Saul nih a pennak a thlau

Saul nih a pennak a thlau

Sual cu harnak nih a chuah hnawh chin lengmang, Samuel cu hngak kho loin, amah duhnak tein Bawipa nawl cu a rak buar. A nawl ngaihlonak a chuahpi tu cu kei hi siangpahrang ka si ve, zeipoh ka tuah kho ve ti ruamkainak lungput kha a si. Kan nih ve zong kan thil ti khawh nak le kan fimnak kha uanthlarnak in ningcang loin kan hman ahcun thil ttihnung ngai nih a kan tlun hnawh ve ko lai. Saul cu siangpahrang a si, ukna lei vialte tlai dihtu a si. Samuel cu Profet a si, Bawipa biaknak lei vialte ah nawl ngeitu a si ve. Sual nih amah rian a si lo mi pi tuah kho ah ai ruah cu ttihnungza a si. Cu bantuk in Khrihfabu ah vawlei lei rianttuantu nih Pathian rianttuannak ah kan i thlak awk a si lo, Pathian rianttuantu hna nih an tuah awk a si deuh. Ttuanvo ngei lo mi nih Bawipa rian ah ningcang loin kan vai thlak awk a si lo. Vawlei rensang sinak in Bawipa rianttunak zeirel lo in um cu ttihnung tuk mi a si. Bawipa serhsat cu cimihnak a si. Uknak lei rianttuantu tampi nih Biaknak an ttanhnak cu anmah dirhmun fehnak ca menmen ah a si. Bawipa nih Amah biaknak ah hnahnawhnak apetu cu teirul a cham tawn hna. Saul nih Profet Samuel cu a caan te ah na rak phan lo tiah a mawhchiat lehlam. Minung nih cun kanmah tlamtlinnak caah caan kha kan hngak i, Bawipa nih cun Amah sunpernak ding caah caan kha a timh. Saul cu atuahmi cungah khan a lung a tling, palhnak ka ngei lo tiah thanuam ngaiin Samuel kha a rak biak chawnh (v.10).

Samuel nih Saul cu fakpiin a mawhchiat(v.11). Saul nih a sualnak le a tuah lo dingmi a rak tuahnak kha Pathian sin le Samuel sinah phuang in ngaihthiam rak hal hna sehlaw thil hi a rak ttha phum ko hnga nain a sualnak kha ai hmu lo i cu bantuk sual phuannak le ngaihthiam halnak cu arak tuah lo. Cuaah a sualnak cu ngaihthiam a si lo. Bawipa nih Israel pennak cu Saul chungkhar in hram a thok nain Bawipa nawlbia a zulh lo caah a pennak cu chuh a si. “Na pennak cu zunglzain Bawipa nih zunglza in a hmuhter lai”(v.13) ti a rak sinain a tu cu “na pennak cu midang sinah pek asi cang lai” tiah Samuel nih a ti.

Saul cu Bawipa hmaiah sualnak pakhat hnu pakhat in a tuah chin lengmang. Voikhat sualnak nih sualnak dangdang tuah kha a lem chin lengmang. Saul tuanbia kan zoh tikah tthatlo nak hme tein tthatlonak lianpi a phanh tiang a zul chin lengmang.

Saul bantikin kan si ve sual maw? voikhat sual tuahnak nih sualnak dangdang chung ah a kan luhpi chin lengmang nakhnga lo, Bawipa sinah i mer tthan i kan sualnak kha a mah sinah phuang in ngaihthiamnak kan hal awk a si. Bawipa nih ngaihthiam a kan duh, ihrimtthan a kan duh, khamh a kan duh, thluachuah pek a kan duh.

Peter nih “Kan unau hna nih kan cung i an sual tikah voi zeizat in dahkan ngaihthiam hna lai, voi sarih ngaihthiam hi a za maw?” tiah Jesuh kha a hal. Jesuh nih voi sawmsarih let sarih in na ngaihthiam hna lai tiah a ti. Pathian nih a zungzal in mi sualnak ngaihthiam ding kha a kan duh mi a si, cucu Amah sining zong a si ve. Saul zong hi Pathian nih ngaihthiam a rak duh ve ko lai. Muihnak le sualnak chung in, Pathian sin kirnak lam a um, nangmah luhnak ding caah, Innka huncia in a um. Na sualnak ngaihchih buin Kalvary vailam ah ra tuah. Saul cu a sualnak ai hmuh lo caah ngaihthiamnak  a ngei kho lo. Cu nih cun a pennak a sunghter i rawhralnak nih a tlun hnawh. Saul bantuk in sual hmanh u si law, kan sualnak kha Bawipa sinah kanphuan i ngaihthiamnak kan hal ahcun Jesuh Khrih thisen thawnin sual ngaihthiamnak, zungzal lununnak le thluachuahnak cu kan hmuh hrimhrim lai.

Ref; Baibal Bia in Phungchimnak 1Smuel