Dawtnak na ngei cang maw?

Bible cang thim – “A hmun zungzal mi thil pathum an um, cu hna cu zumhnak le ruahchannak le dawtnak an si I cu hna lak i a ngan bik mi cu dawtnak a si” (1Korin 13:13)

Paul nih Korin khua Khrihfabu sin ah dawtnak kong he pehtlaiin ca a kuat mi hna hi mi tampi nih minung le minung karlakah kan tuah ding mi dawtnak ah ruah cio a rak si. Mah hihi kan nganh deuh rua ka ti. Kei kai fian ning ah cun kan I chuahpi mi, minung sinak in kan tuah khawhmi dawtnak a si bak lo tiah ka chim duh. Khah, kan tuah kho hnga maw? A tawinak in Bible cang ka van langhter lai. Dawtnak cu zeidah a si hnga? 1Korin 13:3 ah Ka ngeihchiah thil vialte kha mirethei caah va pe dih in le ka pum tiang hmanh khangh awk ah va pe hmanh ninglaw, dawtnak ka ngeih lo ahcun zeihmanh  san a tlai lo. Minung nih kan lungchung tein kan upat mi hna cu degree sangsang le mirum hna, ram tthattha ah a kal kho mi hna kha si loin m bawmh chanhnak lungthin a ngeimi hna, mahzawn nakin mi zawn ruat deuh, mi va bawmh, thil va pek le ngaihchia mi hna va tuarpi tu hna kha an si. A mah belte cu ngeihmi thil vialte mi rethei mi caah a pe taktak kho mi an um hnga maw? A pe mi zong an um ko lai, mah duhmi caah cun nunnak tiang a pe mi zong an um ko lai.

Zawl Tling le Ngan Bawm, Duh Mang le Dar Din le Romeo le Juliet hna kha a tu tiang an tuanbia chim le ral an si. Mah duhmi caah cun thih a fawi deuh men lai dah. Midang sawhsawh hrang ah mei kangh tiang tuar ngam, nunnak pek cu a awl bal lai lo. Cu tluk tiang a pe tu an um ahcun cucu minung tahnak ah a sangbik dawtnak, minung nih kan tuah khawh mi cu a si ko hnga lo maw? Paul nih santlailo ah a chiah fawn. Cucaah minung sinak nih tuah khawh ding a si lo ning a langhter.

Dawtnak a timi hi zeidah a si ne hnga? 1Korin 13:5 ah “Dawtnak cu tla bulbal in khua a sa lo I amah zawn lawng ai ruat lo; a thin a tawi lo palhnak kha ai cinken peng lo” a ti. Minung lakah a thin hang ballo mi kan um hnga maw? Kan duh, kan dawt deuh mi cung ko ah kan thin a tawi khun a si lo maw kha. Sualnak lei a ruat lo mi the kan um hnga maw? Kan tuah le tuah lo cu um rih sehlaw. Kan tuar khawh lo mi phun a tam tuk fawn. Zeidah dawtnak cu a si hnga? Cun 1korin 13:8 ah “Dawtnak cu zeitik hmanh ah dongh a thiam lo” a ti.

Thawngttha chimnak, theihnak tbk… um hmanhsehlaw, a dih caan a um te lai i tlamtlintertu a rat tikah cun an lo dih lai a ti. Minung cu a thi ding, a lo ding mi kan si, a dih lo dingmi cu zei dah a si hnga? Minung tuah khawh lo ning hi ai fiang deuhdeuh. A dong lo ding thil kha a chim a duh. Dawtnak cu zei cu dah a si hnga? Cun zumhnak thawng te cun pei Pathian cu kan biak i, kan huam lo bu le manh lo bu in kan I khawmh I thawhhlawm zong kan pek cu. Jn. 3:15. Kan thih tikah kan thlarua vanram kai dingmi ruahchannak te cu pei Pathian cu kan biak fom cu. Zumhnak le ruahchannak cu a biapi tuk ko ttung. Dawtnak a ngan deuh a ti mi hi minung le minung kan tuah dingmi dawtnak kha a ngan bik a si ti hi a duhnak a si hrimhrim bal lai lo. Kan I cawnpiak tawn ning cun tuah kan I timh chung poh cu kan tuah rih lo tinak a si. USA kal kai tim kan ti tikah USA kan phan rih lo tinak a si.

Unau hawidawt hna, Paul nih a chim duhnak hi kei kai fiang ning ahcun minung sinah kan tuah dingmi dawtnak kha si loin Dawtnak a ngeitu Pathian kha kan ngeih lo ahcun zeitluk in peknak nun va ngei hmanh usihlaw san a tlai lo tiah a ttial duh tiin ka pawm ning a si. 1Jn. 4:8, Pathian cu dawtnak a si a ti. Bible cheu khat nih 1Korin 13 cung tlangpi khi dawtnak tiah an ttial nain King James Version nih cu The Great Gift  tiah a ti. Pathian nih Afapa kha minung hna caah a kan pek mi dawtnak nakin a ngan deuhmi laksawng a um kho hnga maw? Kannih minung hna nih cun laksawng, lak lawng kan rian a si. 2Timote 1:9, Thil tinak a si lo, laksawng a si a ti. King James Version nih Love timi hi a fianternak ahcun love is one of dynamic terms Paul uses to speak of the holy enabled by the fullness of the Holy Spirit  tiah a ti. Cucaah Pathian cu dawtnak taktak(perfect love) ngeitu a si i minung dawtnak cu a deu (fake love) a si.

Minung dawtnak cu “ruang ah” dawtnak a si. Rum ruangah, dawh ruang ah, chungkhat si ruang ah, phunkhat si ruang ah, rak bawmh ruang ah, herh te lai ruang ah dawtnak a si. Pathian dawtnak cu “zong ah” dawtnak a si. Sifah zong ah, rum zong ah, muidawh zong, muichiat zong ah, bawmhkhawh lo zong ah, mah phung hawi si lo zong ah, zei bantuk mi va si zong ah dawtnak a kan ngeih. Mizo hlasak thiam C.Luri a sak  mi ahcun “Ram dawtu nih ram caah nunnak an pek, miphun dawtu nih miphun caah nunnak an pek, ka Bawipa dawtnak a sanning cu a ral ka caah A nunnak a pek” tiah a sak. 1Jn. 4:7 Dawtnak cu Pathian sinin a chuak mi a si a ti. Minung sinin a chuak mi a ti lo. Cucaah minung nih tuah khawh mi dawtnak a si lo i Dawtnak Pathian kan ngeih a herh ning hi Paul nih a kan cawn piak. Dawtnak Pathian ngei taktak ttung loin Pastor fel, Khrihfa upa fel, zumtu fel hna kan rak si sual lai ti ka phang tuk. San a tlaihlo zia Paul nih achim cang kha.

Vawilei ahhhin party pahnih lawng kan um I, Satan phu le Pathian phu kan si ko. Ai ral mi an si. Jn. 3:6, Rom 5:9. Tahchunhnak ah cozah a dotu tapung hna nih zeitluk in thil ttha tuah in, sianginn sak piak, siiai pekchanhnak lei he a phunphun in rammi hna caah thil ttha tuah hmanh hna sehlaw, Cozah ruahnak ahcun kha tapung pa kha a ral ah a ruah peng bantuk in Dawtnak Pathian tak ngei ttung loin Khrihfabu ca le midang caah kan I pek nak vialte hi cu Pathian nih a ral ah a kan hmuh men lai dawk aw. Unan hna, dawtnak Pathian taktak kan ngeih le ngeih lo hi a tu can bak ahhin ka nunnak dih in um sual ning law, vancung ramttha dawtnak ram ah khin ka thlarau a leng taktak hnga maw? ti hi van I dap hna usih tiah kan sawm hna. Kan ngamh taktak deuh lo ahcun kan ngei lo a si kho men, Satan phu kan rak si ziar kho me. 1Jn, 5:10 Pathian fapa zumtu nih cun mah tein I theihfiannak an ngei a ti. Na theihfian lo ahcunlunghrin awk ngaingai a si ko lai.

A donghnak ah tahchunhnak pakhat tein ka van chim lai. Mizoram, Aizawl ah mirum hna nupa an um, nikhat cu tthen an I tim. An pa nih kan ngeihmi thil vialte lak ah na duh cem mi pakhat in I thim a ti, an nu nih khah kai thim taktak lai I na siang tak lai maw? a ti. An pa ruahnak ahcun building indot ruk a si mi inn kha pei ai thim rua lai tiah a ruah lio ah an nu nih cun nangmah kan thim a van ti cu a lau ko, an nupa in an I kup I an ttap. Hi tluk I a ka dawtu cu kan tthen lai lo a ti. An nu cu thim zia a thiam tuk ka ti. Pakhawt lawng ngei ding kha a zapi tein an pa he a ngeih tthan dih ai. Hi bantuk in dawtnak Pathian cem kan ngeih cang ahcun ro cotu kan si, Paul ni ngeih lomi thil ka ngei lo a ti kha si. Cucaah minung sinah dawtnak kan tuah loo ding a si ka ti hrimhrim lo. Pathian tu kha ngeih hnu ah dawtnak kan tuah mi hi vanram credit ttha tuk a si ti ka chim duh. Biathlam 22:12, mikip an thilti ning cio in lawmman pek dingin ka ralai a ti. Dawtu Pathian ngeih bu I mi cung ah dawtnak tuah mi cu USA nih kan credit an record dih bantuk in vancung credit record a ttha lai I, lawmman pek caan a um tikah suiluchin tthattha hmuhnak hna a si ko lai. Dawtnak na ngei cang maw? Dawtnak taktak cu Pathian a si. 

By 

Pu Phun Tling

Chinchiah// Internet Ministry ca uk chung ta ..ka uar tuk ah ka van share mi a si.