Pathian nih a fapa ngeihchun pektlak in a sunglawi mi na si
Leah cu a pasal Jacob zeitik dah ai tthangh lai ti a ruah ah it kho loin a um lai. Zeitluk in dah a lung re theih hnga. Jacob nih Leah cu Rachel ah a ruah. Asinain Jacob nih ka pu Laban nih a ka hlen ti a thei rih lo. Ka pa nih a hlen hi a theih tik ah teh ti hrawng in Leah cu lungrethei in a um ko lai dah.
Jacob nihcun ka pu nih a ka hlen ti a theih tikah, Rachel co khawhnak ding caah baikam thar an tuah tthan(Gen. 29:25-27).
Zeihmanh si lo mi le a tthabik changtu hrawng lawng ka si tiin nai thei maw? Leah nihcun cubantuk in amah le mah ai thei. Aw..Jacob nih kei hi a ka duh lo ti ai thei. A tha nau tawn. Cucu a fapa upa cem pathum hna min a sak nak ah kan hmuh khawh. Upa cem Reuben cu “fapa ka hmu”, Simeon cu “ theih piak”, Levi cu “pehtlaih” tiah min a sak hna. an min sullam ruah tikah Jacob nih a mah ah duhnak a ngeih lo zia langhternak an si. sihmanhsehlaw hmuansam tein Leah ruahnak cu ai thleng, a fapa palinak Judah cu “thangtthat” tiah a sak. Ka pasal nih hong ka duh lo hmanhsehlaw Pathian nih a ka duhdawt ti a thei.
Kan minung sinak in kan tuah ttuannak zoh in, mi nauta le zei ah rel lo mi kan si men lai, cun mah le mah i bochannak zong ngei kho ti lo tiang in, kan nun hi a ttumchuk tuk ko tiah kan i ruat kho men. Leah nih cun ka pasal nih a duhbik mi ka si lo nain Pathian nih a ka duhdawt ti ai fian tik ah Pathian a thangtthat. Pathian duhdawtnak hi minung hna nihhin a hlawh in kan hlawh kho lo. Zeicahtiah kan tuahttuannak cung ah ai tthum mi a si lo. Rom. 5:8 “asinain Pathian nih cun zeitluk in dah a kan dawt kha hi tihin a langhter: kannih cu misual kan si ko rih lio ahhin Khrih cu kan caah a thi.” tiah Rom cauk chung ah kan hmuh khawh.
Na thanau ti hlah Pathian nih an dawt. Pathian nih a kan hmuhnak ahcun, a fapa ngeihchun hmanh pektlak in a sunglawimi kan si. Haleluiah… Amen.
Nifatin Thlaruarawl
