Pathian sinah upat peknak (1Samuel 2:11-36)

Pathian sinah upat peknak (1Samuel 2:11-36)
Tlangbawi nih a hruaimi Israel sualnak nih Pathian thin a phawh tuk cang I Pathian nih loh a duh cang hna. Pathian an biaknak Shiloh zongin hrawh dih a duh. Bawipa rianthiang ttuannak hmunpi bik Shiloh cu sualnak in a thurhnawm tuk cang. Pathian nih “Keimah a ka upat mi cu upatnak ka pek ve hna lai I a ka nautat tu cu ka nautat ve hna lai”(2:30) tiah a ti. Bawipa nih hruaitu ah a sermi nih a mah cu an upat lo tik ah cun an sualman a cawh tawn hna.
Pathian sining ralchanh in Pathian cu upatnak pek loin a um. Eli cu Samuel le Hannah cungah cun Pathian mi sining tein khua a sa  nain a fapa hna le cung ahcun an sualnak kha a zoh sawh ko hna, hmur le ka sawhsawh in a sik hna, asinain an ngaih duh lo tik ahcun a zoh sawhsawh ko hna. (2:22-25) Pathian rianttuantu chung khar in an tthanglian nain misual tuk ah an I cang. Pathian sin raithawinak phungphai kha zei ah an re lo. Bawipa sinah daihnak khanghthawinak caah an rak put mi sa chungin a orhlei phei cu tlangbawi le a chungkhar caah a si lai tiah Bawipa nih a ti. Asinain Eli fapa le hna nih cun an duhnak sa poh kha an I lak (2:13-14) cu hleiah a thau kha an khangh hlan ah Eli sinum hna nih an duhnak poh kha anrak hal hna I an I lak tawn. Cu caah hakkauhnak ralchanhnak lungthin le ziaza thurhnawm tuahnak in Eli fapa le hna nih Bawipa kha zeirel loin an um.

Hannah le Samuel cu Eli le a fapa le hna he cun an I dang ngaingai. Samuel nih cun Bawipa kha phung le phaining tein a nawl a ngeih I upatnak a pek. Hannah nih a fapa nih a herh mi pohpoh kha a rin. Hannah caah Eli thlacamnak cu Bawipa nih a theihpiak I laksawng sunglawi in thlua a chuah. Eli nih a tlangbawi rian kha a fapa le hna tampi in attuan ter hna. Shiloh I Bawipa rian an ttuannak ah  thilsual an tuah tuk ti zong kha a theih lengmang. Asinain fakpiin a si ca hna lo. A fapa le sualnak kha danta loin a zoh ko hna kha Eli sualnak cu a si. Eli chan lio ahcun siangpahrang an ngeih lo lio a si caah amah cu biaknak lei le uknak lei he nawl ngitu bik a si. Cucaah a fapa le hna kha sualphawtnak ngei loin a zoh sawhsawh hna caah a fapa le nih a  pa kha upat ttihzahnak an ngei ve lo (2:25).
Samuel 2:26-36 chung ah Bawipa a upat mi cu thluachuahnak kha a  pek ve hna I Bawipa kha upatnak a pe ve lomi cu chiatserhnak an tong timi kha kan hmuh. Samuel cu Bawipa nih thluachuah a pek I Eli le afapa le hna cu rawhnak nih a tlun hnawh hna ti kha kan hmuh fawn(v.26).
Bawipa ni upatnak a pek mi hna cu an sinah bia a chim I mithmai a pek lo mi hna cu a biachawn hna lo. Samuel cu Bawipa nih a biakchawnh, asinain Eli cu dingteo in Bawipa nih a chawn ti lo(v.27). Bawipa nih a cawisan mi hna cu rian lianngan a ttuan ter hna I mithmai a pek lomi hna cu rian a fial duh hna lo. Eli a hringsortu Aaron cu Bawipa nih a rianthiang a ttuanter, asinain Eli cu a fapa le nih ningcang loin an lakmi ti le rawl kha a eidin lengmang ve caah, an sual man cu a theipar an zun ve ko(2:3). Bawipa nih a cawisan mi hna cu an herh baunak ah Bawipa nih a pekchanh hna hi amah a ralchantu cu an ngeih cia hmanh kha a lakpiak hna. “Na pa chung le hna sinah tlangbawi rianttuannak nawl vialte ka pek”(2:28) tiah Bawipa nih a ti. Khawnghthawinak sa a cheu cu tlangbawi chungkhar hna eidin ding caah a si. Atu cu, cu vialte cu Eli sin in lakpiak dih an si cang lai.

Bawipa niih a cawisanmi hna cu minthannak kha a pek hna; asinain Eli le a fapa le hna cu Bawipa an zomhtaih ruangah hrawh dih an si cang lai (2:30). Bawipa a ttihzahmi cu a nuammi innchungkhar kha Bawipa nih asakpiak hna, asinain a mah ralchanhtu chungkhar cu an sin in daihnak le lawmhnak kha a lakpiak hna. Bawipa nih Eli sin ah “na ban ka tan lai”(2:31) tiah a ti. Asullam cu Eli tthawnnak le a thaong cu an lo thai lai tinak a si. A mit a ttha lo I tthittha in khua a mu ti lo. “na ban le na pa chungkhar hna ban zong ka tan lai” tiah Bawipa nih a ti. Asullam cu lohtlaunak nganpi an cungah tlunter a si lai tinak a si. A rauh hlan ah a fapa hna le a fanu vapa cu ral kut in an thi dih(4:11,12), a hnu kum 20 tluk ah Eli hrinthlak hna cu Saul nih a thah dih hna I (22:17-20) Abithar lawnglawng a zam manh. Asinain a hnu deuh ahcun Abithar zong cu tlangbawi rian a hmu kho ti lo. Cu thawk cu Eli hrinsor hna sin in tlangbawi rian cu a lo dih cang. Amah mit hrimhrim in Shiloh a rawh dih cu a hmuh I a fapa hna zong chantlung in a nungmi an um lo. Pathian nih “ka biakttheng in ka hlonh lo ding mi hna cu na mitzet tertu le na lungretheihtertu ah zuah an si lai I na fapa le hna cu vainam in thah dih an si lai” tiah a ti. Eli fapa le hna cu nikhat te ah ral kut in an thi (2:34). Eli tthutdan cu midang cung ah pek a si cang, Zadok cu Eli rianah a lut I David pennak a dongh tiang le Babylon sal an tan tiangin a ttuan. Tlangbawi taktak, Jesuh Khrih cu ka tlangbawi taktak a si. Zadok cu David hrinsor chanchung tlangbawi rian a ttuan I Jesuh Khrih cu David hrinsor kan tlangbawi taktak cu a si.
Bawipa upatmi hna cu thluachuahnak, nun duhdimnak le lungthin damnak a pek hna. Eli chungkhar hna cu an lotlau dih I a tangmi hna hmanh rawl hal in khua an sa I tlangbawi kuttang ah a niambik rian kha an kawl. Bawipa a ttihzah mi hna cu harnak an ton hmanh ah caan tawite chung lawng a si I thluachuah an hmu tthan tthiamtthiam. Bawipa kha upatnak a petu hna cu Bawipa nih upatnak thluachuah a pek hna.

Baibal in phungchimnak 1samuel by Michael Eaton  ta copy mi a si.