Pathian Thimmi kan si

Pathian Thimmi kan si

Bible cang thim: 1Peter 1:9-10 “Sihmansehlaw nan nih cu thimmi miphun siangpahrang tlangbawi, miphun thiang, Pathian miphun hrimhrim nan si. Muihnak chung in amah ceunak chung ah an kotu hna Pathian nih khuaruahhar mi thil a tuah mi thanh awkah nan nih cu an thim mi hna nan si. Hlan ahcun nannih cu Pathian mi nan rak si lo, sihmanhsehlaw a tu cu nan si cang; hlan ahcun Pathian zangfahnak kha nan rak hngal lo, sihmanhsehlaw a tu cu a zangfahnak kha nan hmuh”

Peter nih “nan nih cu” a timi hi Khrihfa chungkhar in a chuak mi umtu hna tinak si loin hngakchia chuakka bantuk in Thlarau hnuk a duh i a tthang mi lungmawng bantuk in Thlarau biakinn saknak ah a tel mi, cohlan awk a tlak mi Thlarau raithawinak kha Pathian sinah a pemi zumtu hna tinak a si. cu bantuk Khrihfa hna cu thimmi cu kan si. A kan thim tikah sullam a ngei loin a kan thim lo. A kan thimnak sullam cu:

                -Thluachuah pek a kan duh caah a si. Acts sianginn ka kai lio ah mirum pa pakhat a ra, sianghngakchia bomhding a rak kawl. Cu pa nihcun keimah a ka thim i a tu tiang in a ka bomh zungzal ko. A caah tuah khawh mi le san tlaihnak ka ngei lo. A rak ka thimnak cu keimah bomh ding ca lawng ah si lo. Pathian nih a kan thimnak le a kan thluachuahnak hi philh hlah usih.

                -Amah thangtthattu ding ah a kan thim. Sermi thil hna lakah minung lawng hi thlarua a kan pek i fa taktak sinak a thei mi hna lawng nih sertu  Pathian cu thangtthat khawh a si. K fanu te cu kan ram ah kum 4 chung ka chiahtak i ka va tlun tthan tik ah a rak ka thei ti lo. Midang tu kha “ka pa” tiah a auh hna. Ka hmuh tikah ka lung a fak ngaingai. Pathian sermi minung, a fale hna nih amah kan theih lo i kan mer tak tikah Pathian zeitluk in dah a lung a kuai hnga. Pathian kan Pa cu thinlung tak tein thangtthat hna usih.

                -Amah riantu ding ah a kan thim. Laimi aiawh in bawlung kan chuih lio ah Lai miphun vialte hmaihngal tertu le minthan tertu si kan i zuam bantuk in Pathian nih a ram le amah miphung hmaihngal tertu ding ah akan thim ve. Cu kong tu ruat loin duhpoh in a nung i a um mi zumtu cu Bawlung a chuih sawhsawh I phaisa a ei mi bantuk men kan si. 

Rev. Herbert. Tum Ceu 

January 28, 2001 

Internet Ministry cauk chuahmi