Cawlcanghnak um loin thangtthatnak

Cawlcanghnak um loin thangtthatnak (1Samuel 9:1-10:1)

Saul cu Bawipa duhning in a nun lo caah Pathian nih ahlawh cang I a sinah biaa chim duh ti lo, anunnak cu man ngei lo ah a cangcang. A hrawmthok ahcun Pathian nih Saul cu asang bik ah a hlorh I thangtthatnak tampi a coter, Israel siangpahrang hmaza bik ah a ser I mithmai ttha a rak pek.

Saul cu Bawipa ni a auh tikah laksawng lianngan a pek chih, apa chungkhar cu mirum an rak si I mi nih upat ngaimi an rak si. a sang ngai I a muisam zong ai dawh ngaingai, siangpahrang dingah a rak I tlak ngaimi a rak si. khacer cawngtu dirhmun in Pathian miphung uktu siangpahrang ah Bawipa nih a cawisan.

Cawisannak hi Saul nih a rak tumtah lemlo. Saul cawisan a sinak hi amah cawlcangh khawh ruangah a rak si lo. Siangpahrang na si lai tiah an rak ti lio ah hin a lau in a rak lau hrimhrim lai. Pennak zong a rak kawl bal lo. A pa Laa run kha a zohkhenh hna I apa  fialmi rian kha fel tein a ttuan tawn tu a rak si, an inn lo kong ah a rian a rak tam ngaingai (9:4-5). Kan Bawipa Jesuh zong hi cu bantuk minung cu a rak si ve. Minung vialte chungi a sang bikmi tlangbawi rianttuan ding hi a rak tumtah balmi a si lo. Pathian nih a cawisa I a timhlamhpiakmi tu a rak si. Pathian nih “Nangmah cu vawlei khamhtu ding ah kan kawh” (Heb. 5:5) tiah a ti.

Bawipa cungah zumhawktlak in a nungmi hna cu an cungah an I ruah bal lo ningin Pathian nih rian a ttuan tawn. Saul cu Laa kha a cawng tawn hna I profet Samuel ton le biaruah ding cu a rak tuaktan bal mi a si lo. Saul cu pennak le uktu si ding ah saduhthahnak le cawlcanghnak a rak ngei bal lo nain ruah lopi ah thil a rak I tongkheng ngai. Saul le a sin umpa cu an Laa a tlaumi kha an kawl I nithim an rau cang, khuazongza an kawl nain an hmu hlei lo, cu tikah an lungre a thei tuk I Zuph khuachung ah Pathian profet a um I cu pa cu va tong tuah u sih law a kan bawmh khawh lai tiah an ti I Samuel ton awk ah khuachung ah an va lut, an va luh tikah an hmuh hmasa bik mi cu Samuel kha a si. Pathian rianttuanning cu mah bantuk in a si tawn. Bawipa nih thangtthatnak pek a duh mi hna cu anmah cawlcangh len a hau lo, thangthatnak le cawisannak tu nih a kawl hna I a fuh hna.

Bawipa nih a cawisan duhmi caah cun a kakip in rain a thok. Saul nih Samuel tonding I a kal lio ah khan Samuel zong nih Saul ton ding ah timh cia tein a rak um ve. Bawipa khuakhan ning cu a caan hman te ah a tlung tawn. Mi a deuh bal lo, Saul a sin I a rat lio kha P athia nih a rak chimh cang. Saul a sin i a va phanh tikah Pathian nih Samuel kha bia a chimh colh (9:17). Pathian nih kar khat hnu kar khat in a hruai veve hna.

Bawipa nih a hlorhmi hna cu an thilrit kha a chawn hna. Saul ni  Samuel ton a duh bknak cu an laa a tlaum I kong ah a si. an vun I ton tikah “na Laa a tlaumi cu an hmuh cang, lungrethe in umti hlah” tiah Samuel  nih Saul cu a ti. Saul cu lawmhnak in a khat. A saduhthah a tling cang. Siangpahrang si ding kha a kal hnawhmi a si lo. Samuel nih ttha tein tirawl a pek hna I zaan khuadei te bia tthattha a ruah hna (9:25). A thaizing ah khua lu tiang a hei thlah hna I cuka ahcun Israel siangpahrang sinak chiti kha Samuel nih Saul cu a thuh (9:27-10:10).

Minung menmen a si ko mi hi Pathian nih a cawisan hna I sunparnak luchin a chinhtawn hna(Psalms8). Minung cu Pathian muisam loin a ser hna I sunparnak a hromh hna. Asinain mi vialte cu an sual caah sunparnak cu chuh tthan an si, Pathian thil tinhning kha an nganh. Bawipa sin in sunparnak hmuh tthan kan duh, asinain lamping in hmuh kan I zuam tawn. Kan mah fimnak le zuamnak in upatnak rumnak le mi cung cuannak kan I zuam tawn.

Thangtthatnak le upatnak hmuh hi Pathian nih hmuhter a kan duhmi a si lo, sunparnak hmuh ding hi a kan duhmi a si. Pathian nih sunparnak a pek mi hna a fale cu mithmuh  in upatnak nih a zumh hna lai. Nun thianhlimnak nih sunparnak le upatnak cu a hrin, cu sunparnak le upatnak cu Pathian sin in a rami an si. nangmah tein hmuh nai zuammi sunparnak le upatnak cu nangmah an hrawktu hla an si. sunparnak le uaptnak cu Bawipa laksawng a si I amah a dawtu le nun thianhlimnak a ngeim cung ah cun laksawng cu a pek tawn hna. Cu laksawng a cotu hna cu Jesuh he hmunkhat ah uktu an si lai.