Kum thar - Thazang peknak kaa khat

Kan phu lonain Pathian dawtnak ruang ah, Kum Thar ni sunglawi kan phan kho...

Kum Hlun nih a liam pi cang mi...kan i dawtnak, kan țhatnak le kan chiat nak vialte cu chia ta in, Kum Thar ah a thar tein i daw țhan hna usih...A liamcia caan nih uk mi si loin a ra lai ding mi caan zoh a thiam tu si hna usih.

Kum thar nih a chuahpi mi sining cung ah kal kho ding in kan lungthin chung in timhtuahnak kan ngeih a hau...

Tumtahmi thar,
Lungthin thar,
Nun can ziaza thar, he a thar tein tu kum 2017 chung ah caan hmang thiam tu kan si ding hi a biapi.

Asunglawi tuk mi ceunak thar kum thar hna kan phak khawh hi kan biak Pathian velngeihnak thawng in a si. Ka nunning hlun cu chia ta in, a thar in Pathian thangțhat hi kum thar nih a chim duh mi cu a si. Hihi țhanghnak pakhat a si ve. I hrim țhannak caan sunglawi a si.

Kan sinak hi, kan thilthuam hna, kan ngeihchiah hna hi a thar ah an i thleng lo. Cu si ahcun zeitindah a thar, athar nan ti mi cu a si khawh lai? Kum thar caan ah lungthin thar ter kho tu hna cu thluachuah sunglawi a co tu an si. Kan lungthin thar ter hna usih..kan ruahnak thar cang seh.

Careltu na sinak  kha a chia tuk men lai, nain a tu hi thazangthar lak caan a si. A thawk lawng a si rih, Na tha nau rih hlah...a thawk lawng a si. I zuamnak caan sunglawi Pathian nih an serpiak țhan cang, Pathian min thangțhat si ko seh.

Kan caah hin Pathian dawtnak hi a thar zungzal ko nain kan theithiam lo. A tu kum thar caan tal ahcun Pathian dawtnak thar cu a theithiam kho tu si hi a biapi tuk.

A liam cuahmah mi caan ah Pathian hruaimi pumpak, chungkhar kan si khawh nakhnga Pathian nih thluachuahnak kan pek piak sehlaw, kum thar thluachuah lawmhnak vialte cu nan dih lak cung um ko seh. Amen.

By Anthony VSL