Zumhnak, Ruahchannak, le Dawtnak

A hmun zungzal mi thil pathum an um, cu hna cu zumhnak le ruahchannak le dawtnak an si, cu hna lak I a ngan bik cu dawtnak a si (1Korin 13:13)

Zumhnak, ruahchannak le dawtnak phunglam hna hi Baibal chung ah a kan hmuhtermi a lianngan mi phunglam pawl an si. Ruahchannak cu, a hlatpi in na hmuhmi hmanthlak a si. Na khuaruahnak a zate in cu ka hmun ah cun na chiah ding a si. Thil tampi nih cuticun na ruahnak lung na bunh khawh lo nakhnga, le na lungmit in hmanthlak na suai khawh lo nakhnga, an in dawnh lai nain, zeitikhmanh ah na lungzor in na kut thlah hlah. Thil pakhatkhat ruangah thil kha rawkral I tim ko hmanhsehlaw, na tumtah mi kha hmuh khawh tthan dingin, thlacamnak ah kir tthan law pathian bia kha na hmur in phuangchuak. Na theih dingmi cu Baibal nih ruahchannak nih zingzahnak a chuahter lo I, lungrawhnak zong a kan pe lo (Rom 5:5). Hmanthlak cu na hmuhfian tikah na tuah hnga ding mi a pahnihnak cu a tak in ke kar hlan I rianttuan kha a si.

Abiapi mi cu hlat pi tiang zoh in hmanthlak hmuh khawh kha si. Cu khat ta lei in a takin karhlan rianttuan in na nunnak chung ah rak hruai kha si. Mahcucu zumhnak an tim cu a si. Zumhnak cu hlatpiin a va hmuhmi hmanthlak kha nakaa in phuanchuahnak kha a si. “Zumhnak ngeih kan ti hi, kan I ruahchanmi kan hmuh ttheu lai ti kan zumh le a taktak le a ngaingai a simi thil kanmit in kan hmuh khawh lomi hi an um ko ti kha zumh hi a si”(Hebru 11:1). Ruahchannak nih hi ti hin a chim “ka ta a si te lai”, asinain, zumhnak nih hitin a chim “keimah ta a si an ti.”

Pathumnak phunglam cu dawtnak phunglam kha a si. Baibal nih an pathum lah ah anganbikmi a si a ti. Ruahchannak nih lungsonghnak a ngeihlonak cu, Thiang Thlarau nih kan thinlung chung ah dawtnak in rian a ttuan caah a si. “Zeicahtiah a kan pek mi Thiang Thlarau thawngin kan lungchung ah Pathian nih a dawtnak cu a toih in a kan toih”(Rom 5:5). Cu dawtnak in na nun I rian na ttuan tikah na thinlung chung ah zumhnak kha a himter. Zeicahtiah Baibal nih “zumhnak nih dawtnak he rian a ttuan” a ti (Galati 5:6).

Pathian he rian kan ttuannak hi dawtnak in a si. Dawtnak a um lo ahcun na zumhnak rian a ttuan lai lo. Dawtnak cu tlamtlinnak in a funtu a si (Kolose 3:14), zeitikhmanh ah asung bal lo, cun zungzal in a hmuh. Message Translation Baible nih a ttial mi ka uar ngai mi a um, Kolose 3:14 hi “zei thil poh nai hruhtikah, dawtnak kha I hruhchih peng, cucu na hrampi cu a si I, na thil hruh mi I ai timhmi ah a muru cu a si. A tel loin zeitikhmanh ah I hruh hlah.