Christmas Ni Sunglawi
Kum le caan ai her lengmang bang a sunglawi tuk mi le kan i ngaihtuk mi Christmas cu kan hun phan than cang. Christmas caan hi mikip thinlung i hliphlau bik caan le nun a hnin-hno bik caan asi. Mitampi nih cun Christmas ni hi a sawisel le biasiphai lei in a rak i la mi zong um asi tawn. A sinain Christmas Ni hi a dik le dik loah buai loin conglomh awk a tlak mi Van Siangpahrang vulei a ratnak conglomh le thangthatnak Ni tu ah hman ding asi.
Christmas Ni hmanh ah nun ai hlip-hlau kho lomi cu i hlip-hlaunak caan a um hlei tilo. Zeicatiah Pathian Sunparnak nih vuleipi a hninh lio caan asi bantuk in zumlo tu tampi hmanh a tlirh lio hna caan asi. Cu lioah a tlirh chih khawh lomi si cu tih a nung tuk. Mi zeimaw cu zunngeih ruangah Christmas i ngeih kho loin a ummi zong nan um men lai. Asinain Khrih hi ngeihchia mi hna ca hrimhrim ah ara ve tikha rak philh hlah (Lk 4:18-19). Bawipa cu ailawm mi lomhpi awk le zunngai in tuarpi awk caah ara.
Pathian fa le kan caahcun Christmas cu tleihchan lo awk ruam atha loh. Zeicatiah misual umnak vulei ah Vancung rim a nam ni asi. Muihnak vulei ah Van Arfi ceu atlan ni asi. Minung sinah Van Siangpahrang muisam ailangh ni le hmuh khawh ni asi. Vulei nih atheih bal lomi Pathian Vancung mi hlasak thawng athan ni asi. Lungrethei le ruahchannak ngei lomi hna caah Ruahchan nak thawngtha athan ni asi. Sunparnak in a khatmi Van siangpahrang thut-den a kaltak Ni asi. (Luke 2:8-17)
Cucaah thangthat lo-awk atha hrimhrim lo. Cun i lawmh lo-awk zong atha hrimhrim fawnlo. Cucaah thangthat awk a tlak zia a hngal fiangtu poh nihcun Pathian cu thangthat loin an um kho lo. A thangthat lomi cu thangthat tlak asi nak ai fiang taktak lo mi an si. Na nunnak ah Bawipa thatnak na tinco ko ahcun ilawm lo le thangthat loin na um kho hrimhrim lai lo.
Caan ai mer lengmang mi nih minung sining zong a merpi chih ve lengmang. Nihin dirhmun le thaizing dirhmun ai khat lo men lai. Nihin ailawm mi kha thaizingah mitthli he caan ahmang kho men. Cun Nihin attap mi zong thaizing ahcun lomhnak in akhat ve kho men. Cucaah Nihin kan sining hi caan sin ah aliam dih ding an si caah caan tha hi a hman zia thiam a hau i aser tu a hmun mi Pathian ngeih hi abiapi tuk hringhran. Cucaah Christmas nih a duhmi cu Khrih ngeih ding kha asi ko, tukum Christmas cu Bawipa Zisu he kan iton ni le a kan dawtnak kan hngalh ni ah a can khawh nak hnga Bawipa nih thluachuah kan pekpiak hram seh! Amen
chinchiah//Pastor Van Bawi Kam facebook ta copy mi a si
