Nifatin na nun ah biahal nak

Nifatin na nun ah biahal nak

Nifatin na nunnak ah a ho dah bawi a si? Kan nun hi kan mah duh ning a um kho lo. Ruah lo pi ah a liam kho mi nun, ai hrawk kho mi nun a si. Cu tluk a nenno mi na nun kha a ho nih dah a uk?

Kan fimthimnak hna hi a ho sin in a ra mi dah a si? Pathian bia nih cun fimnak hram thawhnak cu ka si tiah a ti. Vawleicung hmun tampi ah mifimthiam hna nih an ton mi rawhral hna cu molhnak, lungretheihnak, mi va nautat, minung hawi cung ah thil tthalo tuahnak le rawhralnak a phun phun hna an si. Cu vialte cu a taktak in an ton mi ko hna, a tong tu hna hi saram an si lo, kan mah bantuk minung an si ve. Kan fimthiamnak hna hi a ho sin in dah kan hmuh mi a si? Hna ngam nak taktak a ngei mi fimnak a si maw?

Kan hlawhtlinnak bawi hi a ho dah a si? Mihlawhtling si hi kan duh dih mi a si. Sihmanhsehlaw hlawhtlinnak taktak cu Pathian sin lawng in kan hmuh khawh mi a si. Minung ruahnak men ah hlawhtling mi si lai hi phan um tak mi a si. Cu bang in a hlawhtling mi kan si ahcun…a ho sin in dah hlawhtlinnak hi kan hmuh ne hnga…rawhralnak lam ah hruai a kan duhtu Satan pa sin lawng in a si ko. Thil tthalo tuah bu zong in hlawhtlinnak hi tlaih khawh a si ko. Sihmanhsehlaw a lem lawnglawng a si. Mi va nautat nak thawng in le mi thil va chuh nak thawng in hlawhtlin khawh a si dawk aw…kha hna pawl kha Satan sin in a ra mi hlawhtlinnak hna an si. Kan hlawhtlinnak hrampi hi kan biak Pathian nung a si ahcun zeitluk in dah a sunlawi hnga.

Kan dam nak hi a ho thawng in dah a si? Kan mah thil ti khawhnak in a nung dam mi a ho hmanh kan um lo ti hi Pathian bia nih a kan chimh mi a si. Sihmanhsehlaw kan mah thil ti khawhnak in a nungdam mi kan tamtuk hi aw…kan taksapum le ruahnak hna hi Pathian dawmhtlaih nak thawng in a cawlcang kho mi a si ti hi nifatin kan i ruah awk hrimhrim a si. A tu bak ah khan a ho thawng in dah na dam? Dam lo te hna hi zeitik caan poh ah kan cung ah a tlung kho mi a si ti hi teh na ruah bal maw? Pum tlamtlinglo sinak te hna hi a tu bak ah ka cung ah a tlung kho ti hi na ruat bal maw?

Hi tlawmpal ka langhter mi ka ruah tikah Pathian thangtthat lo in ka um kho lo..lawmhnak bia chim lawng hi ka ti khawh tawk a si ko. Pathian nih thlauchuahnak kan pek piak ko seh…..