Innka a hun peng ko

Innka a hun peng ko (1Samuel 14:16-15:3)

Jonathan ni Filistin ral cu a hun tuk hna i nichuah nitlak chaklei thlanglei ah an zam len ko kha Saul ralkap hna nih cun an hmuh hna i, tuk an kan timh cang tiin an ruah. Saul ni a fapa Jonathan cu an sin i a um lo kha a hngalh i amah nih a tuk hna caah a si lai ti cu a ruat ko. An kan tuk tthan ahcun an kan tei sual lai ti a phan caah Pathian kuang kha hika ahhin ratpi tuah u tiah a ti hna. Pathian kuang cu Kiriat-Jearimin an rak i putmi a si i, ral an tuk tikah a kan bawmtu a si tiah an ruahmi a si. Ahejah nih Pathian kuang cu raltuknak i ratpi ding in a timh cang nain Filitin ral cu an dai ko ti kha Saul nih a theih tthan caah ratpi a hau tthan lo tiah a ti. Filitin ral pawl cu Jonathan nih a tuk hna caah an lau i an i tuai ur ko ti a theih caah, cu lio te ahcun  Saul siangpahrang nih cun a hun nam chih ciammam hna i Filistin ral cu an tei dih hna. Cu bantuk in an tei hnanak cu Jonathan le a ralthuam putu pa nih Mikmash lungpang I an va tuk hna caah khan a si.

Saul nih zeitin a si caah dah ral kan tei ti hi a hngal lo. 

Pathian he ai chawnbia lo mi hruaitu cu an buai tawn. Saul cu Pathian he i pehtlai lo le i chawnbia hmasa loin amh duh in khua a sa tawn. Cucaah Filitin mi he ral an i doh tika hin Pathian nih a hruai lomi bantuk in a tlau cang. Pathian he ai chawnbia lomi hruaitu cu anmah nawlngeihnak bochan in rian an ttuan tawn. Saul nih a ralkhap hna cu, ral kan tei hlan lo zeihmanh nan ei lai lo tiah nawl a pek hna i bia a kam ter hna (14:24). Saul ralkap hna cu ral an tuknak ah an rawl a ttam cang i an pawng ah khuaitizu ei awk tmapi a um ko nain ei lo ding in Saul nih bia a kam er hna caah a hohmanh nih an ei ngam lo. Saul nih nawl a pekmi hi hruh thil ngai a si ti an thei ko nain an bawi a si caah a ngawl cu an zulh ko. Asinain a fapa Jonathan nih cu nawlbia cu a theih ve lo caah khuaitizu cu fungin a tawh i khim tein a ei i a thazang a um. Asinain a pa nawl pekmi cu a buar a si ko. A pa nih order a chuahmi le biakamnak a tuahtermi  hna cu aherh lomi le hruh thil a si ti kha a langhter. Hruh thil cu a si tak ko, cucaah cun pei a rawl a ttammi ralkap pawl nih  khuaitizu cu an ei ngam lo, asinain khua a hung dei tikah an rawlttam cu an celh ti lo i, hranchaw an lakmi caw le tuu hna cu an thah i a thi he sa cu an ei kha. Saul order cu an zul ko nain cu nakin a sual deuhmi cu Moses nawlbia an buar kha a si. Saul nih a chim awk a hngal ti lo i an sual thianhnak ah raithawinak tuah a hau cang. A ralkap pawl thil tthalo a tuahtertu hna thil sual kha thil ttha ah ser ai zuam. Hi thil umtuning kan ruah tikah Pathian chaw hmasat loin amah nawl in khua a sa i a buaimi pa ruangah a si ti hi a lang. A ralkap hna sualnak cu a hmuh, asinain amah palhmi cu ai hmu lo. Cu bantukin mi cungah sualnak na tuah ko lai,,asinain Bawipa cung ah va sual hlah (14:33,34).

Saul nih hin Filitin mi hna i thazang bak in tei le thah a duh hna. Asinain Saul cu amah duhnak lawng in rian a ttuan caah Amalek ral a tuk tikah cun a sung tiah a dal 17nak ah kan hmuh. Tlangbawi Aahijah nih ruahnak a pek i, zei ruang ah dah Amalek ral kan tuk ah khan kan sungh, zeidah ka palh tiah Pathian chawn tuah tiah a ti. A hnu ahcun Jonathan nih a pa order chuahmi kha a ngalh lo ca i nawl a buar kha a hung lang.

Pathian nihcun a mihna na I hrim tthan khawhnak caah innka a hun peng ko. Pathian nih Samuel hmangin Saul sinah bia a chim peng ko. Hebru 3:7 ah “Ni hin ah aw nan theih ahcun…’ a ti bang in ahohmanh sual ngaihchih I mithar si tthannak ah Pathian nih bia a kan ruah peng ko. Samuel cu Pathian bia he Saul sinah cun a ra. Saul a sual zong ah Pathian nih a hlaw lo ti langhternak caaah a si. Ahohmanh kan sual cuahmah lio zong ah Pathian nih a kan hla lo I kan caah innka a hun peng ko tinak a si. Pathian nih chiti an thuhmi na hloh lo ahcun na caah innka a hun peng ko. Samuel nih Saul cu “Pathian chiti kan thuh I na cung I Thlarua a tlun lio kha na philh cang maw?” a ti men lai dah, “Pathian na sinah a um rih ko, va kal law Amalekmi hna kha va tu hna” ti tu in a va ti. Amah Pathian nih a ca rianttuan awkah an auh lio a si caah innka a hun peng ko. Pathian cu Saul sinah a ra I, “Amalekmi hna cu tu hna..”tiah a ti. Pathian nh a rianttuan ding I a kan thlah tikah hin zei tik hmanh ah a kan kal tak ballo..innka a hun peng ko.

Baibal bia in phungchim