Luatnak caah Zumhnak

Luatnak caah Zumhnak

Saul Siangpahrang cu Bawipa hmai ah sualnak nganpi a tuah hnu ah raltuknak ah a kal. Filistin mi hna cu phuthum ah an i tthen i hriamnam tling he Israel mi cu an van fuh hna. Israel mi cu an ttih tuk ah an thlarau an chung ah a um lo. Saul zong a minung an zam lengmang caah a lung a dertuk ve. Asinain Bawipa ai bochanmi Jonathan le a hawipa thawngin teinak an hmu. Cu hna pahnih hna cu zumhnak le raltthatnak in a khat mi an si.

1.Israel pawl nih Filistin mi cu an ttih tuk hna. Tliknak zamnak khua lawng an ruat ko. Asinain teinak le luatnak cu an pawng te ah a um ko. Jonathan caankhat le cawlcanghnak nih a luatter  ko hna.

2.Minung pakhat a hman. Ni khat cu a um ballomi ruahnak pakhat Jonathan nih a ngeih. Pumpak raltthatnak le zumhnak hi Pathian nih a duh. Amah zumtu hna cu, raltthat i luatnak le zalawnnak sertu si ding kha a kan duh. Sualnak in, Satan puar pennak in luatnak hmuh a kan duh. Mifapa nih an luatter hna ahcun nan luat  taktak a si.

3.Jonathan zumhnak cu rian  ah a lang. Jonathan thinlung ah a ummi cu Filistn pawl umning hi va ngia hnik usih ti hi a lungthin ah  chuak. Cucu a pahmanh a chim lo, Bawipa zong nih a pek mi ruahnak a si lo. Saul le Eli le an ralkap hna cu an pawngte ah an um ko. Saul nih cun teinak cu a ruah in ai ruahchih ngam lo. Jonathan zumhnak cu Saul le bawi le nih an sualmi order nak in san a tlai deuh. Jonathan le a hawipa cu lungpang in an kai i Filistin mi kha an va bih hna. An lungchung ah minung tlawmtam hi biapi a si lo, ralteinak cu Bawipa ta a si tihi an zumh i Bawipa ah an i hngat dih. Jonathan nih a zumh bantuk tein cun a tuah ve. Zumtu tampi lungthin chung ah Bawiap nih ruahnak a chiah tawn. Cu ruahnak cu zumhnak in a ra i kan zumh bantuk tein rian ah langhter colh ding a si ve. Bawipa nih a ka fial tiah kan ti ko nain kan zum dih taktak lo, lungawttawm in kan um tawn. Bawipa caah ttuan ding tiah na lungchung i bia a rat poh ahcun tampi in tuaktan ta hlak. Tho law tuah colh ko. Cucu Bawipa duhning a si i Bawipa ni thlua a chuah ko lai.

Saul le a bawi pawl cu beidong ngaiin thingpi toi ah an tthu. Jonathan tu nih cun “cuarpartan lo rual nih maw Bawipa minung hna cu hna an kan hnawh ngam? (14:6) a ti i a ral ai ttthatter chin lengmang. Bawipa cu Pathian a si, Bawipa cu zeihmanh nih a dawn kho lo. Teinak cu Bawipa ta a si tiah thazang a la. “nangmah le kei mah hmang in Bawipa nih teinak a kan pek lai” tiah a hawipa kha a ti.

4.Bawipa nih Jonathan cu alung a tthawn ter chin lengmang. A ralthuam a putu pa nih Jonathan bia cu a zumh ve i Filistin mi riahbuk hram tiang Bawipa hruainak in a thli tein an vakal. Jonathan le a hawipa nihcun an vainam in Filistin mi pakul kha an thah hna (14:12). Cun Filistin mi lak ah launak a um ciammam i a thir in an thir dih, vawlei ai hnin i launak nganpi nih a tuam hna i an zam dih.

Jonathan cu a zumhnak nih teinak luchin a chinh, Hebru 11:34 i ‘ramdang mi ralkap kha zumhnak thawngin an tei hna timi bantuk khan arak si. Kannih ve zong zumhnak thawng in luatnak le daihnak kha kan mah pumpak cung ah siseh, kan Khrihfabu chung ah siseh a phurhtlunhtu kan si ve awk a si.

Baibal bia in phungchim