Lawmman le Laksawng ai dannak

 Lawmman le Laksawng

Hi biafang lawmman le laksawng hi mitampi nih cun, kan hmanning ai dang. A cheu nih sullam khat ah kan hman. A cheu nih Lai Bible nih laksawng a hman deuh ti tu zong cu rak um a si ve. Acheu nih kan holh si lo an rak ti ve. Falam holh pei si ko cu a rak ti tu zong an um len. Asinain khuate cheu khat ah cun an hman taktak ko. Ahleice in Thang Tlang peng ko nih khin an hman. A zei si hmanh ah kan holh a tlin chinlengmang nakhnga hman ah a ttha ko ka ti. Zeicahtiah miphun pi hna nih an ngeih dih mi a si. Cattialtu hi cu Lawmman le Laksawng hi an mah le sullam zawn te ah a hmangtu a si. Khah zeidah a sullam cu si hnga?

Lawmman

Lawmman timi cu Mirang holh in “Award” or “Prize” ti a si. Asullam cu “Tuahttuan man pek” tinak a si ko. Kan tuah kan ttuan man, a si loah, kan thiam ruang ah, kan tlin ruang ah kan hmuh mi “ruang” a um ruang ah kan hmuh mi, kan pek mi khi chim duh mi cu a si. English Chin Myanmar Dictionary Android App ah cun “prize” timi hi “lawmh man” tiah a ttial. Tch. 1nk,2nk,3nk….lawmman, Zohtthimh tlak lawmman(Out standing a ward), Nobel Peace lawmman(prize)..tbk. Hi langhter mi hna ahhin Lawmman hi hman a si, asinain kan nih nih cun Laksawng kan hman a tam deuh. Cu caah kan thlen khawh ahcun a ttha tuk hnga. Kan Bible chung ah cun Lawmman hi a hmannak a tampi ko nain Laksawng tein holh leh a si. Van kan kai tik ah Jesuh Khrih nih a kan pek ding mi cu Lawmman a si, Laksawng a si lo, kan ttuan ruang ah lawmman a kan pek lai. A tuan lo mi cu lawmman a dong ve lai lo.

Laksawng

Laksawng ti hi mi cheu nih Kawl holh pei a si na ti ve. Ka ruahnak ah Laimi nihhin holh kan ngei rua lo, Kawl le Mizo kan tthenh dih hna. Mirang holh in “Gift, Present” ti a si. asullam cu kan tuahttuan ruang ah siloin a lak tein thil pek kan don mi khi a si. Khamhnak hi tuahttuan ruang ah kan hmuh mi “lawmman” a silo, asinain kan tuahttuannak tel loin kan hmuh mi “laksawng” a si. Pathian laksawng a si. Hi ka zawn ahhin a fiang ngai ko hih. Hi hna pahnih sullam hi ttha tein hmang kho u sihlaw a ttha tuk hnga, a hlei in Pathian bia ttial tik le bang ahcun a herh tuk mi a si. Cu lo ahcun a sullam a chuak kho lo. Kum thar laksawng, chuahcam laksawng(Birthday Present),,,tbk tuk ah hman ding mi a si. Hmang usihlaw a ttha hnga lo maw? Khuapi ah a ummi tampi nih cun an thei lem lai lo dah, asinain khuate ah a um mi tampi nih cun an hman cuahmah mi “Lawmman le Laksawng” an si. Ka ruahnak a si.