Liam ko law…..

Ka ngeihchiatnak, le lawmhnak caan hna cu an liam dih cang. Dawtmi hna he nuam in lentti caan hna kha an liam dih cang. Dawttu, faktu hna zong an liam dih cang. Aw !! nun hi a har ko. Mi pakhat caah hin na nunnak na pek khawh men ko lai, thinhan caan hna ahcun a ho poh thih kan ngamh dih ko. Kan dawt mi hna caah ah ‘ na caahcun zei poh ka tuah huam ko lai’ tiah bia thlum ngaiin kan chim tawn. Asinain mipakhat caah nun timi hi na ruat bal maw? Phaisa va tthenh ringring, a si lo ah va cawm timi hi thil har taktak a si. Cucu a caah nun timi cu a si.

Tu kan chan ah cun mipakhat caah a nung ngamtu kan herh hringhran. Kan Bawipa Jesuh Khrih nih va kal u law, ka caah nan nunnak va pe uh A ti lo i, va kal u law ramkip ah ka thawngtthabia va chim uh tiah a kan ti deuh.

Mitampi cu an buai, an i hua, zeicahtiah a liamcia caan i thil cang mi ruang ah a si. Kan Bawipa Jesuh Khrih cu a liam cia caan ah minung hna nih kan hlawtnak kha biapi ah chia lo in tangdornak he kan mah khamhawk a ra. A liamcia caan ruang ah na innpa, hawikom, le na chungkhat unau he i rem loin nan um sua maw?

Biafim pakhat nih cun “ thin hang in an tuahtu le ngeihchia in an tuahtu cu na lungthin a si, cucaah na lungput cu thleng diam ko” tiah a ti. Kan lungthin hi a biapi bik,,, a liamcia caan kan ngeihchiatnak tbk hna kha philh i zuam ding hi Jesuh Khrih nih a duh mi a si. Ka piangthar ti i pianthar hlan bantuk in duh poh in nun, a tlu i a kiak dih mi zumtu siding hi Bawipa Jesuh Khrih nih a kan duh piak hrimhrim lo. Kan Laimi tampi kan buaibik nak cu a liamcia caan ruang ah a si.

Na chungkhat unau, nu le pa nih an in bawm kho lo men lai, asiloah na nu le pa chungkhat kha na duh ning in na bawm kho men hna lai lo, asinain na lungrawk hlah a liam cang mi an si, a ra lai dingmi caan chung ah na bawmh khawh hna nakhnga i zuam ding kha na rian biapi a si ko.

Liam ko law ka ning zahnak
Liam ko law ka thinhunnak
Liam ko law ka tuahsual mi
Liam ko law ka tlakchamnak
Liam ko law ka nun hlun

Nun thar in a nungtu si ding hi, vawlei phung zong in hlawhtlinnak a si. “Mi puitling ka sinak pakhat cu a liamcaan nih a ka hruai lo i, kei mah nih ka hruai deuh hi a si” tiah Anthony nih a rak chim bal.
Careltu caah thazang laknak cabia a si khawhnakhnga Pathian nih thluachuah kan pek piak ko seh.

Posted via Blogaway