmuh. Pathian nih kan chungah daihnak a țhan ter, kan i timhtuahnak ruangah siloin buainak le hnahnawhnak lak tuin a si deuh. Cu bantukin thinsaunak timi zonghi thinhunnak dingin le hngahpeng hau sinak chungin kan cawn khawh mi asi.
Pathian nih airalkah mi hmangin duhthimnak a kan pek. Thilsual tuah dingin tukforh na si hlan ahcun mițha na ti khawh a si rih lo. Lunghrinh (doubt) dingin tukforh na si hlan ahcun zumhawktlak na si ti khawh a si lo. Dinfelnak timicu dingfel lo dingin tukforhnak tei khawhnak in a chuak mi asi. Tangdornak cu mah le mah i faknak, phorhlawtnak lungthin teinak thawngin a țhang mi asi. Hnupil dingin le thintawi dingin tukforhnak na tei khawhnak in Thlarau theitlai tlai khawh a si. Sualforhnak na tei fate Jesuh Khrih na lo deuhdeuh. Rick Warren
