Pastor Tehna Zohkhenhnak Caah Theory le Practical Zongin Tuah Khawh Dingmi

Pastor Tehna Zohkhenhnak Caah Theory le Practical Zongin Tuah Khawh Dingmi Hna


1. Khrihfabu ngan deuh nihcun kan Pastor te hi hawidang riantuanmi nakin lakkhah pek ding. ( Annih caah zeidang overtime le tangka kawlnak riandang an tuan khawh a si lo)

2.Khrihfabu a fa tukmi le member tlawm tukmi kan si ahcun, zeitiawk a that lo caah kanmah le kan si khawh tawk te kha a za ko. ( Rian dang tu a tuan pah ve rih ko lai)

3. Khrihbu Member kan sining le kan Pastor tehna an tlawm tam in zoh i kum khat ah voikhat maw, voihnih maw, voithum ti bantukin chungkhar pakhat cio nih facang tun khat cio le arsa, cawsa, voksa cuai khat cio ti banbantukin kan țhenh cio hna ahcun kum khat chung ti le rawl le mehhang cawk an herh ti lo.cucu chungkhar pakhat cio ca zongah facang tun khat hnih le ar pumkhat zeihmanh a si lo i, thilhar zong a si fawn lo.

4. Chungkhar pakhat cio nih Christmas le kum thar ah an chungkhar caah angki maw, bawngbi maw zun khat cio kan cawkbiak hna ahcun kum khat chung thil puan cawk an herh ti lo. Cucu chungkhar pakhat nih angki zun khat cu thil har a si fawn lo. Cu tikah kan Pastor pawl cu ei le din, thilpuan le zeidang chawva kongah lungretheih len in ruah a herh ti lo i, thlacam le Bible rel le Khrihfabu lenkai tu ah an caan le an ruahnak an pek khawh dih cang lai. Cu pinah Khrihfabu menber cungah an i lawm lai i, Pathian sinah thluachuah a kan hal piak lengmang tikah thluachuah tampi kan hmu ve lai. Cu tikah Khrihfabu ca zongah a thaw i, a nungmi Thlarau ti le rawl tampi a kan pek khawh lai i, khrihfabu caah damnak le lawmhnak le thluachuahnak a si lai.

Mithiang Pawl nihcun ‘’Khrihfabu țha tein a hruaitu Khrihfa upa hna cu, an hmuh awk a simi kha a let hnih in hmuh awkah an i tlak; cu hna lak zongah cun phungchim le cawnpiak i a țangmi kha hmuh awkah an i tlak khun. Cathiang nih, “Cawtum cu facang a cil lioah a hmur țem hlah u,” a ti i, “Rianțuantu nih a țuan man hmuh awk a tlak,” a ti fawn. (1Tim 5:17-18) tiah a ti. Cun cu bantuk thiamthiam in thawngtha a chimtu hna nih thawngtha chim in an I cawm awk a si ti cu Bawipa cawnpiakning a si (1Kor 9:14) tiah a ti.

Kan Pastor tehna le Khrihfabu dihlak kan I zohkhenhnak ca dingah Bawipa nih thluachuahnak kan pek piak ko she. Amen.


Sang Nawl