Phungthlukbia 16:19 "Misifak hna he toidornak lungthin in um cu, miporhlaw hna he hranchaw i ṭțhenh nakin a ṭțha deuh. " Minih hrialmi na silo nak dingah misifak va hrial ve hlah. Pathian duh lo mi asi. Pathian duh lomi tuah nak in țih nung deuh mi a um lo. Khrihfa kan si nak ah mirum le sifak thleidan nak thukpi in kan neih rih mi hi cu kan i ruah awk ngaingai a si. Kan mah ahhin Thiangthlarau a um lo ruangah a si kho ko. Chuahpi unau lak hahin mirum deuh thil ti kho deuh le thil thei deuh kan timi cu komh kan huam ngai hna, chungkhat unanu a si zong khuate ummi, hnipuan chia nawn ai hruhmi, khuapi sining thei huaha lo pawl cu vah pi hmanh kan zahpi hna si lo maw, mah le mah cu a ho nih hlirh loin kan mah te cun kan i hlirh. Ramdang ummi zong a chawnh huam an si lem rualo an chawn bal tuk hna lo cu teh. Pawngkam ummi nih le bawmh leinakin an mah thazang kha rak duh asi fawn, mah hmanh harsat he mirianțuan in an caan a liam mi sifak zeisilo kan ram ah an tam ko cang. Misifak cu hawikom cu chim hlah unau chuahpi hmanh nih an hrial tiah Bible nih a kan chimh. Hi ka i unaun a timi hi unau chuahpi lawng a chim duh mi siloin biaknak le zumhnak uanau tiang khin an i tel dih. Khrihfabu chungah misifak deuh cu hnawl an si deuhdeuh, cheuhracheukhat thawh tlawm deuh cu hnawl an si deuhdeuh. A thawh kho deuh cu mithmaițha Khrihfabu chungah an hmu, an thawh tamdeuh caah mithmațha hmu ding an si ko ti dual hlah, nangmah ruah nak men asi. Pathian hmai ah chim tlak a si lai lo. Mirum milian nih Khrihfabu an hruai thluahmah cang. Sifak hna nih zeitluk hmanh in biațha chim hmanh hna sehlaw hmual a nei kho ti lo, an ruahnak cu mihrut ruah nak bantuk ah ruah piak an si, a duh le rak holh ve ko seh ti phun in ti an si cang.
Unau le hawikom lak ah bawmhhal in an au lengmang ko nain misifak te thilti kholo an si ruangah bawmtu nei loin rawlțam in a hrum a ai. Zumtu pakhat nih zumtu pakhat harsaknak a tuar pi lo ahcun zumlo tu nihcun zei tik hmanh a tuar pi bal lailo. Misifak, rethei a hrialtu pastor, evangelist, missionary, cawnpaiktu, Kbrihfabu upa, Nubu upa, Mino upa a ho an si hmanh ah Pathian nautat mi le hrial mi an si ve lai. Mirethei na hrial i na kal tak ahcun mirethei sersiamtu Pathian nih an kal tak ve lai. Pathian hnawnmi na si lonak dingah misifak va nautat in hnawng citcet hlah. Chirhchan, Hlawhtlinak by Caleb Laltinhrem.
