Hawikom pahnih tuanbia

Hawikom pahnih tuanbia

Hawikom țha ngai an si. An pahnih in sianginn an kai ți. Pakhat deuh cu cathiam asi, pakhat cu cathiam lo thiammi tam nei lo pa asi. Kan theih awl nak dingah cathiam pa le cathiam lo pa tiin an min kan țhen lai. Cathiam pa cu thiamlo mi a neilo, innsak tiahcun inn a sak i, Bawlung tiahcun bawlung a chuih kho, music siseh, ca siseh thiamlo mi hi a neilo a thiam dih. Tanghra an kai i cathiampa cu rian a țuan pah tangka a nei kho ngai. Cathiam lo pa cu tangka a nei kholo. A hawipa nihcun ca na thiamlo tuk tiin capo ah a hei seih tawn. A caan ahcun ca a chim pah tawn. Hi ti i ca na thiamlo ah zeitin na paw nai cawm lai a hei ti tawn. 

Hawikom țha ngaingai an si. Tanghra an phi i cathiampa cu a awng i, cathiamlopa cu a sung. Cu tikah a ngeihchia ruahchan nak a nei tilo. Cathiam pa cu ai nuam i ruahchan nak lian pi ka nei tiin. Thiamlo mi a neih lotik khat lei khat lei ah an sawm i rian a țuan tangka cu chim hau lo asi ko. Cathiam lo pa cu thiammi a neilo, asinain a pu a rak bawmh nakin a pu nih a rakchimh mi Arbawm tah, Sei tah heiti Mau, Rua lei i kut thiam te hi a thiam mi cu asi. Ahawipa cu a vak pengko thiammi a nei tam tuk i ai manh bal lo, Cathiamlopa cu tuah ding, țuan ding ka neih țunglo tlah tak ko ning a ti i Arbawm le Sei tah cun ai thok. Cuticun a tak i, a țhangcho deuhdeuh a phunphun in tlah in a tak i kheng chiahnak, țhutnak, cabuai, țawng, pher tbk. aphunphun a tahhna i dawr lianpi a ong i umhmun ah a pawi ai cawm. Dawr rianțuantu a lak hna i, tlah tak tu tiang in midang a chimhhna i a mah tah hau loin a chimhmi hna nih an tah dih.

Cathiampa cu rianțuan ah a vak ko. A kum a upa deuhdeuh kum 45 hrawng asi cang. A thazang a dih deuhdeuh a rak vah tuk nakah damlonak a nei pah fawn. akum le a upa cang i vah zonghi a celh tilo. A rak vah tuk ruangah rianțuan reptak a neilo, um nak inn hmanh a nei lo, zeicahtiah a vah peng ruangah. Tangka cu a nei ko nain a upat tik ah a taksa zongnih vahpah i tangka hawl kha a rem kho tilo.

Voikhat cu Cathiampa cu a vahnak ah a tha a di tuk, a rawl țam, a ti hal i khuapi pakhat a hunglut. Khuachung deuh ahkhin tlah in tah mi a phunphun inn kam ah an thlai hna khi a hei hmuh, an i dawh ai tiin a zoh ahcun a va kal,Dawr hngaktu nungakno te nih a hmuh i ka pu rak kan leng, na duh mi hna a um maw? A thadi tuk rua ti ka van in suah lai a ti i Ti cu a van suah. Cathiampa nih a chimmi cu na Ti cu kik nawn tein a thaw tuk, nan thil zuarmi zoh duh ahhin ka rak in lenghna tiah a leh, cun hi pawl a tuahtu hi a ho dah asi,nan dawrneitu hi a ho dah asi, hi bantuk thil dawh a tuah hi ka lawmhpi tuk, ca zeitluk in dah a thiam hnga tiah a bia a peh, Ngaknu nihcun hi dawr neitu pa hi maw, cathiam asilo, Sianginn a kai lio ah hawițha tuk a nei, asinain a hawipa cu ca a thiam tuk i cu pa nihcun ca hna a chimh tawn. Tanghra an phi i ahawipa cu a awng i a nihcu a sung. Zei hmanh tuah ding ka neilo, thiam mi dang le ka nei fawnlo, tlah tak ko ning a ti, cuticun tlah tak cu ai thawk i tuchun ni ahcun hi bantuk hin dawr lianpi he a um cang, hi hi ram dang zongah kan kuat rih tiah a leh. A chimi bia kha țha tein a van ruat i a hawipa le a mah tuan bia arak si. Amin a van hal i Cathiamlopa tiah an rak leh. Chimding theilo in a dir i a mitthli a tla,an pu cu an hei kawhpiak i an i zoh cu an khuaruah a har. Cathiamlopa nihcun a hawipa a van hmuh in a khuaruah a har ko, a ruahmi cu khatluk cathiam zeitin hibantukin a vah i sampar pi he a um cu tiin a khua ruah a har. An i tong i nuamngai in zaanriah an ei ți. Cathiam lo pa nih bia  ahal, ka hawi zeitin dah ca na thiam tuk țung hi bantuk dirhmun ah na can khawh tiah a ti, a leh mi cu ka hawi kei cu na theih bantuk in ka thiam lo mi hi a umlo tik ah, pakhat lei tuah ding a um ahcun ka va kal, khat lei ah a um țhan ka kal țhan, cuticun ka va vima i tangka cu ka hmu ko, asinain a tu cu ka tangka a dih cang, ka u pa cang i rianțuan in ka vak kho tilo ka rak vah tuk nak ah umnak inn hmanh ka neilo a tucu ka nak in cathiam le hmanhtlak cu nangmah na si. Nang cu na thiammi pakhat te ah na dir i tuchun ahcun fek tein na dir cang tiah a leh.

Kan thiam mi pakhat te ahhin țha tein kan thiam i hmantlak asi tiang thiam hmasa hna u sih. Hi ka zongah thiam tuk lo, khi ka zongah thiam tuk lo in mitampi kan um rih mi hi hmailei ah kan Chin ram tiangin a țum chuk ter tu asi lai. Careltu a tu na tuah mi kha na thiam taktak maw? Bible sianginn kai, Cozah Sianginn kai kan si ah kan cawnmi ca kha kan thiam taktak maw? Asiloah thiam huaha loin dah thildang kan i chap, kan hlawhtlinnak lam a kan dawntu asi. Kan mah le kan cawnmi, kan rian hi kan thiam, thei fiang taktak maw? Cathiamlopa bangin kan thiammi pakhat te hi kan bawmcawmnak ah siseh, mi dang ca thilțha tuahnak ah kan hmankhawh nak hnga zuam cio hna usih, Pathian nih thlua kan chuah piak ko seh. Amen.