 |
| Tlangpi Khua Sianginn |
Thal caan ah zeidah kan tuah awk a si (Tips)
Tthal caan nih kan neih deuhdeuh cang. Sianghnakchia tampi
thinlung cu a vak a vai. Sianginn khar a si cang lai caah, khar chung ah zeidah kan tuah hna lai? Kan ram ah a ummi mino hna hi tthal caan ah zeidah kan
tuah hnga?
Chantiluan zoh in minung hi nun a rak herh tawn ve. Chanman
lo mino si ding hi phan um bik pakhat mino hna zuamcawhtu a si. Fimthiamnak hi
a santuk cang ca ah, tuchan mino tampi cu a tlik in a tli. Fimthiamnak duh in a
kawl tu hna cu Pathian nih thlua a chuah hna caah an kawl mi cu an hmuh khawh.
Leicung nun nuamhnak hna hi tthanchonak dawn khamtu an sit awn. Vawlei cung ah
ram tthangcho hna ram kan zoh hna tikah dinh caan hmanh ngei lo dengmang tiang
in rian an ttuan,, a chuk a cho ah an vak. Felnak a ttanh i mi picang si
khawhnak ding lam an kawl. Khua an ruat
i hmailei an nunnak ding Lam an i sial khawhnak hnga nu le pa nih bawmhkhawh
lio ah biatak an rak chuah ve. Teimak nak hi an lunglawmhtertu pakhat a si. Hi
ti hin an um hnu ah mi tthangcho pakhat ah an hung cang.
Laimi mino hna nih sianginn khar caan ah zeidah kan tuah ve
lai. Khua ah maw kan tlun lai i, rocar ngai in kan tthut sawh ko lai. Motor
Cycle in maw kan vah sawh rih ko lai. Kan nu le pa , unau ttuancia maw kan i
nuamhpi rih ko lai. Laimi mino tampi cu mah le khua cio ah tlun i zei tuah ding ngei lemlo in um sawh
rian a ttuantu kan tam. Tinhmi a ngei lo mi kan si ahcun zangfak mino kan si
ko. Sihmanhsehlaw tinhmi hngetkhoh kan neih ahcun THUAM CAK nak hmanh in kan
tthawng deuh ko lai.
Cozah sianginn kan kai tikah thil dangdang khi tuah kemh
khawh a si tuk lemlo. Thluak ttha deuh nih cun an kemh khawh hmanh ah, mi cheu
nihcun kan tei kho deuh tawn lo. Thildangdang komh in caan khat ah tuah hi a
tthat lonak a tam deuh tawn, cunakin pakhat te kha a dih tiang thiam taktak in
tuah khawh, cawnkhawh hi hmual a ngei
deuh zungzal. Tthal caan ah kan
tuah awk ah a ttha bik ko lai dah tiah ka ruah mi hna cu…Training Kai, cawnnak
tete cawn, thiammi pakhat tak ngei kho ding in teimak chuah nak he cawn.
Training kai titik ah phuntampi a um. Cu hna lakah cun a zei
hi dah ka caah a tthabik lai ti ruah thiam zong a herh ve. Crusade, Camping hna
a um ahcun kai hmasa hna usih,,zeicahtiah Pathian kawl hmasa cu minung hna rian
nganbik pakhatnak a si.
Chantiluan ah hmunhma a la tam cem mi It lei Training
tete hna hi mino hna nih tthal caan ah
kan kai ve hrim awk a si. Tthalcaan ah an tuah mi computer training phunphun
kai nak ding caah hin phaisa tam a dih hrimhrim
lo. Nu le pa zong hi kan fale an vah sawhnak in cun kan si khawh chung
in kankai ter hna ah a ttha.
Mirang holh cawnnak hna pelh lo in kai ding a si. mino si
lio ah i manh tuk hna hi puitlin khawh lonak a si, ningzak zong a si. Anih cu,
cubantuk training a kai, cu hmun ah khi hmun ah tiin mi nih ti mi si hi kan uar
le kan duh ding a si. Tthal siangin khar caan hi man nei tein kan hman khawh
nakhnga mino tampi kan ruahnak kan thlen a hau cang.
Cawnnak pakhat khat tal cawn ding a si. Motor Cycle
siam/remh maw, Car siam maw, a si lo ah thiam ding tampi a um ko…cu hna lak ah
kanmah sinak he ai rem cemmi, kan huam cemmi le ka tuahkhawh ko lai tiah kan
ruah mi kut thiamnak pakhat khat tal cawng hna usih…hmailei kan pawcawm nak
tiang khua ruat in mino si lio ah ttan rak lak ding a si.
Kan kam a ummi Kawl pawl cu biatak chuah in tthalcan hi kut
thiam cawnnak ah an hman. A dang fimnak phun zakip cawnnak ah an hman. Laimi
tampi cu kan cawn zong ah a hmannak a um lemlo cu, ti hrawng in um kan
hmang,,hihi mah le mah i hlennak pakhat a si. Thiamnak pakhatkhat a hmannak
hmanh kan theih khawh lo hi cu ningzak maw a si, zangfah awk dah a si deuh.
Thiamnak ding caah cawng ko hna usih…. um sawh men in tthal caan a liam tertu
mino kan si sual nakhnga lo…lamphunphun kawl ko hna usih..Hakha, Thang Tlang
hrawng hlat in a vakvai men mi mino kan si sual ahcun ram dirkamhtu mino kan
sinak kan thlau sual ko hnga.
Tthal caan a hmang thiamtu Lai mino si kho cio hna usih ti
ruahchannak he ka bia ka dongh ter.
By VANVA
0 comments:
Post a Comment