Zumtu pahnih bia elnak

Zumtu pahnih bia elnak

Zumtu nifatin kan nun hi a fawi lomi nun a si. Midang ngeih thiam nun hi zumtu nun a si. “Mi dang sualnak kan ngaihthiamnak bang in kan sualnak kan ngaithiam ve tuah” tiin thla nan cam lai tiah a zultu pawl a cawn piak hna.

Tuchung zumtu hna karlak ah bia elnak a chuah tika, Pathian hi minung sisehlaw cu a lungmih in a tlu lai dah. Hi kong hi mitampi kaa in ka theih mi a hmantaktak mi an i sik ning le keimah zong nih ka ton mi zumtu  pakhat le pakhat kar lak bia elnak a si. Biafakfak in an i timi cu ka langhter lai lo.

Zumtu pakhat deuh nih a chim mi cu..Ka tuah lai ka ti mi cu tuah a si ko, ka duhlo ka ti mi cu duh lo a si ko. A ho bawmhchawmhmanh ka hau lo, keimah tein ka dir, keimah tein kai cawm, a nih rawl fangkhat hmanh kan ei lo, zei ahdah ai rel. A ngamh zat ka ngamh ve. A um ning hi a hmanlo, kei Pathian nih a ka um pi, Pathian ka lei ah a ttang. Dawtu dawtnak hmanh a thei thiam lo. Tuchan Laimi pawl hi Paul ra sehlaw zeitluk in dah a phomh hna hnga?

A bia chim mi hna hi a hman lo nak na thei maw? a hman dih mi a lo ngai. Asinain pakhat te hmanh a hman mi a um lo. Bible kalh holh hrang lawng te an si hna.

A Dang pakhat deuh nih a chim ve cang. Pathian nih ka sual le sual lo a theih dih,, a ho dah a hman ti zong hi a theih dih, Pathian rian kum cuzat ka ttuannak ah hi bantuk zong ka tong bal lo, a mah lawng hi ka ton hmasabik mi a si. Mah ai ti tuk, mi zei ah a rel lo, zeihmanh ah ka rel ve lo. A buhfang fangkhat hmanh ka ei lo. A mah lo in ka um kho tuk. Chungkhat zahlawhrualchan tiah a mahnak in ka ngei ttha deuh. Thinhan thiam lo ah maw mi a ruah, Jesuh Khrih hmanh biakinn ah a thinhang i cabuai a leh dih hna…tam chim hau loin an chim mi pawl hi awkam dawh cu an si hrim lo.

 Mizo pa nih nihchuak a saih mi ah; “ Pumpululh chuih an i tim, cutikah khat leiphu in pakhat nih thla an van cam, ka Pa Pathian pumpululh kan chuih cang lai, teinak kan duh i teinak rak kan pe ko sawh, sihmanhsehlaw khat lei phu zong nih teinak an i hal ve lai va si kaw..aa…a buaithlak tuk rak cawlcang duh hlah” tiin thla a cam a ti. Cu bang zumtu nun hi a si  ve ko cang hlah maw? Hi hna pahnih ahhin a ho cu dah a dik deuh hnga?

Pathian hi kan mah duhnak ah kan ttan ter tawn. A ka ti ahcun ka leh ve ko lai ti lungput cu chirhchan ttha taktak he kan i tlaih. Jesuh Khrih nih mi a cawnpiak ning he cun ai khat bak lo. Zumtu a si mi nih cun a si khawh chung in nan awkam tiang in nan i ralrin a hau tiah Paul cakuat chung ah kan hmuh.

Awkam ttha lo te hna hi kan pupa hna chan ahcun an rak duh lo mi a si. An rak ttih tuk,,cun awkam tthalo ruang ah thih ngamh in an um, zeicahtiah awkam tthalo in mipakhat an ti tik ah kha pa caah ahkhan thluachuah a um lo ti an rak zumh. A hleicein fale cung ah. Tuchun zumtu zong kan si ve, awkam ttha lo hi kan Pathian nih a duh lo mi a si. Cucaah kan fale hna hi awkam tthalo in chawnhbiak ding an si lo. Paul nih nan awkam chuak hna cu thlauchuah a um mi lawng te sihnaseh  tiah a ti. Zumtu nun hi Lei titsa nun he cawh sual lai ci. Ai dang tukmi nun a si ko nain kan theithiam kho lo. Rom cakuat chung ah nunning thar in a nung mi kan si zia kan hmuh khawh.

Zumtu pakhat le pakhat karlak ah buainak hna hi dai tein ziam ter sisehlaw. Ngaihthiam nun tu nih kan luah ko seh….

VANVA