Thiang Thlarau in
hmelchunhnak
Samuel nih Israel siangpahrang ding ah Saul kha chiti a thuh
lio ah hin Saul thinlung chung ah thil pathum an um. Pakhatnak cu a tlaumi a
Laa kong a si, pahnihnak cu Samuel pek ding ngun tangka kong a si, pathumnak cu
siangpahrang si dingin fimthiamnak le raltthatnak a ngeih ngeih lo kong hna kha
an si.
Pathian nih Saul lungretheihnak kha hnangamnak in a
thlenpiak. Saul sinum pakhat a ra i a
tlaumi a Laa hna kha kan hmuh cang tiah Saul kha a rak chimh. Laa a kawlpiaktu
cu Pathian a si (10:2).
Pathian nih Saul cu a pumsa caah a herhmi kha a
damhkhanpiak. Saul cu an khua lei I a tlun lio ah eidin awk le tangka zeihmanh
a ngei ti lo. Asinain lampi ah mi a ton hna I changreu le mitsurhang kha an pek
I a tlam a tling(v.4).
Pathian nih a Tlarau in Saul cu a thomh I siangpahrang
rianttuan khawhnak ding ah tthawnnak le fimnak a pek. Saul cu tlawmpal a hei
kal in Pathian profet bukhat kha a va ton hna. Saul cungah Thiang Thlarau a
tlung I profet hna bantukin Thlarau fimnak a ngei.
A cunglei thil phun thum a cungi a tlungmi nih hin Saul cu Bawipa nih chiti a thuh caah,
tthawnnak, fimnak le a lung I a ummi poh tlamtlin khawhnak in Thluachuah pek a
sinak kha a fianter. Cun Samuel cu lungthin cheutu le a hruaitu ah a cang.
Samuel nih Saul cu Bawipa bia in a hruai caah Saul cu Pathian Thlarau nih a umpi I Pathian duhning in rian a ttuan
(10:9). Saul cungah Pathia biakamhmi
thil phunthum a rak phan colh I phunkhat kongkha kan vun zoh tuah lai
(10:10-12).
Saul cu Thlarau minung a si caah mifim le mitlamtling sinak
tluachuah a hmu.
1.
Aleidang
a uk khawh. Saul cu Israel caah siangpahrang sinak chiti thuh a si ka
tlawmpal ah a pu sinah a va kal. Siangpahrang a si tenak lai ding kha
uanthlarnak in va chimh len ding a si nain a leidang kha a uk khawh I cu kong
cu zeihmanh chimceih lo tein a um(10:13-16).
2.
Siangpahrang rian a ttuannak aah a amah fimnak,
cawlcanghnak kha tel hngin lo tein Pathian sin ah a hmuhmi fimnak tu kha
hriamnam ttha bikah a hman. Pathian hruaining kha a zoh peng. Samuel nih Israel
mi kha a chimh hna (10:17). Cun, an bia bantukin an siangpahrang si ding ahcun
camcawh fung khiah in a thimpiak hna i Saul cungah a tla. Cun mi vialte nih
“Siangpahrang cu saupi nung ko seh” tiin an au. Israel cung I siangpahrang si
awk ah Saul nih ai zuamnak, a cawlcanghnak zeihmanh a um lo. Pathian nih a lak
tein a hlorh i a thimmi a si(v.22). israel cung I siangpahrang a sitertu, amah
hlorhtu cu Pathian a si kha fiang tein
Saul nih a hngalh.
3.
Saul cu mi ngaihthiam khawhnak lungthin a ngei.
Saul cu siangpahrang a si cang tiah Samuel nih a thanh tikah mipi cu an lung ai
lawm I siangpahrang cu saupi nung ko seh tiah an au. A rainttuanpiak tu le amah
a cawngtu nih an kilven colh. Asinain amah kha a duh lo tu le buainak a
chuahpitu an um ve. Asinain amah kha a duh lo tu le buainak a chuahpitu hna
dantat loin dai tein a ngeihthiam hna (v.27).
A rauhhlan ah Saul a duh lo tu le buainak a
chuahpi tu hna cung ah harsatnak a phan colh. An ral a simi Ammon mi Nahash nih
Jabesh-Gileah kha a hung dum (11:1). Nahash nih ka sal ah kan ser hna lai tiah
a ti hna nain Saul nih a kan khamh lo ahcun na sal ah kan cang lai, caan kan
onh rih an ti I Saul kha cu kong cu an hung chimh. Saul nih cu bia a theih
tikah athin a hung tuk I Pathian kha a auh I Thlarau in a khat. Israel mi
vialte kha a pumh hna (11:11). Ammon mi kha ralttha ngaiinn an va fuh hna I an
va tei hna. Pathian nih Saul kha siangpahrang I a thimnak hlorhnak caah Ammon
mi cung in sunparnak a pek colh, I a mah a rak dohtu hna cungah dawtnak in
teirul chamnak caan tthan a pek chih colh, cun ngaihthiamnak lungthin zong a
pek chih I siangpahrang a sinak kha fehter chinchin a si (11:14-15).
4.
Saul nnih Pathian thluachuah dongcat loin a hmuh
nakhnga a tthami hramthawhnak kha fek tein a pehzulh peng a hau. Saul nih
siangpahrang rian a domh ka ah Pathian lung tong tein rian a awt. Thlarua
duhning tein kar a hlang. Daihnak le ngaihthiamnak lunghthin a ngei. Asinain a
hnuah cun Bawipa nawlbia kha zei ah a rel lo I David zong kha thah a zalh
lengmang. Cucaah a siangpahrang tthutdan cu chuh a si, a thluachuah vialte cu a
tlau dih. Cucaah Johan nih “nan ttuan lengmang hnawhchanmi kha nan sungh sual
nakhnga lo le nan laksawng kha tling tein nan hmuh nakhnga ralring tein um ko
u” tiah a ti (2John 8). Bawipa a ttihzahmi le nawlbia a zulmi hna cu Bawipa nih
him tein a kilven hna I thluachuah a pek tawn hna.
0 comments:
Post a Comment