Tinhmi ka ngei ve

Tinhmi ka ngei ve

Hngakchia ka rak si lio ah tinhmi hi ka rak ngei ko cang, sihmanhsehlaw a chimrel zia ka rak thiam lo. Cucaah midang nih na upat tikah zeidah nai tinh an ka ti tikah kai tinh lo mipipi khi ka rak chimh tawn hna. Zeicahtiah a chim an rak fawi deuh hna, tch. Sibawi, Engineer tbk..

Minung nih hin tinhmi kan ngeih hi kan tuah awk hrim a si ko, zecahtiah Pathian nih hin minung ca ah tinhmi a kan ngeih piak bu in A rak kan sermi kan si.

Kum 20 ka si ahhin ka lung biatak tein a hung fim. Hngakchia ka rak si lio i ka lungkil tein kai tinhmi kha a chimrel zia zong ka thiam ve cang, ralttha tein kal pi zong ka ngamh cang, zeicahtiah cute cu a tutiang in ka lungkil te ah a cam peng caah a si.

Kan pupa hna nih cun “Minung cu pei le za bang kan i let thal” an rak ti. A hmaan tuk mi a si. Hihi rumnak le sifahnak kong hawih deuh in pitar le putar hna nih an rak chim tawn mi a si ko rua…sihmanhsehlaw kei ka caah ahcun “Nun i fiannak” lei kam in ka rak i lak ve mi a si. Cucu biatak tein ka lungnih “Tinhmi” a rak ngeih le cangka pei le za bang kai let thal colh. Hi kong ah hin khamhnak deuh pei nun letthaltu ti sual hlah…Khamhnak nih Nun thar, Sining thar ah a kan thlen. Khamh kan si hnu nifatin kan nun rianttuannak caah ka chim duh mi a si.

Tinhmi na ngei ve maw? Tinh mi ka ngeih tikah ka cung ah thil a cang mi tlawmpal in van in ruah ta ka duh ko. Tinhmi ka ngeih tikah “ ka ral ttha, ka lung tthawng, mi biasiphai men nih ka lung a zawr ter kho lo, tuar khawhnak ka ngei, teimaknak ka ngei, dawtnak ka ngei, ka rian ah ka lungthin thazang dihlah ka pek ngam hi vial hi a biapi deuh cu an si a dang tampi an um rih ko. Nifatin ka cawlcanghnak ah siikan ka ngei, ngandamnak ka upat cu tikah zukhmawm phunphun le ka taksa le ka ruahnak hrawk kho tu thil tampi hrial khawh kai zuam hna. Zeicahtiah kai Tinhmi hrawk kho tu thil an si. AW…ka nun a dir tertu cu kai Tinhmi a si. Hi kong ka ruah tikah Zumhnak ah kan pa le hna kong tampi ka ruat. Aw a rak si tak hi teh..…Vancung ah an ro an khawn tikah, an lung zong cu ka ah a um i,  a kau tuk mi rili ral in thlichia le tilet lak ah an nun an thap ngam, hi bantuk in vancung ka ro kong hi fiang deuh in ka nun nih i fiang sehlaw ka va duh dah. Ka nun ka thap ngam ve hna mu tihi ka lung a ka su tuk tu a si. Tu ah kai tinhmi ah ka lung zong a um ve tikah raltthatnak tampi ka ngei ve…hi zong Bawipa thawng tthiamtthiam in a si ko. Zeicahtiah ka hram thawhnak, tinhmi ngei ding in harsatnak phunphun lam a ka hruaitu, a ka cawnpiaktu cu Bawipa a si.

Tinhmi ngei lo piin rianttuan khawh a si ko men lai, sihmanhsehlaw phaknak ding hmun a um lo. “Phaknak ding hmun a ngei lo mi khualtlawngpa bantuk a si”, a duhnak poh ah a kum kum in a cam i, a duhnak poh ah hmun a khuar, phaknak ding hmun a ngei ve lo, holh dang in “Kawltung” a ngei ve lo. Asinain tinhmi ngei buin rian a ttuan mi cu “Khualtlawngpa nih a phaknak ding lam zawh in din loin a kal cuahmah bantuk khi a si”. Caan khat khat ah phak a duhnak hmun a phak tik ah a lung ai lawm “ ka phan cang ka hlawh a tling” a ti. Tinhmi um loin hlawhtlin khawh a si lo. A cung ah ka langhter cang mi Tinhmi ka ngeih tikah tiah tlawmpal ka langhter mi hna khi tinhmi ka ngeih hlan ah hin a ngei bantuk in ka rak um, sihmanhsehlaw tinhmi taktak ka ngeih tikah ka rak ngeih lo zia ka thiehthiam.

A donghnak ah..

Tinhmi ka ngei tiin kai tinhmi lawng ruat in mi chiattthat zong ruat loin ka um hrimhrim lo, cucu Pathian nih a ka pekmi Tinhmi a si caah a si rua tiah ka ruah. Abiapi tuk mi cu Pathian pakhatnak ah chia buin tinhmi ngeih, rianttuan le khuaruah hi a si. VANVA