Izip Ram Ah A Rak Cangmi Rai Phun Hra An Sullam

Izip Ram Ah A Rak Cangmi Rai Phun Hra An Sullam 

1. THISEN (EXO.7:14-25).

                     Hi thil a cannak cu pathian hna an i dohnak tiah kan ti khawh. Izip ram hna an pathian le Israel mi an Pathian an i dohnak a si. Exodus 5:2, ah Faroh nih Isreal Pathian cu ka thei lo a ti tikah, Pathian a thei lomi a sinak cu, Exodus cauk hram thawk ah khan Josepth thei lomi siangpahrang tiah a tinak zawn ahkhan a fiang ko. Cucaah, Israel Pathian nih ahodah a si i, mi zei a si hmuhternak caah a tlungtermi asi .

Pathian nih Moses a thawh i, Faroh cu a lung a tthawng ngaingai i Isrealmi hna kalter kha a duh lo. Cucaah va kal ulaw Faroh cu Nail tiva i a kal caan zinglei ah va tong u. Tiva kam khan rak hngak u. Cun Faroh cu Hebru Pathian Bawipa chimmi kan tuah laimi thil thawng hin Bawipa cu na ngalh lai ti hi a si.

                       Moses  cu Bawipa nih a thawh i, Aaron kha na thiangtunh cu Izipt ram chung vialte cungah hler tuah, tiva si hna seh, tilak si hna seh an cungah hler tuah. Ti cu thisen ah a dihlakin thisen a um lai, thing tikung le lung tikung hmanh ah thisen cu a um lai tiah chim a ti.

                       THISEN  = (APIS, ISIS ,KHNUM LE OSIRIS HNA BIA CEIHNAK LE DOHNAK A SI. Hi hna hi Nail tiva uktu  hna an pathian min hna an si).

                     APIS hi an pa a si, cun ISIS  hi anu asi i, KHNUM hi an vengtu (guard) a si. Cun Osiris hi an fapa a si. Nail tiva hi Osiris i a thi a luangmi a si tiah an zumh. Nail tiva a hunglianh poah ahhin Izipt mi hna nih Osiris a hung  chuah than cang tiah zumhnak an ngei (kum khat ah vawikhat  a chuah peng tinak asi). Nail tiva hi Izipt mi hna i an chawleknak le phaisa an hmuhnak hmunpical a si. Nail tiva cu a luang zungzal mi, a reu bal lomi a si tikah, ngasa in maw tiva chung ummi thil tampi in Izipt mi hna caah an phaisa hmuhnak hrampi a si. An pathian hna nih an ukmi le an zoh khenhmi tiva a si tiah an zumhnak kha Israel Pathian nih an pathian cu a doh hna lai tinak  caah hi thil a canternak a si.

                     Pathian taktak an ngeih ahcun khua zei ahdah  nan pathian cu a um? In khamh hna seh, au- uh  ca tiah a ti.  Cucaah tiva kha thisen ah a thlennak  asi. Tiva cu thisen a can (thlen)  hnu ah khan Faroh nih mithleh thiammi hna a uah hna kan hmuh. Hi nih a sawh duhmi cu kan pathian nak in mithletthiam or camhthiam an thawng deuh ti a sawh duhmi a si. Phun dangin chim ahcun Pathian tak a si lo tiah a langhternak a si. Isreal mi hna Pathian cu  zeizong vialte sertu le uktu Pathian a si tiah theihter a duh caah a si. Vawlei cung thil vialte hi amah sermi le ukmi an si dih. Amah hlei a dang pathian an um lo. Amah lawnglawng Pathian tak a sinak langhternak caah  a si .

A dang pakua cu peh tthan ka van i zuam te lai. Careltu nan cungah lunglomhnak tampi ka ngei.

Credit: Bawiramcuan