Hi zawtnak damhnak ding caahhin zumtu ai timi pawl nih biatak tein thla kan cam a hau cang. Zeicahtiah zumtu ai timi pawl ko hi a zaw mi cu kan si.
Cu kan zawtnak min cu "bu karhnak" hi asi. Khuate pakhat ah inn 90 hrawng an um le khrihfabu pakua a um. Bu khat cu inn 3 lawng an si. Cu nih kan khuatlang nun hnahnawhnak a pek ngaingai. Laimi kan vahveihnak hmun paoh ah Bu dirh lei zongah kan i țhekdarh tuk. Cu khua Bu, Cu phun Bu, tiin le Laitlang lei kan rak umnak kan Bu, Khrihfabu tiin kan i țhen hna i, cucu kan mifim thiam pawl pakhat le pakhat i rem lo ruangah a tlaimi thei asi tiah hlathlaitu bu nih an chim. Cu caah pei hi tluk hin khrihfa kan si nak hi a sau cang nain kan țhancho khawh hlei lo i, kan zumtu nun hna cu chim ding a um lo, mipi nih Pathian Biatak kan thei kho ti lo, a kan hruaitu an chimmi paoh kha kan zumh, a hman maw, a sual dah ti zong kan ruat lemlo.
Zeibantuk minung an si hmanh ah Jesuh nih an theitlai in nan theih ko hna lai tiah a rak ti. Khrihfabu chungah a țhalo mi tu kha dawi ding asi, kan nih cu a țhalo mi kha kan zaam tak, chuahtak, asullam cu hmun kan kianh tinak asi. Cu tik ah a țha he țhalo he Bu, Khrihfabu kan karh chinlengmang i a kan țhekdarhtu ah an cang. Hi zawtnak hi tei khawh asi ko, zeitin dah kan tei khawh lai ti ahcun lam tampi a um ko culak tlawmpal in langhter ka duh mi hna cu...
(1) Piangthar taktak mi si nak.
(2) Pathian Biatak Bible zumtu le theifiangtu(cafang, catlang ti pawl i chimduh mi sullam hman tein a theitu). Bible nih a chim mi hi kan caah a tlingtuk mi asi. Asinain kan zum duh lo, kan nunpi duh lo tikah kan caah harsat lawng a tang tawn. Cawnpiaknak țha lo maw, Khrihfabu ah mihrokhrawl, misual kha chuah ding asi, zaamtak i hmun kianh ding asilo.Asual ai theih nak hnga nunchimh ding, chuahding asi. Kan lakin thilțhalo cu kan dawi awk asi. Kan Bu, Khrihfabu ah pastor, upa maw an mawh ahcun an mawhnak zawn cu fiang tein chim hna usih, hualoin, do loin mipi lungrual in chimh i remh ding asi.
(3) Thleidannak um loin. Kan lah ah thleidannak a um ruangah Bu kan tam deuhdeuh nak asi ve. Hihi miphun pakhat tlau nak ding caah lam țha pakhat asi. Nan nih Bu kan nih Bu tiin lungrual lonak a chuahpi i țih nung tuk mi asi. Chim tam hau loin kan theih dih mi asi ko.
Kan chambau mi cu nunpi dinglawng asi ko. Kan nun pi khawh ni cu hi zawtnak hin kan dam ni a si hnga, kan dam ni cu kan miphun țhancho ai thawk ni asi lai.
