“Pathian Fungfek”

# Phungthlukbia 23:13 “Hngakchia cu fungfek in na tuk ahcun a thi lai lo. Bia ngaingai ti ahcun Sheol chung in na khamh a si”. Phung 29:15 “Fungfek chimhhrinnak nih fimnak a pek, hngakchia anmah duh in thlahdorhmi nih cun an nu le kha ningzahnak an phorh hna”.

Hika fungfek hi mirang Baibal nih cun “Rod” tiah a leh. Salm 23:4 “Na thiangthunh” timi zong khi “Your rod” ti a si. Exodus 4:2 ah, “Naa putmi kha zeidah a si?” tiah Pathian nih a hal tikah, Moses nih “Thiangthunh” a timi zong hi “A rod” tiah leh a si.

David nih cun, “Na thiangthunh nih ka hna a ka ngamter” a ti. Moses thiangthunh cu rul ah a cang kho. Israelmi ramcar chung hruainak ah Pathian nih khuaruahhar in cu thiangthunh cu a hman.  “Thiangthunh he a sullam aa khatmi fungfek in nan fa le nan tuk hna lai” ti khi a chim duhmi a si. Fungfek tukmi nih cun Sheol in a khamh hna lai, ti a si. Sheol cu dictionary nih “Mithi khua” tiah a fianter. Thlarau lei a thi mi hna umnak cu hell ram a si. A chim duhmi cu, “Fungfek tuknak nih hell ram in a khamh lai” ti sullam a si. Zungzal nunnak co ding ahcun “Jesuh Khrih nih CROSS cungah a nunnak pek in a kan khamhnak thawngtha zumh a si” tiah Baibal nih fiang tein a kan chimh.

Cucaah “Fa le nun chimhnak dingah fungfek in tuk ding” timi sullam taktak hi ruah than a herh. Fungfek in tuk i thawngthabia chimh lo cun Sheol chung in khamh khawh an si lo. Tu chan fa le hna cu tuk le velh nih an nun a remh hlei lo. Keimah fa le kong zongah, Jesuh le CROSS kong ka cawnpiakmi nih an nun a remh deuh ko. Fa le tukvelh cu US ram ah cun thongtlak le fa le chuhnak a si. Efesa 6:4 rel tikah a fiang chinchin. “Nu le pa hna, nan fa le kha an thin hung seh tiin ti hna hlah u, Khrihfa ziaza le cawnpiaknak he tu khan thanter hna u”. 

Hi fungfek hi minung fungfek si loin, Pathian fungfek tu a si deuh. Pathian fungfek cu Jesuh Khrih nih a nun a peknak CROSS hi a si. CROSS cung in a nun aa peknak thawng lawng in khamh kan si.
Cucaah na fa cawnpiak na duh tikah, “Ka fa, kan dawt tuk, Jesuh nih keimah nak in an dawt deuh, cucaah CROSS cung in khamhnak an tuah piak” ti biatak hi chimh lengmang ding an si. Cuticun Sheol in na khamh khawh hna lai. Thiang Thlarau sawm in thla na campiak hna hnu ah an nunzia zong a tha chin lengmang lai.

Na fa na dawt ahcun Pathian fungfek, CROSS in a thinlung ah na tuk lai. Thinlung tuk cu a hrinthan hlan tiang cawnpiak ding tinak a si. 

Sailo Pa
(240-753-3858)
Camp: Dallas