Rakhine State buainak he pehtlaiin Social Media ah a lar
taktak mi hmanthlak ttuh hna
Myanmar ram cu Rakhine State ah buainak a sang tuk mi ruang
ah vawlei mipi nih cuanh bik mi pakhat ah a cang ve cang. Miphun karlak ah
buainak a chuak ti sihlaw kan palh tuk lai lo dah. Cu lak zong ah cun mah le
phun ttanh in a cawl cang mi tete zong an rak
um hna.
Tu chanti luan social media a tthawng tuk cung ah hmanthlak
pakhat, cabia pakhat post nak in vawlei mipi tampi lung a hno ter, thin a
han/hun ter, lung a fah ter. Zei cahtiah Social Media cung ah cun pumpak
ruahnak cio kha an mah le duh ning cio in van chim le hmanthlak tar a si.
Tutan Rakhine buainak hi mitampi nih cun a chung thilsining
taktak kan hmu kho lo, sihmanhsehlaw Social Media pakhatkhat cung ah an
tarlangh tik lawng ah kan rak hmuhtheih khawh ceo khi a si. Si..Tulio social media
ah hin a lungthin a pe tuk mi mitampi cu an buainak a tam ko lai dah.
Zeicahtiah an hmuh mi le an theih mi hna cu milunglawmhnak petu thil an um hrim
lo.
Tu Rakhine state buainak kong zong ah hmanthlak ttuh kha la
riangmang in social media cung ah an tar tik ah mipi lung a fak i, mi thin a
phawh hna. Zeicahtiah hmanthlak nih a langhter mi thilsining cu ttihnung rapthlak an si.
Social Media nih Rakhine ram buainak he pehtlaiin an
tarlanghmi hmanthlak a cheu cu a dik taktak mi zong an um ko, sihmanhsehlaw a
ttuh an tar mi nih vawlei mipi thin a phawhter.
Twitter account ngeitu Turikish Deputy Prime Minister Mehmet
Simsek timi pa nih a post mi pakhat cu a tang hmanthlak hi a si. Rohinya
Muslims mipi tampi an thah hna..tiin hmanthlak ttuh a tar. Cu a tar mi cu
minung 1,600 nih retweet an tuah manh i minung 1,200 leng nih Like an tuah
manh. Twitter ah a tar tik ah mipi tampi nih an hlathlai colh, asi tak maw si
tak lo timi cu kong ah hlathlainak an tuah, an buai ngai tik ah, a post in
nithum hnu ah a deleted tthan.
A post mi lak ah a pakhat nak hmanthlak cu kum 2008 lio
Cyclone Nargis ruang ah a thi mi an si tiah Myanmar lei in Mr Simsek a rak el
tu nih cun a chim ve.
Mi dang nih cun tilawng ai let mi ruang ah a thi mi an si
tiah an chim ve. Sihmanhsehlaw hi an chim mi hna caan lio ah hi bantuk
hmanthlak hi hmuh ding cu a um ve lem lo.
Asinain hi hmanthlak minung pakua/hra
deng mang Ti cung ah a vuan mi hmanthlak hi cu tu lio Rakhine buainak ah a cang
mi cu a si lo ti hi zumh tlak bik a si.
A pahnihnak hmanthlak nu pakhat a ttah
lio hi cu kum 2003, June thla i Aceh khua Indonesia ah thil a rak cang mi
hmanthlak a si. Hi hmanthlak cu Reuters reporter nih a thlak mi hmanthlak a si.
A pathum nak hmanthlak cu July 1994 lio Rwanda ah thil a rak cang mi hmanthlak a
si. Hi hmanthlak a rak thla tu pa Albert Facelly nih hin World Press Award a
rak ngah.
Cun mipi tampi tiva chung ah an um lio hmanthlak cu fiang tein theih
khawh cu a si lo naink website cheu khat
ah fund kawl nak ah an rak cang mi Nepal tilian bawmhnak ding caah fund kawl
nak he pehtlaiin an rak tar mi a si.
Twitter account Szaminthit timi nih cun Myanmar ram ah Rohingya
timi an um lo, an nih cun ralhrang pei an si ko cu (There is no Rohingya in
Myanmar, they are terrorists only) tiin
ca attial i a tang hmanthlak hi a tar ve. Asinain hi hmanthlak cu kum
1971 lio i Bangladeshi voluteers hna nih independence caah ral an rak doh nak
hmanthlak a si.
Social media hi a ttha tuk ko nain, ttihnung tuk mi ral
thawh ter kho tu a si cang, Chin mipi zong nih kan i ralrin thiam a herh ngai
tiah ka ruah. Ca an post mi hmanthlak an post poh zong hi zumh dih ding an si
lem lo, zeicahtiah pumpak pakhat nih a mah ruah ning kha mipi huap in a post mi
hna a si tawn, cu caah kha bantuk tete kha zoh thiam ding cu kan rian ngan pi
pakhat a si.
Ref:BBC
