Zalonnak

Zalonnak

Minung nih kan duh bik mi cu Zalonnak hi a si ve. Zalonnak um lo hin hi vawlei cung thil hna hi zeihmanh an si lo. Zalonnak timi cu “mahlung duh tuah” tiah a sullam langhter khawh a si. Phaisa tampi na ngei ko lai, asinain zalong tein na hman khawh lo ahcun zeihmanh a tthahnem lo tluk a si ko. Kan u, kan nu le pa pawngkam hi kan huam lem lo, zeicahtiah kan za a lon lo ruang ah a si.  Zalong tein kan um kho lo.

Kan zalonnak hi kan thazang a rak si tihi kan i fiang tawn lo. Kan nih Laimi ko hi kan zual, kan fale an zalo cun an duh poh in an um lai ti kan phantuk nak ah ralchia dihlak in upat pi tiang mah te hmanh dir kho lo in kan tuah hna. A taktak ahcun zalonnak nih nunnak sullam hi fiang tein a langhter khawh.

Hollwood movie minthang a si mi “Troy” kha a zoh ka cim lo a titu an tam hringhran. Kha movie ah khan, cawntlak tampi lakah pakhat cu Greek siangpahrang le a tlangchuak pa ruahnak an i cheuhnak hi a si. Greek nh Troy lak hi a duhbik mi a si. Asinain  Greek siangpahrang Agamemnon ruahnak a cheu tu pa nih “Troy khua tuk i tei ding hi cu a ropui tuk mi raltuknak a si lai caah, teitu kan si khawhnak ding caah cun raltuk thiam Achilles hi kan herh lai” tiah a ruahnak a chim. Siangpahrang nih cun “Achille cu a mah duh poh in a um mi pei a si” tiin a tthatlonak cu a van chim colh. Ruahnak cheu tupa nih cun “ Hi raltuk nak ah teinak kan hmuh khawh nakhnga caah cun Achilles hi uk loin a mah duh ning tein ral a tuk nakhnga zalonnak kan pek lai” tiah a ti.

Zalonnak cu kan thil ti khawhnak langhter tu a si, mikuttang ah ttem buin zeitindah mi pa pakhat cu a thil ti khawhnak a langh khawh bal hnga? Cucaah zalonnak hi thil kan tuah khawhnak langhter tu, biapi tuk mi a si. “Minung nihhin zalonnak a hmuh taktak lawng ah biatak a theihthiam khawh” tiah Richad Wumbrand nih a cauk ah a ttial. Pathian nihhin zalonnak a kan pek, cucu kan mah ahhin a chiah, cucu duhthimnak kan ti mi cu a si. Kan duhthimnak hi thil a ti kho tuk mi pakhat a si. Cu tluk thil a tuah kho tu cu zalonnak he hmantti a si tik lawng ah a chuak tawn. Kan Khrihfabu ah, Innchungkhar ah, pumpak cio ah zalonnak hi kan thil ti khawhnak a langh nakhnga kan herh. Zalonnak ka ti tikah duhpoh in ningcang lo in um khi chim duhmi a si lo, ningcang tein, a hman ning tein zalonnak hi hman thiam kan herh tuk. Thihphaihnak awkam lawng lawng kan pawngkam ah a thang, thilsining tiang nih a rak langhter ve, asinain thinlung dam tein, thinlung  zalong tein thildangdang, ttihnak maw, lunghrinhnak maw, thil dangdang pakhat hmanh chia loin kan i tinhmi lam zawh ko hna usih..tihi ka chim duh mi a si.