India Siibawi te nih Lu ai peh mi tluang tein an hlai khawh hna
India ram Siibawi te hi an thiamnak a sang chin lengmang ko. Tutan ah faphir pa pahnih lu ai peh mi hna cu tluang tein an hlai khawh hna tiah theih a si.
Jaga le Kalia timi kum 2 hngakchia pa pahnih lu ai pehmi hna cu Siibawi minung 30 hna nih suimilam 16 chung bak an hlai hna i tluang tein an lu an tthen piak khawh hna tiah theih a si.
Hi pahngakchia pahnih hna hi an chuak ka tein an lu i ai peh mi a si. Hi ti bantuk in tluang tein an hlai khawh hna hnu zong ah an ngandamnak dirhmun a ttha rih ko tiah Siibawi te nih an chim.
India ram ah hi bantuk hi a voikhatnak a si. A tu hi ttha tein zokhenhnak Si-iin ah an chiah hna tiah theih a si.
An lu hi a thari le thluak (brain tissues) lei in an rak i peh tiah Siibawi te nih an chim. Hi bantuk hi nuai 3 tluk hrinmi chung ah a cang sual tawn mi a si tiah an chim rih.
"Hlainak kan tuah ning cu a dik dih ko, asinain an dirhmun zoh rih an hau. A rai lai mi ni 18 chung hi cu ttha tein zohkhenh rih an hau ko, cun hngakchia hi an ngandam lonak dang zong a um rih, Jaga hi lung zawtnak a ngei, Kalia zong hi kal zawtnak a ngei ve" tiah Siibawi pakhat nih a chim.
Hlainak an tuah ka hna ah hin Jaga hi a dirhmun a rak ttha deuh, asinain a tu hi a sual deuh ngai, Kalia tu hi a dirhmun a ttha deuh cang tiah theih a si. Hi hi a voihnihnak hlainak an tuah a si. August thla dongh lei ah khan voikhat an rak tuah cang hna.
A tu hi hngakchia pahnih hi ttha tein le ngandam tein a nung kho ding si hna sehlaw an lu ruh chuah tthan khawhnak ding tuah piak an hau rih lai tiah Siibawi pakhat nih a chim.
Ref:BBC le 7daydialynews
