Zawtnak rai a tlung kan Laimi lak ah. Kan nih Laimi cu mitlawmte kan si, cu hmanh cu kan holh ai dang, voitampi cu kan lung ai rual kho lo. Za ah za Khrihfa ai timi kan si. 2003 hrawng in kan lak ah zawtnak rai a tlung i tu 2015 tiangah a dam kho lo mi zawtnak asi. Hi zawtnak hi damh khawh asi ko nain a dam kho hrimhrim lo. Kan khuaruah nak nih a phanh khawh lo caah a karh chin lengmang ko. Hi zawtnakin a zaw mi hna hi zoh tikah cathiam, mifim, Degree sang nei pawl le Pathian mi fa tiah bochan mi pawl hi a tam bik in a dam lo mi cu an si. A hlei in Bible fimnak a cawngmi pawl ko hi an si khun tiah hlathlainak a tuahtu pawl sin in thawng kan theih. I țihnung ngai mi zawtnak asi an ti. An zawtnak caah damnak sii din awk cu a um lo nain a hrial in hrial nakin damh khawh mi asi. Cucu a sii țha hna lak ah pakhat asi ve. Asinain thawngchia lak ah thawngțha pakhat cu hi zawtnak nihhin misifak le zei silo deuh hi a phomh tuk hna loh tiah an ti. Zumtu, Pathian nung a bia tu Laimi cung bak i hi bantuk zawtnakrai a tlun hi a poi tuk ti ko lo cu chim ding ka thei lo. Cung Pathian nih damnak kan pekpiak hram seh. Hmun dang ram dang ah a um mi kan Laimi caah cun hi zawtnak hi a kark ngaingai caah i ralring cio dingin forhfialnak an neih nak kong Laimi panihcun achim rih. Hi zawtnak ruangah kan Lami tlawmpalte um nak hmun ah țhekdarhnak chuahter tu asicaah kan ral lianngan asi. Lungrualnak a um tilo i țhangcho kholo in a kan tuahtu zawtnak asi. Hihi kan pu le chan zongah a rak um cang mi asi, mitampi nunnak an rak la tu zong asi. Zeicahtiah minung pahnih nih hi zawtnak an neih ahcun an lak ah remlonak a chuahter khi asi ko rua an lung ai rual lo i rian zong hmun khat ah an țuan kholo tiah hlathlaitu bu nihcun an chim. Laimi kan zawtnak hi dam cang sehlaw kan ram caah rian tampi in le thukpiin kan țuan khawh lai. Hi zawtnak min hi ka hal hna lo i si rua an ka chim lo. ka van hal hna lai i hmaizarh ah kan chimh ve te lai. Rel kho dingin caan tlawmpal cu rak pe țhan law zawtnak min le a chuahpi mi theitlai kong fiang deuhin na theih khawh lai.
