Ralrinpeknak cu kanmah ca tthatnak a si

 Ralrinpeknak cu kanmah ca tthatnak a si

Hngakchianu ka si caah ka nu le ka pa he ka pi kan va leng. A inn cu electric hri hauka in kulh mi a si. Caw lut hna lai kaw tiah kulh mi a si. ka nu le ka pa kha khua leng ah lente kai celh lai tiah ka hal hna, an hna a tla ko nain electric hri khi cu a tonghin tong hlah mu tiah ttha tein an ka cah ta. An bia ngai loin electric hri cu ka va tongh ai, electric tha nih cun a ka hlonh colh ko. Caw hmanh nih tong hna hlah seh an ti mi nih cun. Ka tlu colh ko. Cu hnu lawng ah ka nu le pa nih ralrin an ka pek mi hi pingpang maw tawng sual lai an ti caah pei a si hi ti ka theih khawh.

Pathian nih hlan lio Israel mi pawl kha Jerusalem ah an duh poh in miphun dang nupi an tthi i milem khuazing an biak kha A hmuh hna tikah cutin tuah lo ding ah bia a cah lengmang hna; zeitintiah A zangfah hna (1Chanrelnak 36:15). Pathian nih profet Jeremiah sin in a tu le a tu bia A cah hna. Asinain, A mi hna nih cun “kanmah duh ning in kan um ko lai” an ti (Jeremiah 18:12). Cu caah Pathian nih Nebukkhanezar kha Jerusalem cu A hrawhter i a chung i mi tam deuh kha a tlaihter hna.

Pathian nih nihin ah na nunnak i na sualnak caah ralrin an pek men ko lai, cuti na si ahcun thazang la ko. Cucu kan caah zangfahnak a ngeihmi a langhter nak a si (Hebru 12:5-6). Amah nih hmailei kong kha A hmuh chung i harnak chung in kan luat nakhnga caah a si. Pathian nih a kan pekmi ralrinnak cu kanmah khamhnak caah a si, kanmah dantatnak caah a si lo. Jennifer Benson Schuldt