Na unau zuar hlah
Jacob fapa a hniangbik pahnihnak Joseph, zaankhat cu mang a manh cu a mang cu a nu le pa, unau pawl cu a chimh hna, cu ri thawkcun a unau pawl nihcun huat hram an thawh. Mifel duhnung asi. Pa dawt ai hlawhtu asi. A u le nih cun an pa mithmuh ah um hlah sehlaw an duh.A u le pawl tuu an cawnghnak ah a pa nawl zul in a va kal i a u le nih cu caan țha kan nei tiin lungrualnak ah an hman. A thah i thah cu mah nau te tiin khur chungin an chuah țhan i sumdawn sin ah tangka 20 in an zuar (Genesis 37:28). Caretu ruat ve hmanh mah nau zuar i fang 20 lawng miak cu ai hlawk lo tuk, țhat hnemnak a um lo.
An nau pa Joseph cu kan zuar cang kan pa mithmai ah a um ti lo tiah an ruat lio ah, Joseph a philh lo tu Pathian nih caan a mer i an zuarmi an nau pa sin ah bawmhhal in kal hrimhrim dingin thilsining cu ai her. An tluk lo ruangah le na hmai ahcun kan kun bal lailo tiah an zuarmi Joseph hmai ah kun in bawmhnak hal awk ahcun an i thawh. Cu dah tilo cu lam dang a um hrimhrim lo, Pathian remruah mi dang hin khawi hmanh ah kan chuak kho hrimhrim lai lo. Pathian nih midangpi va remlo, huat nakin mah unau remlo , huat cu a huattuk mi asi.
Kan nihteh zeizat in dah kan unau kan zuar? Cu nihcun zei miaknak dah a chuahpi..zei hlawknak dah kan hmuh kan nunnak ah sullm nei koin a kan tuah kho ngai hnga maw? Zeitin dah kan unau kan zuar? Cakuat in maw, phone in maw, holh in maw, tuahsernakin maw? kan unau kan zuarnak man cu zeizat remruam dah asi? Na unau na hngar ruangah le a sinak na duh ruangah zei tluk hmanh in a sual kawlin, a phunphun in tuah hmanhlaw Joseph sinah Pathian a um bangin kan unau sin ah a um ve. Tulio zumtu tampi lakah mah unau zuar tu mitampi an um, Satan duhning asi ti hi philh hna hlah unsih. Na duh ah maw, na duh lo ah maw a hmai ah kun dingin Pathian nih caan hi a mer khawh ti philh hlah. Na unau cu a zei asi hmanh ah zuar hrimhrim hlah, na zuar sual ahcun, a hnubik ah an zuarmi Joseph sinah bawmhhal in an kal bantukin na zuarmi na unau sin ah na kal ve lai.
