Pathian kan chungkhar cungah na țha tuk hringhran. Nifatin kan dam, kan cawlcang kho, hawinakin kan niam hleilo. Kan rawl kaa a thaw, ih hmucim tein kan i hngilh kho, kan chungkhat unau sin in thawngchia kan theilo, Pathian na kan dawt tuk ruangah asi. Bawipa na min thangțhat sikoseh. Kan inn kiangkap he remdai tein na kan um ter, mițhalo hna kut in na kan luatter, kan herh mi siseh, rawl ei din ding thawhthaw na kan pek, kan i lawm Bawipa na min kan thangțhat ko. Vawlei sining in cun hawineih kan nei kholo nain thangzang na kan pek i kan mah sinak cungah na kan lawmh ter i mi va hngarnak cu kan thinlung uktu a si lo.
Bawipa thluachuah sunglawi fanu, fapa na kan pek i kan i lawm, fapa na kan pekmi Joseph Vansianglianuk cu a chuah in tuchun ni tiang fimthiam nak he na țhan ter i, a tu cu 18,9,2015 in kum thum a tling cang. Kum thum a tlinak chuahcam lunglawmh damnak he na hman ter caah kan i lawm Bawipa. Midang caah thluachuah thluachuah phurtu a si khawh nak hnga thla ka cam. Hmailei a nun lam tluan ah nang lam hmuhsaktu hung si ko sawh. Nu le pa țihzah thiam le Nangmah an țihtu fapa a si nak hnga nun chimtu cu nangmah siko.A nu le pa nih na duh ningin nun kan chimh i kan hruai khawhnak hnga fimnak kan peko. Bawipa kan minung hawi caah cun dawt tlak lo zong kan si ko lai, zei cahtiah minung dawtnak cu a ruang a um mi dawtnak asi, sihmanhsehlaw Bawipa nang cu a ruang a um lomi dawtnak in mi a dawtu na si. Kan cungi na țhatzia theikho dingin lam na kan hruai caah kan i lawm, na thluachuah a rel zia kan thiam khawh nakhnga le na duh ning kan theih khawh chin lengmang nak hnga na fim nak kan pe ko sawh, khamhtu Bawi Khrih min in thla kan cam kan Pathian. Amen.
