Tuah ding mi tamtuk kan ngei ko lai. Micheu kan tuah mi ca kan mah caah a tthahnem mi a si ko lai, asinain a cheu cu a tthahnem lo mi an si ko lai. A zei va si hmanh ah tuah cio cio a si ko. Tuahnak lei kam in zoh ahcun..Kum zabu 21 ah minung hi an tthangcho tuk cang i, a tthahnem lo mi tuah cu hruh ah ruah a si cang. Um sawh te hna, Game i celh/kah te hna, video tthattha zoh te hna hi kan caah a ttha hnemnak a um lo nain mitampi nih kan tuah mi an si, thil dang tampi a um ko.
Fimnak an ti, a phunphun in kawl cio a si. Fimnak hi a tlangpi in zoh ahcun, asiloah tu lio mitampi zoh ning in zoh ahcun fimnak timi hi pakhat hmanh ai khat lo. Fimnak hi tamtuk a um hlah maw? Cawnnak, Theihnak, le Fimnak timi hi mifim kan timi hna i an mark cu a si ko. Ca tangsang deuh an si le mifim kan ti ko hna,asinain kan huat mi si cun nemmam.
Theihtlei le Thiamnak te hna hi vawleicung ah cawn khawh mi thil an si. Na cawn ah cun na theih ko lai, na thiam khawh ko lai. Cawnnak men hi fimnak tiah kan ti kho lai lo. Kan Pi Daw Aung San Su Kyi nih cun “ nu le pa tampi nih cun kan fale degree an laknak an hmanthlak kan in vanpang ah tar hi kan duh bik mi a si, asinain fimnak timi hi degree lak lio hmanthlak le certificate ah a um lo. Fimnak timi cu thil pakhat a cang mi kha zohthiam, tuahto thiam kha a si. Degree sangsang ngei pawl nih thil cang mi an zohthiamlo, a tuahto ning cang an thiam lo ahcun zeitindah mifim cazin ah kan khumh khawh hna lai” tiah a rak chim bal.
Mitampi nih kan ti sual mi, kan lungput hmanlo mi pakhat cu ‘kei cu midang bantuk in ca tang sang ka kai lo, cawnnak ka ngei lo, thiamnak ka ngei lo” tiah kan ti tawn, mah le mah i hlennak nganpi a si.
Fimnak taktak a ngeitu cu Pathian a ttihzahtu pawl lawng an si. Fimnak taktak cu Pathian sin in a ra mi a si(Phungthlukbia 19:7;119:30). Na nunnak ah Pathian na ttihzah taktak a si ahcun, mi dang mit hmuh ah a fim mi na si ko. Na tuahttuanmi ah na hlawhtling ko lai, harsatnak nih na phak tik zong teitu na si ko lai. Asinain na ttihzah taktak lo ahcun na duh ning in thi a um lai lo. Bible hi rel lengmang, cun nunpi khawh i zuam law mifim nih cawn khawh lo mi fimnak cu Pathian nih an pek ko lai. Fim na duh cun Pathian ttihzah law na fim lai.
0 comments:
Post a Comment