Pathian nih nun thiannak ngei ding in a kan ti

Pathian nih nun thiannak ngei ding in a kan ti

Minung cu kan sual tuk i kan thur tuk. Pathian tu cu a thiantuk i a kam i a ummi vanmi hmanh nih an zoh ngam lo i an mit an thla in an i huh. Mah kong cu Isaiah chung ah kan rel. voikhat cu Isaiah nih laarnak a hmuh i vancung khua ah Pathian a hmuh. A velchum ah thilnung kha a hmuh hna. Thla paruk an ngei. Thla pahnih cu an mit huhnak ah an hman. A dang pahnih cu zuannak ah an hman i a taangmi an thla pahnih tu cu an pum huhnak ah an hman. Cun pakhat le pakhat an I chawn i, “A thiang, a thiang, Lian ngan Bik Bawipa cu a thiang. Vawlei cung vialte hi a sunparnak in a khat dih” a ti (Isaiah 6:1-3).

Isaiah cu kan theih bang, tlangbawi phun a si i amah cang ah cun laarnak a hmuh hlan ahcun, mithiang le mittha ah ai hmu ve men ko lai. Asinain Pathian thiannak le sunparnak a hmuh tikah amah ai hmu chuak tthan i, “E law, mah hi ka si ko cang. Ka lo cang…” a ti (Isai. 6:5).

Athiangmi Pathian nih “Keimah ka thian caah nannih zong nan thian ve awk a si” a ti(Lev. 11:44; 1Peter 1:16). A thiangmi nih cun a thiang lo he an um tti kho lo. Kan pum ah kan mit hi a thiang bik a si i hnawm a rem ve lo. Bible ah “Sualnak hi zoh ding ah nang na mit hna cu an thiang tuk” tiah kan hmuh (Heb. 1:13). Cucaah vancung Pathian umnak i um ve ding ah cun kan thian ve a hau. Pathian tluk i thian ve lawng ah a ngah. Cucu minung tuah khawh mi a si fawn lo, Pathian tuahpiak lawng ah a ngah. Levitikas 21:8 ah, “Zeicatiah nannih an thiantertu hna Bawipa keimah cu ka thiang” ti kan hmuh. A fiang ko, a thiangmi Bawipa nih a sin umter a kan duh caah a kan thianter a hau tinak a si.

Ke hnawm bu le lua le khat he, na lung a fim bu te cun, na tlun inn nih ihphah thiangtuk mi in phah in, in phah piak hna sehlaw na it ngam lai lo. Nai khawlh ta ko lai. Cuve bang a tu na siningte hin vanram ah na lut ngam lai lo. Mui le ceu, ti le mei an I ral bang, a thiang le thiang lo cu an i ral, an i rem lo. Na sining in vanram ah in chia hna hmanh sehlaw na um ngam lai lo. Pathian zong nih an rem lai lo. Cucaah Pathian thiannak ruang ah amah Pathian lila thianter kan herh.