Zumtu nih buaibainak kan ton nak a ruang
Leicung cu buainak ram asi hrimhrim ko. Sihmanhsehlaw zumtu pawlnih harsat, buainak voi tampi kan tuarnak a ruang cu kan mah nun i zir in a si zungzal. Cucu kan ralrin thiam khawh nak hnga kan zoh dingah ka duh.
1.Thlarau lei ah kan i hngilh ruangah (efesa 5:14;these.5:6-8)
Ai hngilhmi zumtu ti mi cu, a tuah awk rian thei ko buin a tuah lo i, nunpi ding a si zong a thei ko nain a nunpi lo tu khi an hngilh mi zumtu cu an si. Zumtu kan i hngilh tikah a poituk tawn, thil sining vialte ai hrawk dih. Cucu ralrin zia kan thiam khawh nak hnga Bible chung i ai hngilh mi oawl tlawmpal in kan zoh hna lai..
a. Abraham.. Gen. 15:12. a ci thlah sal ah an tang.
b. Nu pakhat... Sph.3:20. a nung mi a fa cu a thi mi in an thlen piak
c. Zutihasi.. Lamkaltu 20;9.. inn cungin a tla
Hi hna pawl hi an i hngilh ruangah an cungah thilțha lo a tlung. Zumtu Thlarau lei ah kan i hngilh ruangah kan cungah harsat nak a phunphun a tlung tawn.
2. Pathian Biatak kan el ruangah (1salm15:22)
Zumtu nih Pathian Bia kan el ruangah harsatnak kan tong tawn. Pathian nih tuah ter a kan duh mi cu a Bible chungah a țial dih. Cucu kan thei konain kan zul duh lo. Pathian Bia el hi țih a nung tuk. Pathian a si ahcun zulh hi kan caah a țhacem zungzal ko. Bible chung i Pathian Bia el tu pawl nun tlawmpal tein zoh țhan hna u sih..
a. Jonah.. Jonah 1:3-4. Amah ruangah Lawng ai cit mi vialte nih harsatnak an tuar.
b. Saul Siangpahrang.. 1Sam.15:3; 20:21. Khuachia nih an luh hnawh i faktuk in a mualpho. 1Sam. 16:23; 18:10; 19:9.
c. Samson...Judges 13:5; 16:19. Mualpho tak in buai nak a tong i, amah ruangah Pathian min a chia.
(1John 2:15-17). Leicung thil kan duh tuk ruangah hin Pathian Bia ning in kan nung tawn lo. Leicung thil cu kan herh mi an si ko. Asinain zumtu tampi nih Pathian nak in kan duh deuh tawn ruangah buainak a phunphun kan tin nak cu a si tawn. Lot cu Pathian Bia bantuk in a nun lo caah a dawt tuk mi a nupi le a neichiah pawl a sung dih Gen.19:16. Balaam cu a Laa cit mi tiangin a holh kho number 22:22-28; Deut.23:4; 1Pet. 2:15. Gehazi. 2Sph. 5:21-23,27. Buainak a phunphun a tong i a pu he an karlak ah buainak a um, cu lawng hlah phar zawtnak nih a tlunh.
Hi hna pawl nun kan zoh tikah an buainak pawl hi an mah nun ning țhat lo ruangah, an duh thimnak ruangah a si. Kan nih zong buainak kan ton tikah kan mah nun dik lo, fel lo ruangah a si ti hi philh hna hlah u sih. Buainak kan tong lai lo ka ti nak a si lo. Buainak tampi lakin kan luat khawh nakhnga Pathian Bia ngai buin, Amit hmai zohin ralring tein nung hna u sih.
