Khrihfa sinak kum 100 a liam cang mi Laimi kan si. Pathian thluachuah pekmi ram dawh a ngeitu kan si. Kan hrampi cu Pathian a si. Chim duh mi cu kan pi le pu pawl khuavang an biak lio ah "nun can ziaza thiamnak" hi a rak um lo. Biarkeih in zuupu kulh in a tlokciar mi an rak si. Fei he nam he khuakhat le khat an i tu, an i do, ral țih in an rak um. A hohmanh nun aichim kho le mifim an rak um lo, (ral a chuahnak a ruang tampi cu mithalo an um ruang ah a si. Mițhalo cu mifim kan ti kho lai lo, mițhalo, mizer a si) mifim, khuaruat thiam an rak um lo. Vawlei ralpi I, II ai thawhnak kan zoh tik ah hruaitu hna fimtlin lo nak ruang ah a si. Minung an hon fim deuh tik ah an ruah mi cu "ral ruang ah minung hi zat thih lengmang hi sullam a ngei lo remdaihnak tu tuah hna usih" tiah an ti i asi khawh chung in remdaihnak an tuah.
Kan lairam ah Pathian bia nung a rak luh tik ah fim thiamnak phunphun he a rak lut. Hniphuan hruh kan thiam, thil dang tampi kan thiam hna. Cun mission school a rak um i, fimthiam cawnnak ah a hung cang. Cozah nih fimcawnnak sianginn rak tuah piak a si hlan ah Pathian minung hna nih tuah mi Pathian bia, adangdang țhanchonak he pehtlaiin sianginn a rak um hmasabik. Cu caah kan Lairam ah Bible siangiin a dir hmasa bik. Bible sianginn hi a kan cawisangtu fimcawnnak sianginn a si philh hna hlah u sih. Kan ram ah Bible sianginn ngan le minthang hi um ve ding a sinain kan țhancho ding zat in kan thancho khawh lo ruangah a muisam hmuh ding hmanh a um lo ti tluk in a tlawmnak a si. Cu lawng hlah, mipi lungthin ah aniam bik sianginn ah a hung cang. Mah hngal lo kan si zia a lang. Kan hla phuah thiam pakhat nih cun "uico bang kan bawhnak saphaw kan țam dih cang" tiah a ti.
Bible sianginn cu zeizong vialte asertu Pathian kong cawnnak a si. Vawleipi hi a thawhnak le zei tin dah a um lai timi pawl vialte cawndihnak sianginn asi. Cu nakin sianginn tha a um kho hrimhrim lo. Science, Math le Eco tbk cawnnak sawhsawh men a si lo. Vawlei cung minung dih lak nih, zei a tuah tu poh va si ko hmanhseh, hi sianginn ah hin kai ta sehlaw hlawhtlinnak a hmuh lai. A kai hrimhrim awk zong a si, amah a sertu duh mi, cawng uh a timi sianginn hmanh ah a kai huam lo, cawn a huamlo ah cun zei ti um ding ah dah ai tlak na ti.
Bible sianghngakchia pakhat ka si ve hi Pathian ka thangțhat. A rawk kho lo Pathian bia cawngtu si hi thildang vialte nak in a hmasabik ah kan tuah ding mi a si. A ram le felnak kawl hmasa tu cu thildang an herhmi vialte pek an si dih lai tiah kan Bawipa Jesuh Khrih nih a kan chimh. Bible țha tein kan cawn lo ruang ah Khrihfabu cheu khat cu kan rain țuan kan tlolhnak a si. Apoi tuk mi pakhat cu Bible țha tein kan cawn lo tik ah Biatak kan thei kho lo i kan palhnak zawn kan thei kho ti lo. Țih a nun ning. Fimnak tling kan timi hi Bible cawnnak ah ai țhummi a si.
Khuruahthiamnak, midang zawn ruahnak te hna hi kan nun chung ah kan herh mi hna an si. Hihi kan mipi kan tlakcham mi a si,,, Bible sianginn țha tein kai lo ruang ah a si. A kan funtom tu hi Pathian Bia lawng a si ti mipi nih kan thei lo i kan mah tein tuah kho, umkal kho ah kan i ruat...kan tlau cang. Aw...Bible sianginn kan ram ah dir țhanlaw kan mipi lak ah mitlau an tlawm deuh lai.
0 comments:
Post a Comment