Zeihmanh lo, a si
Bible cang rel mi..
Phungchimtu 12:8 "Pakpalawng lawngte, pakpalawng lawngte, zeizong vialte hi pakpalawng lawngte an si dih, tiah Phungchimtu nih ka ti. "
Luka 10:41-42 "Bawipa nih cun a leh i, “Martha, Martha, thil tam tuk kong ah na lungre a thei i na ing a puang, " "sihmanhsehlaw a herh taktakmi cu pakhat lawng a si ko. Mary nih ahmaanmi thil cu aa thim cang i cucu ahohmanh nih an chut lai lo,” tiah a ti."
Buaibainak aphunphun
Minunghi kan thinhang, lungnuam loin le beidong in kan um. A ruangcu a taktak a si lo mi ruangah a si tawn. Zei cahtiah Leicung thilah a taktak a um lo ruangah a si. Zeipoh hi neih le thiam kan duh, cu ruangah pei kan nun chung thadi ngai rian fakpiin kan țuan hi. Hi pawl zong Pathian laksawng Khamhnak he cuai thlai ahcun zei hman an si lo, țhat hnem nak zong an nei lo. Kan i daw kan ti, zeihmanh a țhahem hlei lo, a zei maw te thil ruangah kan i sii, hua țhan ko.(1Korin13:4)Cu dawtnak cu zei hmanh a si lo. Kan i ngai kan ti i rawl ei hmanh huam loin kan um, rian zong țuan kho loin kan i ngai ko nain zei hmanh a țha hnem lo, pakpalawng a si ko. Kan rianțuan ah kan cei tuk kan ti, um hmun zongah cei, taksa fah khawh a si fawn ko. Zei hmanh a si lo. Kai manh lo kan ti, hi ka ah kan i manh, khi ka ah kan i manh lo, a si ko lo maw? Cu caah kai manh lo kan ti zong hi zei hmanh a țha hnem lo. Chim ningzak zong a si lo maw? Voikhat buai zawh dingah tangka tampi dih in kan i țemh i, rawl voi khat kan va ei, cu cu kan inn zongah fawitein kan ei mi a si ko, kan saam, hmai e, hnipuan kan ti tangka tampi kan dih., ruat hmanh buai voi khat zawhnak ah tiin zeihmanh a si lo. Matthai 6:25 "“Cucaah cun nan nunnak ding ca i nan herhmi rawl le ti kong ah le nan pum ca i nan herhmi hnipuan kong ah lungrethei awlokchong in va um hlah u, kan ti hna. A ngaingai ti ahcun, nunnak hi rawl nakin a biapi deuh lo maw? Cun pum zong hi hnipuan nakin a biapi deuh lo maw?" Kan thil tuahmi hi ruat hmanh țhatein zei hmanh an si lo, kan thinhan nak, beidongnak pawl hi zei hmanh an si lo. Matthai 6:27 Nan lungre a theih le nan awlok a chon thawngin nan nunnak tlawmte tal a sauter kho deuh mi aho tal nan um maw?
Leicung Fimnak le Sinak pawl
Ramkhel rianțuan tu pawl khi zoh hna hmanh uh chunzaan in an ruah mi cu ai fiangtuk. An hlawk khawh nak ding, an minthan khawhnak ding, an bawi khawh nak ding tbk.. lawng an ruah tel mi a si ko. Mah hlawknak a ruat lo tu ho hmanh kan um lo ruangah a si ko. Sumdawng, chawlet pawl khi zoh hmanh an ruah bik mi an buai nak bik cu a miak tampi an hmuh khawh nak hnga a si ve ko. Țih an nung tuk. Hi pawl zonghi zeihmanh lo an si ko. Leicung sinak hna i zei hmanh an si lo, i uan tlak, phawrhlawtpi tlak an si lo. Kan fim, thiam nak hnga, ca kan cawng, ca rel pah buin kan i zuam. Fim hi zeidah a si hnga? mi fel maw? fel a si hnga. Kuaruat kho maw? Khua ruat kho a si deuh lo maw. Mirum le mi cak, țhawng maw? Mi rum le mi cak a si hnga. Aw fim timi hi zeidah a si hnga, cu caahcun Leicung fimnak kan timi hi hawl tlak hmanh a si lo, zei hmanh lo a si.
Nu le Pa, fale kar ah
Nupi, pasal kan i dawtnak zong hi zei hmanh a si lo. I țhen sual ahcun midangdang kan si ko. Fa le nu,pa karlak zongahhin mu ruahahhin cun kan i peh tlaihnak hi zeihmanh a si lo. Nu le pa nih an kan cawm kan ti, kan u pat tik ah nupi, pasal kan nei ve i, a rak kan cawmtu kan nu le pa cu kan nupi, kan pasal hmaikhap loin a thinlung te ahcun a um i, a fa le inn a si ko nain a mah inn bantuk inn ai nuam kho lo. Cu pawl te te chim ding zong a um ko nain kan chim ti lai lo. Chungkhat hna hi cu chim hau lo a si. Cu caah ka nu le pa an si, ka fa le an si ka u a si tiah i bochan ngam hi a ho hmanh an um lo, zei cahtiah kan i pehtlaihnak hi a taktak a si lo ruangah a si ko. Jesuh nih ka nu le nau a ti mi hna cu Luka 8:21 "Annih cu Jesuh nih, “Ka nu le ka naule cu maw — ka nu le ka naule cu Pathian bia kha a thei i an theih bantukin a tuahmi paoh kha an si ko,” tiah a leh hna." Kan nih zumtu hrangah cun zumtu a si ve mi pohpoh hi kan unau le chungkhat taktak cu an si. Kan nih i chungkhat kan ti mi hi cu zeihmanh lo a si.
Nun hi
Nun kan ti i, thih a duh tu cu kan um lo. Minunrawng pawl nih cun thih zong hi an ruat kho lo i an duh ko men lai. Asinain fimkhur tein thih a duhtu kan um lai ka zum loh. Kan nun khua sauh nak hnga, ngandam tein kan um a herh kan ti i a phunphun in kan i țemh mawih. Kan nun chung kan i nuamh nak hnga kan ti i, rian hrang kan țuan, kan hlawhtlinnak hnga kan mah ti khawh mi bang in lam a phunphun kan hawl. Saduh kan that i, ruahnak men ah kan i nuam ngai chawnh hmanh kan thei lo. Kan saduhthah mi cu ruahnak sawhsawh a si ko zeihmanh a si lo. Tinhmi kan nei kan ti, zeidah kai tinh timi hmanh kan i fiang lo, kan i tinh lam hmanh kan thei lo i lam dangah kan pial, kan i tinh mi kan phan kho lo zeicahtiah lam dangah pei kan kal fam cu aw. Micheu nih a lam an theih i an phan kho tak ko.. cu si ahcun a phan kho le phan kho lo ti lawngin a dih hawi ko. A niam tuk buapi a tlak lo, Pathian Biatak he tahchunh ahcun. Mitampi cu hi pawl sawhsawh men hi Pathian Biatak nak in kan duh deuh kan buaipi deuh. Hi zong hi zeihmanh lo a si ko. Paul nih cu a rak i fiang tuk i Nun hi Khrih a si a rak ti (Filipi 1:21). Nun hi buaibai sawhsawh, nuamh sawhsawh, duhduh in um, Pathian theilo, zeirel lo i um hi a si lo. Nun cu Pathian thangțhat dingah a si. Kan thih zongah kan nun zongah Bawipa ta kan si.
Minung hi
Minung hi zeidah a si? A leh nak cu Pathian sersiam mi a si. Minung hi phun hnih in kan um zumtu le zumlotu tiin. Pathian pakhat a um, cucaahcun biatak timi a taktak a si mi cu pakhat lawng a um. Inn dawh ngai na hmuh tik ah cu inn cu a sak an thiam tuk na ti a satu an um ti na chim nak a si. Cu bantuk in minung hi sersiamtu a nei i cucu Pathian a si. Zeiruangah dah a sersiam Amah thangțhat tu dingah a si. Pathian Bia lawnghi a taktak a si. Rawlei dingah kan kal i, ei loin thildang kan tuah a hnu ahcun kan rawl țam țhan. Thildang kan tuah minih kan pawm a khim ter hrimhrim lo caah pawkhim nak caahcun thil dang tuah kha zei hmanh lo a si. Cu bantuk in minung nih Pathian thangțhat lo in thildang kan mah duh mi lawng kan tuah, a kan sersiam hnawhchannak kan tuah lo ruangah thil dang kan tuah mi vial te cu zeihmanh lo ah a cang dih. Zoh awk tlak lo, man nei lo ah kan i chuah dih. Pathian chim lo zeihmanh hi pakpalawnglawng te an si dih. Solomon siangpahrang nih cun a rak i fiang tuk cang.
Luka 10: 41-42 ah Martha le Mary kong kan hmuh. Voi khat cu Jesuh Khrih khualtlawng in a vah lio ah Martha tein ah a tlung. Mary cu Jesuh ke hram ah to in A chim mi Bia a ngai. Martha cu hnawkhnai ah kan ti la maw, thil dangdangah a rak buai, i a ing a puang i a nau Mary cu rak ka bawmseh tiah van chim tiin Jesuh cu a hei fial. Jesuh nih ai thawh i, Martha nangcu thil tampi kongah na buai i na ing a paung, a sinain a taktak a si mi cu na nau Mary nih ai thim cang a ho hmanh nih an chut lai lo a ti. Mary bantuk in A Bia ah kan um maw? A Bia kan ngai maw? A taktak a si mi cu Pathian Bia lawng hi a si. Martha bantuk in thiltampi zeihmanh a țha hnem lo mi kongah kan buai maw? A rawkral ding thil kongah hin buai hlah usih, kan lung zong nuam loin um hlahseh, kan bei zong dong hlah seh. Pathian Biatak kan phuan lo ruang tu ah kan lungnuam loin um sehlaw, Pathian Biatak hmun kip ah karhseh.
Zeizongvialte hi pakpalawng lawng te an si. Pathian Bia hmanh ngai kho lo le rel kho lo tiangin, thlacam nak caan nei lo tiangin Bawipa hrangah kan buai sual maw? Cu kan buainak cu zeihmanh lo an si. Pathian Biatak lawng hi zeihmanh a si.
