Thawngtthabia caah nung

Thawngtthabia caah nung

 

Zaan khat cu Paul nih cun langhnak a hmuh I cu ah cn Bawipa nih a thawh I, “na thinphang hlah; cim lengmang ko, ngol lai ci, zeicahtiah Keimah nih kan umpi ko. Hi khua chung I a ummi hna lakah hin mitampi ka minung an si caah ahhmanh nih harnak an in pe kho lai lo”tiah a ti. Cu ca ah Paul cu cuka ahcun kumkhat le cheu a um I Pathian bia kha cawnpiak hna  (Lamkaltu 18:9-11).

Pathian hmai ah a sunglawi bikmi le Pathian lung a la bikmi hna cu thlarautlau tlaitu pawl an si. Thlarautlau tlaitu caah cun Bawipa cu nan himnak a si. Satan kut chung in a tthawnnak in an khamh hna I, na ral phunphun nih an in doh nak chung in an hnuphenh. A cunglei ka catlang tarmi Baibla chung ah khan, Lamkaltu pawl nih a zumhnak a tthawnnak kha a chim I, ahohmanh nih a silole zeithil  hmanhnih thawngttha chim lo ding in in donh hna hlah seh a ti. Gentel mi hna sin ah thawngtthabia chim ding in Pathian nih a auhnak kha tlinter dingin ai zuam lio ah a hohmanh le zeihmanh nih harnak  pek khawh lo dingin nawl a pek.

Thlarautlau hna kha Pathian nih a dawt ngaingai hna I, Amah sin hruai loin kaltak ding ah cun a siang hrimhrim hnnna lo. Cu caah cun atlau mi hna kawl nak hin na nunnak cu Pathian ram caah nah ma ve hrimhrim ding a si. Khrih a simi pakhat nih hin, thawngttha bia caah lamkaltu Paul sinah khan hitin  a chim, “ hi khuapi chung ahhin thlarautlau tlaih ding tampi ka ngai hnai, cu hna cu keimah caah, na v aka tlaihpiak hna lai, cutin na tuah tikah Kei zong nih harnak na ton lo nakhnga kan huhphenh ve lai” tiah a ti (Lamkaltu 18:9-10).

Pathian caah alianngan bik rian pakhat a simi thlarautlau tlaih rian na ttuan tik ah, Pathian ai lawm I, huhphenhnak lai a herh mi cu Amah nih ttuanvo a lak dih. Cu ca ah a ram le felnak kawl hmasa law a dang vialte zong cu Amah nih an pek lai (Matt.6:33). Na nunnak ah na tuah mi vialte hi Pathian ram kauhnak ding caah si ter dih ko. A ho na si le khawika hmun na um zong ah, thawngtthabia a karh khawh nakhnga I pe ko. Cu tikah Pathian cu nanunnak ah na thlawhtlin I, a kakip in teinak na hmuh nakhnga ttuanvo an lak piak dih ve lai.

Pathian nih an herh, nangmah hmang in hi vawlei cung ah a tlaih duhmi thlaruatlau tamtuk an um caah hi vawlei cung ahhin an chiah hi a si, cu caah va kal law thawngttha cu va chim ko. Amah a chim ning tein chim ve ding in ttih hrimhrim hlah. Na vawlei ah thawngttha cu na phur ko. Na  pawngkam ah a ummi hna sinah, ngol loin chim ko. Zeicahtiah tuah hrimhrim ding fial chih na si caah, ralttha ngai le lungtho ngaiin zumh ngamnak he chim ko(1Kor. 9:16)