Kan biak mi Pathian cu ai rianranh bal lo i a tlai bal fawn lo, a caan teah rianțuan tu Pathian a si. Cucu zumtu nihhin kan theithiam tawn lo i, kan rak i rianranh tuk nak ah kan phunciar len tawn. Zei ruangah dah Pathian hi ai rianranh lo ti kan fian khawh nak hnga bia pathum in langhter a si lai, cu hna cu a tang lei ah kan zoh hna lai...
1. Misual hrem duh ah (Gen. 6:13-14)
Kan Pathian cu misual pawl hrem duh ah ai rianranh bal lo.Sadom khua hrem ding zongah khan Pathian cu ai rianranh lo. Zeizat nih dah An ka theih ti h gak in thinsau in an sual chir nak caan țha a pek hna. Voi tampi cu kan ruah ning he ai khat bal lo. Kan nih duh ning ahcun misual cu a tu bak ah hrem le tuar ter kan duh. Pathian cu ai rianranh bal lo. Cucaahcun zei ruangah dah misual pawl nih hin an tuar lo, hrem an si lo, an hlawhtlin, sual tuah ve hi a poi lo bia a si hnga maw tiin ruat sual hlah. An sual man pek caan a tlin rih lo ruangah Pathian nih an sual man a pe rih hna lo ti hi philh hlah. Kan duh in cun a tu sual, tu tuar colh hei ti bantuk hi Pathian rianțuan ning a si lo. Salm 37:7b ah mițha lo pawl an hlawhtlin ruangah lungrethei in um hlah uh ti kan hmu. Misual hrem dingah Pathian ai rianranh lo ruangah hrem loin a luat ter hna lai tinak a si lo. An sual man cu pek an si te ko lai.
2. Thlawchuah pek duh ah (Gen. 12:2)
Kan Pathian cu thlawchuah pek duh ah ai rianranh bal lo. Zumtu tampi cu thlawchuah dong ding in kan i rianranh tuk tawn. Asinain kan i rianranh bantukin Pathian cu ai rianranh ve lo ti hi a thar in thei țhan hna usih. Cu ti a um ruangah Thlawchuah pek a kan philh tawn bal lo. Thlawchuah pek a kan duh tu Pathian nihcun a philh bal lo. Kan nih cu kan i rianranh tuk i kan phunzai tam tuk tawn.
Abraham te nu pa kha Pathian nih Thlawchuah kan pek hna lai tiah a ti hna, a tu ah kan pek hna lai a ti lo. An hngak kho lo i pei an nupa in sual lian pi an tuah lha.Nang le kei zong Pathian nih thlawchuah kan pek lai tiah a kan kamh ve. Thinsau in Amah cu zumh nak he hngak ko hna usih. A bia bantuk in kan um ahcun a kan pek hrimhrim ko lai. A mah bel te Pathian cu ai rianranh bal lo ti hi philh hlah usih. Atu ah thlawchuah na hmu lo nain bia akan kamh tu Pathian nih cun a philh bal lo caah a kan pek hrimhrim ko lai. Pathian cu a dik lo ning in thlawchuah pe tu a si bal lo.Cun thlawchuah timi hi phaisa tam pi theng mang khi a si lo, inn lo țha hna khi an si theng lo hi hna pawl hin Pathian thlawchuah kan tah sual ahcun a poi tuk la.
3. Mi cawisan duh ah (James 4:10; 1Pet.5:6)
Kan Pathian cu micawisang dingin ai rianranh bal lo. Joseph kha cawisan awk ah Pathian ai rianranh lo, Joseph tuarnak cu kan theih dih mi kha a si ko. Mordekai cung zongah ai rianranh lo. A caan a tlin ahcun a cawisan ko hna. Cu caahcun cungsangbik phak colh ti hi a si kho lo mi a si, Pathian remruah ning a si bal lo ti thei zungzal, hnuamsam tetein țhancho khi Pathian theih pengnak a si. Hmunsang phak na duh colh zongah Pathian caan hngak thiam tu si i zuam.
Kan Pathian cu a tlai bal lo i ai rianranh bal fawn lo. A caan tlon tik lawngah rianțuan tu A si. Pathian cu thil a ti sual bal ve lo. Kan i rianranh tuk nak ah zumtu pawl nihhin thilti sual mi kan nei tawn. I rianranh hlah. Pathian caan tlin hngak u sih.
Evan.
