Nu le Pa , le mino
Nu le Pa nih kan tuah awk asimi kan tuah lo tik ah Rampi tiangin a tlu kho. Nu le Pa hi kan biapi tuk ti hi chim ka duh mi asi. Fale zohkhenh nak he pehtlaiin chim ding tampi a um ko, kan theih dih mi zong asi lai tiah ka ruah. Tuchan kan mino pawl zoh tik ah ngaihchia asi, cucaah a hringtu nu le pa nih kan tuah awk asimi rian kan tlolh tuk hringhran timi au aw asi. Nu le Pa hna kan fa le zoh khenh hi baa hlah usih. Ka fa nih hawi a hngar sual lai tiin na tuahpiak mi kha zei dah asi? Ka fa caah zeidah a chuahpi khawh, Zeilam ah dah a kal timi țha tein ruah caan a si. Chim țhan ka duh mi cu Nu la Pa caah rian hrangbik, a biapi bik rian cu fale zohkhenh hi asi. Na fa hmanh țha tein na zoh khenh khawh lo cun zei țhathnemnak cu dah na tuah khawh bal hnga. Chawva hawl nak ah na tluang men lai, asinain na theih loin nang mah le nangmah nai kalh lawnghmanh silo in miphun hrawktu chawlet thiam na si. Kan tuah awk kan tuah lo tik ah a theitlai a kha tawn. Ca cawn nak lei zoh hna usih. Nu le Pa nih si khawh chungin an sianginkai nak caah kan i zuam, asinain a kar lak ah harsat nak phunphun kan tei kho hawi lo i a dihdonghtiang in kan peh zulh kho lo. Ca na thiam lo kan ti hna, na fel lo kan ti hna fel dingin teh kan cawnpiak hna maw? kha voi hnih khat men chimh nak ahcun a ho cu dah a fel hnga,,fale thinlung ai hrawk dih, an tuah duh mi le tha kan pe fawn lo, ca thiam lo, duh mi, tuah huam mi, thiam duh mi zong tong kho lo in kan tuah hna i an puitling i zeihmanh thiam mi nei loin khua an sa. Catangsang kai kan mino zoh țhan hna usih. An duh zatin phaisa kan kuat hna i, an tuah mi cu nungaktlangval kan si ti le sportshirt pakhat chuah fang khi asiko. An duh ningin an um i, nungaktlangval lungnuamh lio caan lawng kha siangin an dih hnu i an philh khawh lomi, an nun chungah asunglawibik an timi cu asi. Ka fa hi university kai sehlaw zei dah a lawhlai, asiloah kum hi zat a kai i a fel maw? alung fim deuh maw? ai tinhmi, a huam mi le sianghngakchia dir hmun in a tuah dingmi a tuah maw? ti tiangin nu le pa nih kan hlathlai awk asi. A cu nemmam cu Kan fale cu a felbik ah kan chiah hna i an sualnak tinpel tia hmanh hmu lo tu tam deuh arak si. Cu bantuk nu le pa lak ah zeitindah zohchunh tlak minung cu an chuah khawh lai. Kan Laimi lakin minung hi zat remruam university an dih nain țhat hnem nak zeipihaw hmuh ding a um țunglo. Riansang a tlai mi an um nain a tam deuh cu mah ca hlawhnak lawngpei an tuah khawh mi si hi. Midang cungah zangfahnak a ngei mi fa aser chuak kho lo tu nu le pa kan tamtuk. Cucaahcun Pathian cu i țih ter duh hlah, a khawmh zong i khawm ti hlah. Nai chir hnu lawngah thilțha a chuak lai. Laikeng fahrin in pei fa kan hrin cu, nu le pa a tling mi cu nu le pa rian vialte țuan dih tu khi an si. Fa hrin men hin nu le pa tling si hlah ee.
NU le PA cheu khat Pathian kan duh kan ti ko nain kan fa le siter kan duh mi cu Sibawi, Cozah rian tlai tu tbk vawlei zohnak ah a sangmi lei kam khi kan duh piak hna. Hi kong hi ka ruah tawn i ka hmuh mi cu aw kan nih Laimiphun nih Pathian kan theih ninghi cu a niam tuk rih, chim ngam ding asilo, chuahpi ngam ding hman asilo, zumhnak ah ralțha le Pathian țihzah tu an um. Asinain pahnih khat te an si. Kan thinlung cu tlawmpal te kan ram a van țhat hin ai fiang ko, hi chungahhin zeitluk in dah mino pawl an i hrawk, chim tam hau lo asi. Siibawi, vawlei zohnak ah a sangmi si cu a țha lo ka ti lo, ka chim duh mi cu nu le pa kan thin lung put kha asi. kan fale lak ah a țawntai cem kha kan biak kan Pathian caah kan chiah i, a țha țha kha ka tar tikah a ka cawm tu dingah ti phun in kan um. Zingah zeidah an tuah, zaan lei ah zeidah an tuah timi thei loin fale a zoh sawhtu kan tam chin lengmang fawn rih. Na fanu na dawt ahcun zaanlei ninem ah khua hauka hrim panh ter hlah, a ih tiang innchungah um ter tiah phungthluk phuah hau mi Laimi chantiluan dawi tu kan si cang. Nitin nun ziaza ai hrawk tuk mi mino tampi a neitu CHINRAM tiah lungphun tlak asi. Kan nunzia hi kan sinak lnghtertu asi ti cu chim hau zong asi lo, kan theih dih mi asi. CHIN mi lak ah mifir an karh deuhdeuh, mițhalo an karh, Lainawn hman zei ah kan rel lo caan a phan colh lai hi tihin cun..chim ding tampi a um ko. A kan cawisangtu Pathian kan panh țhan ahcun sui le ngun thingkuangkhat in a neitu kan si. Zum lo tu lak ah ziaza a fel ngai mi an um, an mah le pathian bia in an i țem ruangah asi, cucaahcun Pathian nung a bia tu Chin mi nih kan tuah awk hmasa bik ding cu Pathian Bia in i țem hi asi, kan i țem lo sual ahcun Ar khokhuh on ka mi bantuk kan si peng ko lai. Nu la Pa kan fale zoh khen hna usih, mino kan lung fim cangseh, an sersiam tu Pathian philh hlah tiah Mifim Solomon Siangpahrang nih a kan ti mi kha philh hna hlah usih. "Pathian țihzah nak ahhin thilțha vialte hi ai fun dih i Pathian țihzah lonak ahhin ațhalo mi vialte ai fun dih" by A. VAN S.L. a tlangpi dangah kan peh te lai.
