Zumh Lo nak

Zumh Lonak (1Samuel 13:1-10)

Saul cu siangpahrang rian a ttuan ka ahcun Bawipa bia cu a zulh i Thlarua hruanak in ttha tein rian ai thok. Saul cu siangpahrang a si ah kum 30 a si i kum 42 chung siangpahrang a si. A hnu deuhdeuh cun Bawipa a hlawt ruang ah biaceihnak kha a cung ah a tlung, cucu pennak kha chuh a si.

Saul rian ngan bik cu Filistin mi kha tuk i tei kha a si. Saul nih ralkap phu hnih kha a ser i phu khat cu amah hruaiding a si, a dang phu khat cu a fapa Jonathan hruaiding a si. Amah le mah kha ia zumhtuk caah ralkap a cheu cu inn ah a kir ter hna(13:2) Jonathan nih Filistin mi cu a va nam hna i, cu thok cun raltuknak nganpi ai thok. Saul cu a thin a phang tuk tthan i inn ah a kirter mi hna le ramchung mi dihlak kha raltuk nak ah a auh dih hna.

Filistin mi nih an vun nam hna i Israel mi cu a thir in an thir. Thingkua le lungkua ah an I thup, a cheu cu Jordan kha an tan i a him lai an tinak cio ah an zam dih. Saul ralkap hna cu an ning a tti tuk i an zor chin lengmang(v.4). Samuel nih Saul cu bia a hei cah, “Gilgal ah rak kal law ni 7 in rak ka hngak. Cu ka hmun ahcun khanghthawnak le daihnak pekchanh thawinak kan tuah piak lai” tiah a . Saul nih cun a rak hngah. Asinain Samuel cu a rat bal lo caah, Saul cu a thin a phang tuk i vansangau in a um. Cu a thinphannak nih cun Saul cu Bawipa nawl ngeih lo nak lam ah a hruai. Daitein um i Bawipa kha  i bochan awk asi ti kha a zumh khawh lonak nih harnak chung ah a paih.

Zumhnak hi dot hnih, hmai hnih in a um. (1) A hram domhnak zumhnak a si, cu nih cun khamhnak ah mi a hruai. Zeicahtiah khamhnak a kan phak pi tu zumhnak cu zumhnak tling a si i a hramdomh nak zumhnak cu a si. thluachuah hmuh le hmuh lo timi cu kan zumhnak a der le a cah/tthawnnak cung ah ai bunh mi a si. Bawipa nih Israel mi cu Egypt ram saltannak in a chuahter ko hna nain a hnuah a zum lo mi cu a tthen tthan ko hna tiah Jude 5 chung ah kan hmuh. Saul cu zumtu a si ko nain nawl a ngei lo mi a si. Samuel nih rak ka hngak law zeihmanh rak tuah hlah a ti.

Siangpahrang Saul cu a mi nung pawl an tlawm deuhdeuh caah a thin phang tuk i Samuel phak hlan ah zeital ka tuah a hau ko lai tiah ati. Minung tlawm hi a biapi mi a si lo, Bawipa i bochan le a nawl zulh hi a si (Biaceihtu 7, John 6:66-67). Jonathan le a ralthuam putu pahnih lawng nih Filistin mi an tei hna ti kha ISamuel 14 chung ah kan hmuh fawn.

Thil umtuning a tlai ruang ah thil sual a chuak tawn. Samuel cu Gilgal a rak phan kho rih lo. Cucaah Tlangbawi lawng nih tuah phung a simi khanghthawinak kha Saul nih cun a rak tuah(v.9). Cu nih cun Saul cu harnak nganpi chung ah atlak pi. Khawnghthawinak a tuah dih le cangka Samuel a rak phan. Bawipa nih kan herhmi hi pe loin a kan um lo, a caan hman te ah a kan pek zungzal, daitein le thinsau lungfual tein Bawipa cawlcangh caan kha hngah a hau. Cucu Saul nih a zum kho lo i, a mah siarem ning in Bawipa nawl cu a rak buar. Kan herh caan taktak a phak rihlo ahcun Bawipa cu a cawlcang lo nain a caan a tlin taktak ahcun A rian a tlolh bal lo. Cucu kan zum kho maw? Bawipa cu ningcang loin, tik le caan tuaktan loin a cawlcang ballo, ningcang tein, a caan hman te ah kan herh taktakmi cu a kan pek tawn. Amah cu a nungmi Pathian a biakam a hrawk ballo tu Bawipa si.

Careltu sin ah Bawmhhalnak……

Like & Share in kan bawm ve….