Mi mithmuh ah na sinak hi na sinak taktak a si lo

Mi mithmuh ah na sinak hi na sinak taktak a si lo

Filistin ral nih Israel miphun cu an miphun ning in an ci kan hloh dih lawlaw lai tiin ralkap tampi he timhlamhnak nganpi an ngei. Hi lio caan ahhin David hi hngakchia te a si rih ko. Samuel hmang in Pathian nih Israel siangpahrang si ding in chiti a thuh ko nain tukhal rian a ttuan peng rih ko. A u le zong nih zei pi haw ah an chia lo, a pa hrimhrim zong nih rian lian deuh fialtlak ah a ruat rih lo.

Mifim tampi nih an chimmi cu kan rianttuan mi hi kan sinak a si tiah an ti tawn. Cucaah rian sang ttuan khawh hi a ho poh nih kan i zuam dih mi a si. Lothlo pa cu lothlo rian a ttuan tinak a si ko. Cozah rianttuantu cu cozah rian a ttuan tinak a si ve ko. Pathian rianttuantu cu Pathian rian a ttuan tinak a si. A zei hi dah nai thim hnga? Kan tthat deuh hincun Pathian rianttuan hi cu a te nau ah a ruattu kan tam deuh. Hihi Pathian bia kan i fian ning a niam tuk rih ruang ah a si. kan chiat deuh cun Pathian rianttuan kan i tim. Kan ram ah a ho dah Pathian rianttuan lo ding khawp in mi ngan a um hnga, vawlei cung ah the a ho dah Pathian rian ttuan awk ah a sinak a sang tuk mi a si hnga? biatak tein ruah ahcun ningzak kan si ko. Kan rian hi a biapi a si lo i Pathian timhpiak mi rian a si ding tu hi biapi a si. David cu siangpahrang si ding a si ko nain sin um men a ttuan hlei ah, a u le siseh, a pa hmanh nih rian ngandeuh fialtlak ah a ruat lo. Kan rian hi kan sinak a si an ti mi hi a dik nak zawn zong cu a um ve ko, asinain a dik dih lo ti hi David tuanbia in kan hmuh khawh. Pathian nih an timhpiak mi na sinak cu na sinak taktak a si.

Rianngan deuh ttuan tlak hmanh ah an ruah lo mi David cu zeidah a tuah khawh zoh tuah hna usih. Filistin ral nih cun Isreal pawl cu ttihnak pakhat te hmanh ngei loin an van fuh hna. Saul le a ralkap tu cu an thin a phang, an awn au ngam lo. Zeicahtiah Goliath nih pakhat tete in rak chuak uh tiah khat lei tlang in a hauh lengmang hna. Saul hrim kha a min fang khek in a zuamcawh( 1Sam. 17:18). Cu ti an um lio, an thawpi hmanh chuah ngam lo in an um lio ahcun David cu a pa nawl ngai in a u le sin ahcun a ra ve. Goliath nih Isreal ralkap hna cu ni 40 chung ah a rak hauh cang hna. David nih cu thawng a theih tik ah, doh ai thawh. Siangpahrang si ding ah chiti thuh mi a si bang in Filistin ral teinak ding caan tthan zong Pathian nih a serpiak.

Kannih cu Thlarua Thianghlim nih Bawi Jesuh Khrih kan cohlannak thawng in a mi si awk ah chiti thuh mi kan si. Cucu harsatnak phun zakip tuar awk ah a si lo. Thluachuah kan hmuhnak hnga ca tu ah a si. Amen. Amah belte cu Abia kan  ngieh, a ram le felnak nak kan kawl hmasa a hau. Cucu a cung i kan langh ter cuahmah mi David nun hi a si kan ti khawh.

A tuanbia kan theih  dih mi si ko. Goliath cu Davih nih a thah. David nih mintthatnak vialte cu a lak dih, mipi nih siseh, siangpahrang nih siseh an sunlawih. Kan nunnak hi a ro in, mi nih zeirel loin an kan um ko lai. Kan chuahpi unau, nu le pa tiang nih anih cu zei a si lem lo tiah timi kan si men lai. Hi zawn ahhin mitampi nih cun kan i palh tawn. Mi zeibantuk ka sihmanh ah a ka cawisang khotu Pathian a um ti kan thei kho taktak tawn lo. An kan remlonak te cu kan lungkil ah kan chiah i lehrulhnak lam kan kawl tawn. A siloah lungkuai in kan umnak ah kan si hna dingmi tiang in kan si lo phah. David nun in thazang la tthan hna usih, siangpahrang si ding ah chiti thuh mi a si ko nain a pa nih tu a khalh ter ko, siangpahrang pakhat pi hmanh nih a ttih tuk mi Goliath cu a hngawng a tan khawh ko nain sinum dirhmun fang ah a sinak a kai. Hi vialte hi Pathian timhpiak mi an si i, cu thil a tuah khawhnak cu Pathian ttihzah buin daitein a umnak ruang ah a si. Midang nih an in thangchiatnak le an in fak nak le zeirelloin an i umnak tbk..hna hi na sinak a si lo. Pathian nih an timhpiak mi na sinak taktak na phak khawh nak hnga..Amah ttihzah tein caan hman hi a biapi bik mi a si.