Ngeih a herh mi lungput
Kan Lairam, kan miphun a țhancho khawh nakhnga chawhlehnak lei ah thil ti kho, cawnnak lei ah mifimthiam hna hi a pahnih nak ngeih kan herh mi an si. A pakhatnak ah Pathian țihzah buin a ding mi lungput kan ngeih a herh. Cu lungput kan ngeih hnu ah zei tin dah kan ram a țhancho khawh lai tiin lungrual in țhanchonak lam kan zawh kho lai. A dingmi lungput nih cun sual hi a sinak bantuk in a hmuh ca ah dawtnak le lungrualnak a chuahpi. Zeidang vialte nakin a sungbik cu dawtnak a si. Kan innchungkhar cio ah dawtnak le lungrualnak a um cun khuatlang ah lunglawmhnak zilthli a hrang lai i kan ram a dam lai. A dingmi lungput ngei hmasa loin ram țhancho nak ca ah kan țuan mi vialte cu zeihman lo an si. Zei ca tiah kan tuah mi nakin kan lungput hi a biapit deuh ca ah a si. Pathian sin in a ra mi dinnak cu athathu lo, a nahchuak lo i a hakkau fawn lo. Kan ram țhancho nak ding ah kaa lawng in kan au, a tak in tuah caan a si ti kan i fian a cu cang. Miphun dang nih zei tin dah an kan hmuh ti nakin kan ram miphun ca ah zei tluk in dah rian kan țuan ngam tihi a biapi deuh. A dingmi lungput he a tak in kan țuan tik ah cun cawn duhnak lungthin, theihhngalh duhnak lungthin a chuahter i chimhcawnpiak khawhmi minung ah a kan chuah. Țhancho duhtu nih cun a mah nakin a hme deuh tuk mi sin zongin theihhngalhnak lak khawh aa zuam. Cucu mifim, mitangdor le a dingmi lungput ngeitu ti zong in ti khawh a si. Bible ah thazangder mi hna cu Pathian nih thazang a pek hna ti kan hmuh. Cu bantukin mitlawmpal te a si mi kan miphun nih kan tuah hmasabik ding cu Pathian țihzah hi a si. Pathian țihzah nak tel loin ahman mi dinnak a um kho lo. A dingmi lungput ngei loin a hman mi fimnak a chuak kho lai lo. Kan miphun tuanbia kan zoh tikah Pathian cawisannak ruang ah kan rak sining nak sang dirhmun kan phan. Pathian nih a tundin mi miphun kan si. Pathian tel lo lungrual nak cu țihnung țhekdarh tu a si. Cu ca ah kan ram a țhancho khawh nakhnga a pakhat nak ah kan Pathian duh ning in nung hmasa hna usih.
Mi tampi cu kan ram dawtnak lungthin in kan khat, asinain a taktak in rian kan țuan lo. Kan mah le kan rian cio teimak nak he kan țuan lo kha kan ram ca ah a tak in kan țuan lo ti langhnak a si. Kum khat hrang lawng ah rianțuan ti hna hlah usih, teimak nak he kum tampi hrang ruat in rian kan țuan ah cun kan ram a țhangcho lai. Kan ralchiat nak hi țhangcho kho loin le hman tlak lo ah a kan tuah tu a si. Laimi pakhat khat nih thazang pek, țanpi a herh nak zawn ah țanpi hna usih, kan ral țhat khawh nak hnga thazang i pe hna usih. Kan holh kan ca kilveng in cawisang usih. Miphun muisam ngeih ter tu an si. Ca rel hna usih. Theihnak ah kan tlak tuk cun țhancho afum tuk. Kan thazang chuah in a tak in țuan hna usih. Kan ram vawlei, thingkung, pangpar, saram hna hi kan lungrualnak langhter nak ca ah kilveng hna usih. A biapi tuk mi an si. Hi hna pawl zohkhenh loin kan ram kan țhancho ter kho lai lo. Kan Laimi thawngpang lak ah a bau cem tiah ka ruah mi cu pawngkam kilven nak kong țial hi a si. A dingmi lungput he ram hrang lu hloh hi Pathian cohlan mi a si. Zei ca tiah ram le miphun sersiam tu cu Pathian a si. Ral țhatnak, lungrual nak te hna hi kan ram țhangcho ding ah a dirkamhtu kan thazangțhawnnak ah hmang hna usih. Kan ram a țhancho khawh nakhnga a lam kan theih a herh bantukin țhancho nak dawnkhantu zong kan theih a herh.
Chinram a chung i a lengmi mipi nih dinnak hi zei ah kan rello, kan khuachung ah dinnak kan țanh ngamlo, a țanhtu pawl zong ngakțhabuangro an ti bang an mah lawng kan kal tak hna, mitam deuh nih a țha an timi poh kha a țhat le țhat lo zong ruat loin kan cohlan colh, phaisa ngei deuh poh kan bawi ah kan ser hna, kan thlalang ah Bible hmang loin kan thluak ruahnak kan siarem ning cio poh kan hman, nupi le pasal țuanvo, hruaitu le mipi țuanvo zong hi aa linglet dih, nu le pa nih fale zohkhenh kan daithlang. Kan mino tampi cu tinhmi an ngei lo, huammi lawng an ngeih ca ah hmai kal ning cang zong an thiam tilo. Dinlonak nihcun hakkauhnak, țhatlonak a phunphun le zeizong vialte tuah kho tu Pathian thinhunnak a chuahter. Laimiphun nih a dingmi lungput a ngeih lo cun a rauhhlan ah innkampa nih a dolh ko lai. Chim ka duhtuk mi pakhat a um “Sual” hi zeibantuk muisam zong keng ko hmanhsehlaw Pathian mithmuh ahcun Sual a si zungzal ko ti hi a si. Sual hi sual a si ti hna usih. Pawngkam nih an cohlan mi a simaw silo ti nakin Pathian Bia ningin a simaw ti hi a biapi deuh. Bu khat lungthin kan ngei kho ti lo i a bu in rian kan țuan kho lo. Nai thimnak zong ah khan kan lungput a langfiang ngai ko tiah ka ruah. Pengdang he kan zohchunh tik ah ram ka daw a ti tu Laimi kan hrawkhrawl zia hmuh khawh a si. Hi nih hin bu khat lungthin kan ngeih lo zia a langhter i, hi vialte hi ram thancho nak dawntu an si ca ah kan hlonh hna awk an si. Jesuh Khrih ah pumkhat pei kan si cu ti tal in bu khat lungthin ngei hram hna usih, lungrual tein kan ram, kan miphun ca ah kamlo chuncha bang dir hna usih. Moses cu Levi miphun asinain Israel miphun hleihnih caah tangdor tein rian a țuan bang Laimiphun lak ah hin țuan ve hna usih. Dinnak kan hawl hmasa lo cun kan tuah țuan mi cu kan mah hlawh nak ca lawngte an si ko lai.
Kan miphun nih a cawisangtu Pathian lei ah aa mer lo cun zei tin dah miphun a lianhngantertu a dingmi lungput cu a ngeih khawh lai. Dinnak nihcun thluachuah a kan phurh. Dinnak lo cun kan miphun a dir kho lai lo. A dingmi lungput kan ngeih tikah a dingmi tuahsernak a chuak, miharsa bawmh, nuhmei, ngakțah țanpi te hna hi țhanchonak hrampi an si. Zei kan tuah nak paoh ah kan Bawipa Jesuh Khrih a kan tuah piak mi kha ruat hna usih. Hi ruah buin cun mu midang ngaihthiam zong hi a fawi deuh ngai. Mi kan ngaihthiam hi kan ral Satan rianțuan kan hrawh a si dahkaw. Kan mah pumpak ca ah siseh, kan miphun le ram ca ah siseh tinhmi ngei hna usih. Tinhmi ngei loin zei ti hmanh in kan si kho lailo. Pathian țihzah nak lawng in a dingmi lungput kan ngei kho lai. Dinnak lungput hi kan Pathian duhmi a si. Kan miphun a țhancho khawh nakhnga kan mah duhmi tuah nakin siloin kan biak Pathian duhmi tuahnak lawng in a si lai. Kan miphun, kan ram a țhancho khawh nakhnga caahcun a dingmi lungput kan ngeih a herh. Kanmah minung lawng hmanh siloin kan thingkung-rampar le ram tlawngsa, tii saram, le cung zuang vate le kan zuat sațil-arva tiang in kan herh tuk e tiin ka bia ka donghter.
0 comments:
Post a Comment